ನವದೆಹಲಿ: ಮಹಿಳೆ ಐಫೆಲ್ ಟವರ್ನ ಕಬ್ಬಿಣದ ಸಲಾಕೆ ಚುಂಬಿಸುತ್ತಿರುವ ದೃಶ್ಯ ಹಾಗೂ ಅದರ ಹಿಂದೆ ಇರುವ ರೋಚಕ ಕತೆಯ ಮಾಹಿತಿ ಇರುವ ಪೋಸ್ಟ್ ಇತ್ತೀಚೆಗೆ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.
ಫ್ರಾನ್ಸ್ನ ಐಫೆಲ್ ಟವರ್ ಬಗ್ಗೆ ಆಕರ್ಷಣೆ ಹೊಂದಿರುವ ಮಹಿಳೆ ಐಫೆಲ್ ಟವರ್ ಏರಿ ಆತ್ಮಹತ್ಯೆಗೆ ಯತ್ನಿಸಿ ಟವರ್ನಿಂದ ಜಿಗಿದು ಕಾರಿನ ಮೇಲೆ ಬಿದ್ದು ಬದುಕುಳಿದಳು. ನಂತರ ತಾನು ಬಿದ್ದ ಕಾರಿನ ಮಾಲೀಕನನ್ನು ಮದುವೆಯಾದಳು ಎಂಬ ಕತೆ ಹೊಂದಿದ ಪೋಸ್ಟ್ ಅಪ್ಲೋಡ್ ಆಗಿದೆ.
ಆದರೆ ಈ ಪೋಸ್ಟ್ ನಕಲಿ ಎಂಬುದು ಫ್ಯಾಕ್ಟ್ ಚೆಕ್ನಿಂದ ಪತ್ತೆಯಾಗಿದೆ. ಇಂಡಿಯಾ ಟುಡೆ ಆ್ಯಂಟಿ ಫೇಕ್ ನ್ಯೂಸ್ ವಾರ್ ರೂಮ್ (ಎಎಫ್‌ಡಬ್ಲ್ಯೂಎ) ಈ ಪೋಸ್ಟ್ ನಕಲಿ ಎಂಬುದನ್ನು ಪತ್ತೆ ಮಾಡಿದೆ. ವೈರಲ್ ಆದ ಪೋಸ್ಟ್ನಲ್ಲಿ ಕಾಣಿಸಿಕೊಂಡ ಮಹಿಳೆ ಹೆಸರು ಎರಿಕಾ, ಅವರು 2007 ರಲ್ಲಿ ’ಐಫೆಲ್ ಟವರ್ ಆತ್ಮಹತ್ಯೆಗೆ ಯತ್ನಿಸಿಲ್ಲ ಎಂದು ತಿಳಿದು ಬಂದಿದೆ.
ಎರಿಕಾ ಐಫೆಲ್ ಟವರ್ನಿಂದ ಹಾರಿ ಕಾರಿನ ಮೇಲೆ ಬಿದ್ದು ಬದುಕಿ ಕಾರಿನ ಮಾಲೀಕನನನ್ನು ಮದುವೆಯಾದಳು ಎಂಬುದು ಕಟ್ಟು ಕತೆ. ಈ ಕತೆಗೆ ಯಾವುದೇ ಪುರಾವೆ ಇಲ್ಲ.
ಆದರೆ ದಿ ಟೆಲಿಗ್ರಾಫ್, ನ್ಯೂಸ್.ಕಾಮ್ ಮತ್ತು ದಿ ರಿಚೆಸ್ಟ್ ಸುದ್ದಿ ವೆಬ್ಸೈಟ್ನಲ್ಲಿ ಈ ಮಹಿಳೆಯ ಚಿತ್ರಗಳು ಇದ್ದು. ಅದರಲ್ಲಿ ಆಕೆಯ ಐಫೆಲ್ ಟವರ್ ವಿವಾಹದ ಮಾಹಿತಿ ಇದೆ.
ಎರಿಕಾ ಲ್ಯಾಬ್ರಿ ಎಂಬ ಮಹಿಳೆ ಐಫೆಲ್ ಟವರ್ ಅನ್ನು ತೀವ್ರವಾಗಿ ಪ್ರೀತಿಸುತ್ತಿದ್ದಳು. 2007 ರಲ್ಲಿ, ಅವಳು ತನ್ನ ಹೆಸರನ್ನು ಐಫೆಲ್ ಎಂದು ಬದಲಾಯಿಸಿಕೊಂಡಳು. ಅಲ್ಲದೆ ಆಕೆ ಐಫೆಲ್ ಟವರನ್ನು ವಿವಾಹ ಕೂಡ ಆದಳು. ಈಕೆಗೆ ನಿರ್ಜೀವ ವಸ್ತುವಿನ ಬಗ್ಗೆ ಆಕರ್ಷಣೆ ಹೊಂದುವ ವಸ್ತುನಿಷ್ಟ ವ್ಯಕ್ತಿತ್ವ ಎಂಬ ಮಾನಸಿಕ ಕಾಯಿಲೆ ಇದ್ದ ಪರಿಣಾಮ ಐಫೆಲ್ ಟವರ್ ವಿವಾಹವಾಗಿದ್ದಳು. ಇದಕ್ಕೆ ಫ್ರಾನ್ಸ್ನಲ್ಲಿ ಆಗ ಭಾರಿ ಟೀಕೆಗಳು ವ್ಯಕ್ತವಾಗಿದ್ದವು ಎಂಬ ಮಾಹಿತಿ ಇದೆ.
1964ರಲ್ಲಿ ಕ್ರಿಸ್ಟಿಯನ್ ಎಂಬ ಯುವತಿ ಐಫೆಲ್ ಗೋಪುರದಿಂದ ಬಿದ್ದು ಆತ್ಮಹತ್ಯೆಗೆ ಯತ್ನಿಸಿದ್ದಳು ಎಂಬ ಮಾಹಿತಿ ಇದೆ. ಇದರ ಹೊರತಾಗಿ ಎರಿಕಾ ಎಂಬುವವರು ಆತ್ಮಹತ್ಯೆಗೆ ಯತ್ನಿಸಿಲ್ಲ ಎಂಬ ಮಾಹಿತಿ ಇದೆ. (ಏಜೆನ್ಸೀಸ್)