ಸೌಥಾಂಪ್ಟನ್: ಸರಣಿಯಲ್ಲಿ ಸೋತರೂ ಛಲ ಬಿಡದೆ ಹೋರಾಡಿದ ಪ್ರವಾಸಿ ಐರ್ಲೆಂಡ್ ತಂಡ 3ನೇ ಹಾಗೂ ಅಂತಿಮ ಏಕದಿನ ಪಂದ್ಯದಲ್ಲಿ 7 ವಿಕೆಟ್ಗಳಿಂದ ಏಕದಿನ ವಿಶ್ವಚಾಂಪಿಯನ್ ಇಂಗ್ಲೆಂಡ್ ತಂಡವನ್ನು ಸೋಲಿಸಿತು. ಇಂಗ್ಲೆಂಡ್ ನೀಡಿದ್ದ 328 ರನ್ ಬೆನ್ನಟ್ಟುವ ಮೂಲಕ ಐರ್ಲೆಂಡ್ ತಂಡ, ಆಂಗ್ಲರ ನೆಲದಲ್ಲಿ ಪ್ರವಾಸಿ ತಂಡವೊಂದು ಅತಿಹೆಚ್ಚು ರನ್ ಚೇಸಿಂಗ್ ಮಾಡಿದ ತಂಡ ಎನಿಸಿಕೊಂಡಿತು. 18 ವರ್ಷಗಳಿಂದ ಭಾರತದ ಹೆಸರಿನಲ್ಲಿದ್ದ ದಾಖಲೆಯನ್ನು ಐರ್ಲೆಂಡ್ ಹಿಂದಿಕ್ಕಿತು. 2002ರ ನಾಟ್ವೆಸ್ಟ್ ಸರಣಿ ಫೈನಲ್ನಲ್ಲಿ ಭಾರತ 326 ರನ್ ಬೆನ್ನಟ್ಟಿದ್ದು ಇದುವರೆಗಿನ ಅತಿದೊಡ್ಡ ಚೇಸಿಂಗ್ ಮೊತ್ತವಾಗಿತ್ತು.
ಇದನ್ನೂ ಓದಿ: ಯುಎಇಯಲ್ಲಿ ಜೈವಿಕ-ಸುರಕ್ಷೆ ಉಲ್ಲಂಘಿಸುವ ಕ್ರಿಕೆಟಿಗರಿಗೆ 7 ದಿನ ಕ್ವಾರಂಟೈನ್!
ರಿ ರೋಸ್ ಬೌಲ್ ಸ್ಟೇಡಿಯಂನಲ್ಲಿ ಮಂಗಳವಾರ ನಡೆದ ಐಸಿಸಿ ಕ್ರಿಕೆಟ್ ಏಕದಿನ ವಿಶ್ವಕಪ್ ಸೂಪರ್ ಸಿರೀಸ್ ಪಂದ್ಯದಲ್ಲಿ ಮೊದಲು ಬ್ಯಾಟಿಂಗ್ ಮಾಡಿದ ಇಂಗ್ಲೆಂಡ್, ಏವೊಯಿನ್ ಮಾರ್ಗನ್ (106 ರನ್, 84 ಎಸೆತ, 15 ಬೌಂಡರಿ, 4 ಸಿಕ್ಸರ್) ಸ್ಫೋಟಕ ಬ್ಯಾಟಿಂಗ್ ನಡುವೆಯೂ ಇಂಗ್ಲೆಂಡ್ 49.5 ಓವರ್ಗಳಲ್ಲಿ 328 ರನ್ಗಳಿಗೆ ಸರ್ವಪತನ ಕಂಡಿತು. ಪ್ರತಿಯಾಗಿ ಐರ್ಲೆಂಡ್ ತಂಡ, ಪೌಲ್ ಸ್ಟರ್ಲಿಂಗ್ (142 ರನ್, 128 ಎಸೆತ, 9 ಬೌಂಡರಿ, 6 ಸಿಕ್ಸರ್) ಹಾಗೂ ನಾಯಕ ಆಂಡಿ ಬಲ್ಬಿರ್ನಿ (113ರನ್, 112 ಎಸೆತ, 12 ಬೌಂಡರಿ) ಜೋಡಿ 2ನೇ ವಿಕೆಟ್ಗೆ ಪೇರಿಸಿದ 214 ರನ್ ಫಲವಾಗಿ 49.5 ಓವರ್ಗಳಲ್ಲಿ 3 ವಿಕೆಟ್ಗೆ 329 ರನ್ಗಳಿಸಿ ಗೆಲುವಿನ ನಗೆ ಬೀರಿತು. 3 ಪಂದ್ಯಗಳ ಸರಣಿಯಲ್ಲಿ ಇಂಗ್ಲೆಂಡ್ 2-1 ರಿಂದ ಗೆದ್ದುಕೊಂಡಿತು. 2015ರ ವಿಶ್ವಕಪ್ ಬಳಿಕ ಐರ್ಲೆಂಡ್ ತಂಡ ಮೊದಲ ಬಾರಿಗೆ ಬಲಿಷ್ಠ ತಂಡದ ಎದುರು ಗೆಲುವು ದಾಖಲಿಸಿತು.
ಇದನ್ನೂ ಓದಿ: ಐಪಿಎಲ್ಗೆ ಅನುಕೂಲ ಮಾಡಿಕೊಟ್ಟ ಆಸೀಸ್
2002ರಲ್ಲಿ ಲಂಡನ್ನ ಲಾರ್ಡ್ಸ್ನಲ್ಲಿ ನಡೆದ ಪಂದ್ಯದಲ್ಲಿ ಯುವರಾಜ್ ಸಿಂಗ್ (69) ಹಾಗೂ ಮೊಹಮದ್ ಕೈಫ್ (87) ಜೋಡಿಯ ಅಬ್ಬರದ ಬ್ಯಾಟಿಂಗ್ ಲವಾಗಿ ಭಾರತ ಜಯ ದಾಖಲಿಸಿತ್ತು. ಅಂದು ಯುವರಾಜ್ ಸಿಂಗ್- ಕೈಫ್ ಬ್ಯಾಟಿಂಗ್ ಮಾದರಿಯಲ್ಲೇ ಮಂಗಳವಾರ ಪೌಲ್ ಸ್ಟರ್ಲಿಂಗ್ ಹಾಗೂ ಆಂಡಿ ಬಲ್ಬಿರ್ನಿ ಜೋಡಿ ಬಿರುಸಿನ ಬ್ಯಾಟಿಂಗ್ ಮೂಲಕ ಗಮನಸೆಳೆಯಿತು.
2: ಇಂಗ್ಲೆಂಡ್ ಎದುರು ಐರ್ಲೆಂಡ್ ತಂಡಕ್ಕೆ 2ನೇ ಗೆಲುವು ಇದಾಗಿದೆ. ಇದಕ್ಕೂ ಮೊದಲು 2011ರಲ್ಲಿ ಬೆಂಗಳೂರಿನಲ್ಲಿ ನಡೆದ ಏಕದಿನ ವಿಶ್ವಕಪ್ ಟೂರ್ನಿ ಪಂದ್ಯದಲ್ಲಿ ಐರ್ಲೆಂಡ್ ಮೊದಲ ಬಾರಿಗೆ ಜಯ ದಾಖಲಿಸಿತ್ತು. ಆ ಪಂದ್ಯದಲ್ಲೂ ಐರ್ಲೆಂಡ್ 329 ರನ್ ಗಳಿಸಿತ್ತು. ಕೆವಿನ್ ಓಬ್ರಿಯಾನ್ 113 ರನ್ ಗಳಿಸಿ ತಂಡದ ಗೆಲುವಿನಲ್ಲಿ ಪ್ರಮುಖ ಪಾತ್ರವಹಿಸಿದ್ದರು
ಇಂಗ್ಲೆಂಡ್: 49. 5 ಓವರ್ ಗಳಲ್ಲಿ 328 (ಏವೊಯಿನ್ ಮಾರ್ಗನ್ 106, ಬ್ಯಾಂಟನ್ 58, ಡೇವಿಡ್ ವಿಲ್ಲಿ 51, ಟಾಮ್ ಕರನ್ 38, ಕ್ರೇಗ್ ಯಂಗ್ 53ಕ್ಕೆ 3, ಲಿಟ್ಟಲ್ 62ಕ್ಕೆ 2, ಕಟಿರ್ಸ್ ಕ್ಯಾಂಪರ್ 68ಕ್ಕೆ 2), ಐರ್ಲೆಂಡ್: 49.5 ಓವರ್ಗಳಲ್ಲಿ 3 ವಿಕೆಟ್ಗೆ 329 (ಪೌಲ್ ಸ್ಟರ್ಲಿಂಗ್ 142, ಆಂಡಿ ಬಲ್ಬಿರ್ನಿ 113, ಡೇವಿಡ್ ವಿಲ್ಲಿ 70ಕ್ಕೆ 1, ಆದಿಲ್ ರಶೀದ್ 61ಕ್ಕೆ 1).