ಬೆಂಗಳೂರು: ಕೆಲವು ತಿಂಗಳುಗಳ ಹಿಂದೆ ಮುಂದಿನ 5 ವರ್ಷಗಳಲ್ಲಿ ದೇಶದಲ್ಲಿ ಪೆಟ್ರೋಲ್, ಡಿಸೇಲ್ಗಳನ್ನು ಬ್ಯಾನ್ ಮಾಡುತ್ತೇವೆ ಎಂದಿದ್ದರು. ಇದಾದ ಮೇಲೆ ದೇಶದಲ್ಲಿ ಹೈಡ್ರೋಜನ್, ನೈಸರ್ಗಿಕ ಅನಿಲವನ್ನು ಇಂಧನವಾಗಿ ಬಳಸುವ ಕಾರುಗಳು, ಎಲೆಕ್ಟ್ರಿಕ್ ಕಾರುಗಳು, ಹೀಗೆ ನವೀಕರಿಸಬಹುದಾದ ಇಂಧನ ಬಳಸುವ ವಾಹನಗಳ ಸಂಖ್ಯೆ ಹೆಚ್ಚಾಗಿದೆ.
ಇದೀಗ ದೇಶದಲ್ಲಿ ಹೈಡ್ರೋಜನ್, ಸಿಎನ್ಜಿ ಕಾರುಗಳಿಗಿಂತ ಹೆಚ್ಚಾಗಿ ಎಲೆಕ್ಟ್ರಿಕ್ ಕಾರುಗಳ ಪಾರುಪತ್ಯವೇ ಹೆಚ್ಚಾಗಿದೆ. ಅದಕ್ಕೆ ಕಾರಣ ಇಷ್ಟೇ. ಹೈಡ್ರೋಜನ್ ಅಥವಾ ನೈಸರ್ಗಿಕ ಅನಿಲವನ್ನು ಪೆಟ್ರೋಲ್-ಡಿಸೆಲ್ ರೀತಿ ಸಪ್ಲೈ ಮಾಡುವ ವ್ಯವಸ್ಥೆ ಇಲ್ಲ. ಆದರೆ ಎಲೆಕ್ಟ್ರಿಕ್ ವಾಹನಗಳನ್ನು ಮನೆಯಲ್ಲೇ ಚಾರ್ಜ್ ಮಾಡಬಹುದು. ಇ- ವಾಹನಗಳನ್ನು ಯಾವ ಕಟ್ಟಡದಲ್ಲೂ ಚಾರ್ಜ್ ಮಾಡಬಹುದು.
ಈಗ ಬೈನ್ ಆ್ಯಂಡ್ ಕಂಪೆನಿ ಬಿಡುಗಡೆ ಮಾಡಿರುವ ವರದಿ ಪ್ರಕಾರ ದೇಶದಲ್ಲಿ ಇವಿ ಮಾರುಕಟ್ಟೆಯ ಒಟ್ಟು ಬೆಲೆ 2030ರ ಒಳಗೆ 76 ಬಿಲಿಯನ್ ನಿಂದ 100 ಬಿಲಿಯನ್ವರೆಗೆ ತಲುಪಲಿದೆ. ಅಂದರೆ ಇವಿ ಮಾರುಕಟ್ಟೆ ಮುಂದಿನ 8 ವರ್ಷಗಳಲ್ಲಿ ಒಟ್ಟು 8 ರಿಂದ 11 ಬಿಲಿಯನ್ ಡಾಲರ್ಗಳನ್ನು ಗಳಿಸಲಿದೆ.
ಸಾಮಾನ್ಯರಿಗೆ ಏನು ಲಾಭ?
ಇವಿ ಮಾರುಕಟ್ಟೆ ಬೆಲೆ ಹೆಚ್ಚಾಗಲಿದೆ ಎಂದರೆ ಅಲ್ಲಿ ಹೂಡಿಕೆಗೆ ಅವಕಾಶ ಇದೆ ಎಂದರ್ಥ. ಹೂಡಿಕೆ ಶೇರು ಮಾರುಕಟ್ಟೆಯಲ್ಲೂ ಮಾಡಬಹುದು, ನೇರವಾಗಿ ವ್ಯಾಪಾರಕ್ಕೆ ಧುಮುಕಿಯೂ ಮಾಡಬಹುದು. ಏನೂ ಇಲ್ಲದಿದ್ದರೆ, ಮುಂದಿನ 8 ವರ್ಷಗಳ ಒಳಗೆ ನಿಮ್ಮ ಪೆಟ್ರೋಲ್ ಕಾರನ್ನು ಮಾರಿ ಎಲೆಕ್ಟ್ರಿಕ್ ಕಾರನ್ನು ಕೊಳ್ಳಲು ತಯಾರಾಗಬಹುದು.
ಯಾವ ಕ್ಷೇತ್ರದಲ್ಲಿ ಉದ್ದಿಮೆ ಶುರು ಮಾಡಬಹುದು?
ಒಬ್ಬ ಸಾಮಾನ್ಯ ನೇರವಾಗಿ ಕಾರು ಉತ್ಪಾದನೆ ಮಾಡಲು ಸಾಧ್ಯವಿಲ್ಲ. ಬದಲಾಗಿ, ಬ್ಯಾಟರಿ ಉತ್ಪಾದನೆಯಲ್ಲಿ ತೊಡಗಬಹುದು. ಅಥವಾ ಚಾರ್ಜಿಂಗ್ ಸ್ಟೇಷನ್ ಹಾಕಿಕೊಂಡರೂ ಸಾಕು!
ಶೇರು ಮಾರುಕಟ್ಟೆ:
ಈ ರಿಸ್ಕ್ ತೆಗೆದುಕೊಳ್ಳುವುದೇ ಬೇಡ ಎಂಬ ಮನಸ್ಥಿತಿ ಇದ್ದರೆ, ಸ್ವಲ್ಪ ಹಣವನ್ನು ಶೇರು ಮಾರುಕಟ್ಟೆಯಲ್ಲಿ ಹೂಡಬಹುದು. ದೇಶದ ನೀತಿಯೂ ಇವಿ ಪರವಾಗಿಯೇ ಇರುವುದರಿಂದ ಲಾಭ ನಿಶ್ಚಿತ. ಕಮ್ಮಿ ಬೆಲೆಗೆ ಶೇರು ಸಿಗುತ್ತೆ ಅಂತ ಹೊಸ ಸ್ಟಾರ್ಟಪ್ಗಳ ಮೇಲೆ ಹೂಡುವ ಬದಲು ಸ್ವಲ್ಪ ದುಬಾರಿ ಆದರೂ ಮಾರುಕಟ್ಟೆಯಲ್ಲಿ ಪಳಗಿರುವ ಕಂಪೆನಿಗಳಲ್ಲಿ ಹೂಡಿದರೆ ಉತ್ತಮ. ಅಂತಹ ಕಂಪೆನಿಗಳು ಏಕಾಏಕಿ ಮುಳುಗಿ ಹೋಗುವುದಿಲ್ಲ. ಹೀಗಾಗಿ ಸ್ವಲ್ಪ ಸಮಸಯದ ನಂತರ ಆದರೂ ಲಾಭ ದಕ್ಕಿಯೇ ದಕ್ಕುತ್ತದೆ.