ನವದೆಹಲಿ: ಮಹಿಳೆಯರ ಒಳಉಡುಪು ಧರಿಸಿ ನಿಂತಿರುವಂತಿರುವ ಪುರುಷರಿಬ್ಬರ ಫೋಟೋಗಳು ಸಾಮಾಜಿಕ ಜಾಲತಾಣಲ್ಲಿ ತಪ್ಪು ಸಂದೇಶದೊಂದಿಗೆ ಸಿಕ್ಕಾಪಟ್ಟೆ ವೈರಲ್ ಆಗಿದ್ದು, ಅದರ ಅಸಲಿಯತ್ತು ಫ್ಯಾಕ್ಟ್ಚೆಕ್ನಿಂದ ಬಯಲಾಗಿದೆ.
ಅನೇಕ ಫೇಸ್ಬುಕ್ ಬಳಕೆದಾರರು ಫೋಟೋಗಳನ್ನು ಶೇರ್ ಮಾಡಿಕೊಂಡಿದ್ದಾರೆ. ಫೋಟೋ ಕುರಿತು ಹಿಂದಿಯಲ್ಲಿ ಅಡಿಬರಹ ಬರೆಯಲಾಗಿದ್ದು, ಅದರ ಸಾರ ಹೀಗಿದೆ. ಒಳಉಡುಪು ಧರಿಸಿದ್ದ ಐಸಿಸ್ ಉಗ್ರರನ್ನು ಸಿರಿಯನ್ ಸೇನೆ ಬಂಧಿಸಿದೆ. ಅವರನ್ನು ಪ್ರಶ್ನಿಸಿದ ವೇಳೆ ಹೋರಾಟದಲ್ಲಿ ಮಡಿದು ಸ್ವರ್ಗಕ್ಕೆ ಹೋದಾಗ ನಾವು 72 ಕನ್ಯೆಯರನ್ನು ಭೇಟಿ ಮಾಡುತ್ತೇವೆ. ಅವರಿಗಾಗಿ ನಾವು ಒಳಉಡುಪುಗಳನ್ನು ತೆಗೆದುಕೊಂಡು ಹೋಗುತ್ತಿರುವುದಾಗಿ ತಪ್ಪೊಪ್ಪಿಕೊಂಡಿದ್ದಾರೆಂದು ಬರೆಯಲಾಗಿದೆ. ಆ ಫೋಟೋಗಳನ್ನು ನೀವಿಲ್ಲಿ ಕಾಣಬಹುದಾಗಿದೆ.
ಆದರೆ, ಫೇಸ್ಬುಕ್ನಲ್ಲಿ ಫೋಟೋಗಳ ಅಸಲಿಯತ್ತು ಇಂಡಿಯಾ ಟುಡೆ ಆ್ಯಂಟಿ ಫೇಕ್ನ್ಯೂಸ್ ವಾರ್ ರೂಮ್ ನಡೆಸಿದ ಫ್ಯಾಕ್ಟ್ಚೆಕ್ನಿಂದ ಬಯಲಾಗಿದ್ದು, ಮೇಲೆ ಹೇಳಿರುವುದಕ್ಕೂ ಫೋಟೋಗೂ ಸಂಬಂಧವಿಲ್ಲ. ಅಷ್ಟಕ್ಕೂ ವೈರಲ್ ಆಗಿರುವ ಫೋಟೋ 3 ವರ್ಷ ಹಳೆಯದು. 2017ರಲ್ಲಿ ಅಕ್ರಮವಾಗಿ ಗಡಿದಾಟಲು ಯತ್ನಿಸಿದ ಸಿರಿಯನ್ ನಿರಾಶ್ರಿತರನ್ನು ಟರ್ಕಿಸ್ ಸೇನೆ ಅವಮಾನಿಸಿದ ಪರಿ ಇದಾಗಿದೆ.
ಗೂಗಲ್ ರಿವರ್ಸ್ ಸರ್ಚ್ ಇಂಜಿನ್ ಸಹಾಯದಿಂದ ಫೋಟೋಗಳನ್ನು ಹುಡುಕಾಡಿದಾಗ ಅನೇಕ ವೆಬ್ಸೈಟ್ಗಳಲ್ಲಿ ಮೂರು ವರ್ಷಗಳ ಹಿಂದೆ ಫೋಟೋ ಕುರಿತು ಸುದ್ದಿ ಪ್ರಕಟವಾಗಿರುವುದು ಗಮನಕ್ಕೆ ಬಂದಿದೆ. ದಿ ಸನ್ ಹಾಗೂ ಡೈಲಿ ಮೇಲ್ ವೆಬ್ಸೈಟ್ಗಳು 2017ರ ಆಗಸ್ಟ್ 3ರಂದು ಇದೇ ಫೋಟೋಗಳನ್ನು ಬಳಸಿಕೊಂಡು ಸುದ್ದಿ ಪ್ರಕಟಿಸಿವೆ.
ವರದಿಗಳ ಪ್ರಕಾರ ಗಡಿ ದಾಟಲು ಯತ್ನಿಸಿದ ಸಿರಿಯಾ ನಿರಾಶ್ರಿತರನ್ನು ಹಿಡಿದು ಅವರನ್ನು ಥಳಿಸಿ, ಒಳಉಡುಪು ಧರಿಸಿ ಟರ್ಕಿಸ್ ಸೇನೆ ಅವಮಾನಿಸಿತ್ತು. ಈ ಘಟನೆ ದಕ್ಷಿಣ ಟರ್ಕಿಯ ಹತಾಯ್ ಗಡಿಯಲ್ಲಿ ನಡೆದಿತ್ತು. ಹೀಗಾಗಿ ಫೋಟೋ ಕುರಿತಾಗಿ ಸದ್ಯ ಹರಿದಾಡುತ್ತಿರುವ ಮಾಹಿತಿ ಸತ್ಯಕ್ಕೆ ದೂರವಾದದ್ದು ಎಂಬುದು ಫ್ಯಾಕ್ಟ್ಚೆಕ್ನಿಂದ ತಿಳಿದುಬಂದಿದೆ. (ಏಜೆನ್ಸೀಸ್)
ರಿಯಾ ಜತೆ ಯೂರೋಪ್ ಟ್ರಿಪ್ ಮುಗಿಯುತ್ತಿದ್ದಂತೆ ಸುಶಾಂತ್ನಲ್ಲಿ ಕಾಣಿಸಿತ್ತು ಅಚ್ಚರಿಯ ಬದಲಾವಣೆ!