ನವದೆಹಲಿ: ಈಗ ದೇಶಾದ್ಯಂತ ಪೌರತ್ವ ತಿದ್ದುಪಡಿ ಕಾಯ್ದೆ, ರಾಷ್ಟ್ರೀಯ ನಾಗರಿಕರ ನೋಂದಣಿ ವಿರುದ್ಧ ಪ್ರತಿಭಟನೆಯದ್ದೇ ಸುದ್ದಿ.
ಸಾಮಾಜಿಕ ಜಾಲತಾಣಗಳಲ್ಲಿ ಬರುವ ಫೋಟೋ ಮತ್ತು ವಿಡಿಯೋಗಳೂ ಇದಕ್ಕೆ ಸಂಬಂಧಿಸಿದವು ಎಂಬ ಕೆಳಬರಹದೊಂದಿಗೆ ಅಪ್ಲೋಡ್ ಆಗುತ್ತಿವೆ. ಹಾಗೆ ನೋಡಿದರೆ ಪ್ರತಿಭಟನೆಗೆ ಸಂಬಂಧಿಸಿರಲಿ ಅಥವಾ ಇಲ್ಲದಿರಲಿ ಅದರ ಹೆಸರಿನಲ್ಲಿ ಹರಿದಾಡುವುದು ಗ್ಯಾರಂಟಿ.
ಕೆಲ ದಿನಗಳ ಹಿಂದೆ ಒಂದು ವಿಡಿಯೋ ಜಾಲತಾಣದಲ್ಲಿ ಹರಿದಾಡುತ್ತಿದೆ. ಕೆಲ ಯುವಕ-ಯುವತಿಯರು ಬೀದಿಯಲ್ಲಿ ಚಪ್ಪಾಳೆ ತಟ್ಟುತ್ತ, ಡ್ಯಾನ್ಸ್ ಮಾಡುತ್ತಿರುತ್ತಾರೆ. ಇದ್ದಕ್ಕಿದ್ದಂತೆ ಪ್ರತ್ಯಕ್ಷಳಾಗುವ ಮಹಿಳೆಯೊಬ್ಬಳು ಅಲ್ಲಿನ ಹುಡುಗಿಯೊಬ್ಬಳಿಗೆ ಕಪಾಳಕ್ಕೆ ಬಾರಿಸುತ್ತಾಳೆ. ಇದಕ್ಕೆ “ಸಿಎಎ ಪ್ರತಿಭಟನೆ ವೇಳೆ ದಿಢೀರ್ ಅಮ್ಮ ಬಂದಾಗ..!” ಎಂಬ ಕ್ಯಾಪ್ಷನ್ ಕೊಡಲಾಗಿದೆ.
ಇಂಡಿಯಾ ಟುಡೆ ನಡೆಸಿದ ಫ್ಯಾಕ್ಟ್ಚೆಕ್ನಲ್ಲಿ ವಿಡಿಯೋ ಅಸಲಿ ವಿಷಯ ಬಯಲಾಗಿದೆ. ಈ ವಿಡಿಯೋ ಸಿಎಎ ಪ್ರತಿಭಟನೆಗೆ ಸಂಬಂಧಿಸಿದ್ದಲ್ಲ. ಬದಲಿಗೆ 4 ವರ್ಷಗಳ ಹಳೆಯ ವಿಡಿಯೋ ಎಂದು.
ಈ ವಿಡಿಯೋವನ್ನು ಹಲವು ಜನ ತಮ್ಮ ಫೇಸ್ಬುಕ್ ಖಾತೆಯಲ್ಲಿ ಹಂಚಿಕೊಂಡಿದ್ದಾರೆ. ಅವರಲ್ಲಿ ಮೋಹನ್ ವಿಶ್ವ ಮತ್ತು ಸಂಕೋಜಿ ಅಕ್ಷಯ್ ಹಿಂದು ಎನ್ನುವವರು ಪ್ರಮುಖರು. ಅದರಲ್ಲೂ ಮೋಹನ್ ವಿಶ್ವ ಹಂಚಿಕೊಂಡ ವಿಡಿಯೋವನ್ನು 72 ಸಾವಿರಕ್ಕೂ ಹೆಚ್ಚು ಮಂದಿ ವೀಕ್ಷಿಸಿದ್ದು 2,880 ಬಾರಿ ಶೇರ್ ಮಾಡಿದ್ದಾರೆ.
ಅಸಲಿಯತ್ತು ಏನು?:
ಕೇರಳದ ಕಣ್ಣೂರು ಜಿಲ್ಲೆ ಪಯ್ಯೂನೂರು ಬಸ್ ನಿಲ್ದಾಣದಲ್ಲಿ ನಡೆದ ಘಟನೆಯ ವಿಡಿಯೋ ಇದು. ಇದನ್ನು ಮನೋರಮಾ ಆನ್ಲೈನ್ ಮತ್ತು ಇಂಡಿಯನ್ ಎಕ್ಸ್ಪ್ರೆಸ್ಗಳು ವರದಿ ಮಾಡಿವೆ. 2 ನಿಮಿಷದ ವಿಡಿಯೋ ಯೂಟ್ಯೂಬ್ನಲ್ಲೂ ಲಭ್ಯವಿದೆ.
ಈ ವಿಡಿಯೋಗೆ ನೀಡಿರುವ ಶೀರ್ಷಿಕೆ ಹಾಗೆ ಡ್ಯಾನ್ಸ್ ಮಾಡುವ ಹುಡುಗಿಯ ಕಪಾಳಕ್ಕೆ ಹೊಡೆಯುವುದು ಅವರ ಅಮ್ಮ. ಆದರೆ ಅದು ಸಿಎಎಗೆ ಸಂಬಂಧಿಸಿದ ಪ್ರತಿಭಟನೆಯಲ್ಲ. ಬದಲಿಗೆ “ಕಾಲೇಜಿಗೆ ಹೋಗು ಎಂದು ಕಳುಹಿಸಿದರೆ, ಇಲ್ಲಿ ಬಂದು ಬಸ್ ನಿಲ್ದಾಣದಲ್ಲಿ ಡ್ಯಾನ್ಸ್ ಮಾಡುತ್ತಿದ್ದೀಯಾ” ಎಂಬುದು ಅಮ್ಮನ ಆಕ್ಷೇಪಣೆ!
ಇದು 2016ರಲ್ಲಿ ನಡೆದದ್ದು. ಮತ್ತು ಇದಕ್ಕೂ ಸಿಎಎ ಪ್ರತಿಭಟನೆಗೂ ಸಂಬಂಧವಿಲ್ಲ ಎನ್ನುವುದು ಫ್ಯಾಕ್ಟ್ಚೆಕ್ನಿಂದ ತಿಳಿದುಬಂದಿರುವ ಸಂಗತಿ. (ಏಜೆನ್ಸೀಸ್)