ರೋಮ್: ಕರೊನಾ ವೈರಸ್ ಹಾವಳಿಯಿಂದ ಕಂಗೆಟ್ಟಿದ್ದ ವಿಶ್ವ ಫುಟ್ಬಾಲ್ ಪ್ರೇಮಿಗಳಿಗೆ ಪ್ರತಿಷ್ಠಿತ ಯುರೋ ಕಪ್ ಟೂರ್ನಿಯ ಮೊದಲ ಪಂದ್ಯವೇ ರೋಚಕತೆಗೆ ಸಾಕ್ಷಿಯಾಯಿತು. ಕಡೇ ಐದು ವರ್ಷಗಳಲ್ಲಿ ಮೊದಲ ಬಾರಿಗೆ ಪ್ರತಿಷ್ಠಿತ ಟೂರ್ನಿಯಲ್ಲಿ ಆಡುತ್ತಿರುವ ಇಟಲಿ ತಂಡ 3-0 ಯಿಂದ ಟರ್ಕಿ ತಂಡವನ್ನು ಮಣಿಸಿ ಟೂರ್ನಿಯಲ್ಲಿ ಶುಭಾರಂಭ ಕಂಡಿತು. 58 ವರ್ಷಗಳ ಬಳಿಕ 2018ರ ಫಿಫಾ ವಿಶ್ವಕಪ್ಗೆ ಅರ್ಹತೆಗಿಟ್ಟಿಸಿಕೊಳ್ಳಲು ವಿಫಲವಾಗಿದ್ದ ಇಟಲಿ ತಂಡ ಭರ್ಜರಿ ಗೆಲುವಿನೊಂದಿಗೆ ಸಂಭ್ರಮಿಸಿತು. ವಿಶ್ವಕಪ್ ಅರ್ಹತೆಗೆ ಇದುವರೆಗೂ ಆಡಿರುವ 10 ಪಂದ್ಯಗಳಲ್ಲೂ ಗೆಲುವು ಕಂಡಿರುವ ಇಟಲಿ ತಂಡ ಯುರೋ ಕಪ್ ಟೂರ್ನಿಯಲ್ಲಿ ಭರ್ಜರಿ ಆರಂಭ ಕಂಡಿತು. ಜತೆಗೆ ಇಟಲಿ ತಂಡ ಸತತ 28ನೇ ಪಂದ್ಯದಲ್ಲಿ ಅಜೇಯ ಸಾಧನೆ ಮಾಡಿತು.
ಇದನ್ನೂ ಓದಿ: ಟ್ವೀಟ್ ವಿವಾದದ ಸುಳಿಯಲ್ಲಿ ಇಂಗ್ಲೆಂಡ್ನ ಸ್ಟಾರ್ ಕ್ರಿಕೆಟಿಗರು ; ಐಪಿಎಲ್ ಆಡುವಾಗಲೇ ಭಾರತೀಯರನ್ನು ಅಣಕಿಸಿದ್ದ ಜೋಡಿ
1968ರ ಚಾಂಪಿಯನ್ ಇಟಲಿ ತಂಡ ಯುರೋ ಕಪ್ನಲ್ಲಿ ಮೊದಲ ಬಾರಿಗೆ 2ಕ್ಕಿಂತ ಹೆಚ್ಚಿನ ಗೋಲು ಸಿಡಿಸಿದ ಸಾಧನೆ ಮಾಡಿತು. ಕೋವಿಡ್ನಿಂದಾಗಿ ಮುನ್ನೆಚ್ಚರಿಕೆ ಶೇಕಡ 25 ಪ್ರೇಕ್ಷಕರಿಗಷ್ಟೇ ಅವಕಾಶ ನೀಡಲಾಗಿತ್ತು. ಸ್ಟೇಡಿಯೊ ಒಲಿಂಪಿಕೊ ಸ್ಟೇಡಿಯಂನಲ್ಲಿ ಸುಮಾರು 16 ಸಾವಿರ ಪ್ರೇಕ್ಷಕರ ಸಮ್ಮುಖದಲ್ಲಿ ನಡೆದ ಎ ಗುಂಪಿನ ಕಾದಾಟದಲ್ಲಿ ಇಟಲಿ ತಂಡ ಮೇಲುಗೈ ಸಾಧಿಸಿತು. ಮೊದಲಾರ್ಧದಲ್ಲಿ ಇಟಲಿ ತಂಡಕ್ಕೆ ಗೋಲು ದಾಖಲಿಸಲು 13 ಅವಕಾಶಗಳು ದಕ್ಕಿದರೆ, ಟರ್ಕಿಗೆ ಏಕೈಕ ಅವಕಾಶವೂ ಲಭಿಸಲಿಲ್ಲ. ಒಟ್ಟಾರೆ ಇಟಲಿ ತಂಡಕ್ಕೆ 24 ಹಾಗೂ ಟರ್ಕಿಗೆ 3 ಅವಕಾಶಗಳು ದಕ್ಕಿದವು. ಈ ಪೈಕಿ ಇಟಲಿ ತಂಡ 3 ಅವಕಾಶಗಳನ್ನು ಗೋಲಾಗಿ ಪರಿವರ್ತಿಸಿದರೆ, ಟರ್ಕಿ ಏಕೈಕ ಗೋಲು ದಾಖಲಿಸಲು ವಿಫಲವಾಯಿತು. ಪಂದ್ಯದ ಮೊದಲಾರ್ಧದಲ್ಲಿ ಉಭಯ ತಂಡಗಳು ಗೋಲು ರಹಿತ ಸಮಬಲ ಸಾಧಿಸಿದ್ದರೆ, ದ್ವೀತಿಯಾರ್ಧದ ಆರಂಭಿಕದಲ್ಲೇ ಟರ್ಕಿ ತಂಡದ ಮೆಹಿಹ ಡೆಮಿರಲ್ (53ನೇ ನಿಮಿಷ) ಸ್ವಗೋಲಿನ ಮೂಲಕ ಇಟಲಿ ತಂಡಕ್ಕೆ ಗೋಲುಬಿಟ್ಟುಕೊಟ್ಟರು. ಸಿರೊ ಇಮ್ಮೊಬೈಲ್ (66) ಹಾಗೂ ಲೊರೆನ್ಜೊ ಇನ್ಸೈಗ್ನೆ (79) ತಲಾ ಒಂದು ಗೋಲು ದಾಖಲಿಸಿ ತಂಡದ ಗೆಲುವಿನ ಅಂತರವನ್ನು ಹಿಗ್ಗಿಸಿದರು.
ಇಂದಿನ ಪಂದ್ಯಗಳು:
ಇಂಗ್ಲೆಂಡ್ -ಕ್ರೋವೆಷಿಯಾ
ಆರಂಭ: ಸಂಜೆ: 6.30ಕ್ಕೆ
ಎಲ್ಲಿ : ಲಂಡನ್ (ವೆಂಬ್ಲೆ ಸ್ಟೇಡಿಯಂ)
—–
ಆಸ್ಟ್ರಿಯಾ-ಉತ್ತರ ಮೆಸಡೋನಿಯಾ
ಆರಂಭ: ರಾತ್ರಿ 9.30ಕ್ಕೆ
ಎಲ್ಲಿ: ಅರೆನಾ ನ್ಯಾಷನಲ್
————-
ನೆದರ್ಲೆಂಡ್ಸ್-ಉಕ್ರೇನ್
ಆರಂಭ: ರಾತ್ರಿ 12.30ಕ್ಕೆ
ಎಲ್ಲಿ: ಆಮ್ರ್ಸ್ಟರ್ಡ್ಯಾಂ ಅರೆನಾ