ಮುಂಬೈ: ಪಠಾಣ್ ಮತ್ತು ಜವಾನ್ ಸಿನಿಮಾದ ಯಶಸ್ಸಿನ ಅಲೆಯಲ್ಲಿರುವ ಬಾಲಿವುಡ್ ಬಾದ್ಷಾ ಶಾರುಖ್ ಖಾನ್, ತಮ್ಮ ಮುಂದಿನ ಸಿನಿಮಾ “ಡಂಕಿ”ಗಾಗಿ ಎದುರು ನೋಡುತ್ತಿದ್ದಾರೆ. ಅಭಿಮಾನಿಗಳು ಕೂಡ ಕಾತರದಿಂದ ಕಾಯುತ್ತಿದ್ದಾರೆ. ರಾಜ್ಕುಮಾರ್ ಹಿರಾನಿ ನಿರ್ದೇಶನ ಡಂಕಿ ಸಿನಿಮಾ, ಡಿ.21ರಂದು ಬಿಡುಗಡೆಯಾಗಲಿದ್ದು, ಈಗಾಗಲೇ ಟ್ರೈಲರ್ನಿಂದಲೇ ಸಿನಿಮಾ ಸಾಕಷ್ಟು ಸದ್ದು ಮಾಡುತ್ತಿದೆ.
“ಡಂಕಿ” ಎಂಬ ಪದವೇ ತುಂಬಾ ವಿಚಿತ್ರವಾಗಿದ್ದರೂ ಅದರ ಹಿಂದೆ ಒಂದು ರೋಚಕ ಕಹಾನಿಯೇ ಅಡಗಿದೆ. ಈ ರೀತಿಯೂ ಒಂದು ಪದವಿದೆಯೇ ಎಂಬುದು ಬಹುತೇಕರಿಗೆ ಈ ಸಿನಿಮಾ ಹೆಸರು ಘೋಷಣೆಯಾದಾಗಲೇ ಗೊತ್ತಾಗಿದ್ದು. ಅಷ್ಟಕ್ಕೂ ಈ ಡಂಕಿ ಹೆಸರನ್ನು ಏಕೆ ಇಟ್ಟರು ಎಂಬುದಕ್ಕೆ ಕಾರಣ ಇದೆ ಮತ್ತು ಈ ಸಿನಿಮಾದ ಕತೆಯೂ ಕೂಡ ಇದಕ್ಕೆ ಲಿಂಕ್ ಆಗಿದೆ. ಹಾಗಾದರೆ ಡಂಕಿ ಹಿಂದಿರುವ ಅಸಲಿ ವಿಚಾರ ಏನು ಎಂಬುದನ್ನು ನಾವೀಗ ತಿಳಿದುಕೊಳ್ಳೋಣ.
“ಡಾಂಕಿ ಫ್ಲೈಟ್” ಎಂದು ಕರೆಯಲ್ಪಡುವ ವಿಶೇಷ ಪರಿಕಲ್ಪನೆಯ ಸುತ್ತ ಶಾರುಖ್ ಸಿನಿಮಾ ಸುತ್ತುತ್ತದೆ. ಡಾಂಕಿ ಫ್ಲೈಟ್ ಅಂದರೆ ಅಮೆರಿಕ ಮತ್ತು ಕೆನಡಾ ಸೇರಿದಂತೆ ಇತರೆ ದೇಶಗಳಿಗೆ ತೆರಳಲು ಅಕ್ರಮ ವಲಸಿಗರು ಹೆಚ್ಚಾಗಿ ಬಳಸುವ ಮಾರ್ಗವಾಗಿದೆ. ಉತ್ತಮವಾದ ಜೀವನ ಕಂಡುಕೊಳ್ಳಲು ತುಂಬಾ ಕಷ್ಟ ಪಡುವ ವ್ಯಕ್ತಿಯ ಜೀವನದ ಮೇಲೆ ಡಂಕಿ ಸಿನಿಮಾ ಬೆಳಕು ಚೆಲ್ಲುತ್ತದೆ ಎಂದು ಹೇಳಲಾಗಿದೆ.
ಡಾಂಕಿ ಫ್ಲೈಟ್ ಎಂಬುದು ಪ್ರತೀ ವರ್ಷ ಸಾವಿರಾರು ಯುವಕರು ಬಳಸುವ ಒಂದು ಪ್ರಮುಖ ವಿಧಾನವಾಗಿದೆ. ತಮ್ಮಿಷ್ಟದ ದೇಶವನ್ನು ಕಾನೂನುಬದ್ಧ ಮಾರ್ಗದ ಮೂಲಕ ತಲುಪಲು ವಿಫಲವಾದಾಗ ಈ ವಿಧಾನವವನ್ನು ಆಯ್ಕೆ ಮಾಡಿಕೊಳ್ಳುತ್ತಾರೆ. ಅಮೆರಿಕ, ಇಂಗ್ಲೆಂಡ್ ಮತ್ತು ಕೆನಡಾ ದೇಶಗಳಿಗೆ ಹೆಚ್ಚಾಗಿ ಅಕ್ರಮವಾಗಿ ವಲಸೆ ಹೋಗುತ್ತಾರೆ. ಭಾರತೀಯ ಯುವಕರು ಹೆಚ್ಚಿನ ಸಂಖ್ಯೆಯಲ್ಲಿ ಈ ವಿಧಾನವನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದಾರೆ. ಇದಕ್ಕಾಗಿ ಏಜೆಂಟ್ಗಳು ಕೂಡ ಇದ್ದಾರೆ ಎಂಬುದು ಸೋಜಿಗದ ಸಂಗತಿ.
ಇನ್ನು ಡಂಕಿ ಸಿನಿಮಾದ ಕತೆ ಕೆನಡಾಗೆ ವಲಸೆ ಹೋಗುವ ಪಂಜಾಬಿ ಯುವಕನೊಬ್ಬ ಸಾಹಸಮಯ ಪ್ರಯಾಣದ ಸುತ್ತ ಸುತ್ತುತ್ತದೆ ಎಂದು ಹೇಳಲಾಗಿದೆ. ಆದರೆ, ಇತ್ತೀಚಿನ ವರದಿಗಳ ಪ್ರಕಾರ ಈ ಸಿನಿಮಾ ವಲಸೆಯ ಸಮಸ್ಯೆಗಳು ಅಂದರೆ ಡಾಂಕಿ ಫ್ಲೈಟ್ ಸುತ್ತ ಸುತ್ತಿದರೂ ಕೆನಡಾಕ್ಕೆ ವಲಸೆ ಹೋಗುತ್ತಿರುವ ಭಾರತೀಯರಿಗೂ ಇದಕ್ಕೂ ಯಾವುದೇ ಸಂಬಂಧವಿಲ್ಲ ಎಂದು ಹೇಳಲಾಗಿದೆ. ಉತ್ತಮ ಜೀವನವನ್ನು ಕಂಡುಕೊಳ್ಳಲು ಪ್ರಯತ್ನಿಸುವ ಮನುಷ್ಯನ ಪ್ರಯಾಣದ ಜತೆಗೆ ಬಹಳಷ್ಟು ಭಾವನೆಗಳನ್ನು ಒಳಗೊಂಡಿರುವ ಈ ಚಿತ್ರವು ಅನೇಕ ಭಾವುಕ ಸನ್ನಿವೇಶಗಳಿಗೆ ಸಾಕ್ಷಿಯಾಗಲಿದೆ ಎಂದು ಹೇಳಲಾಗುತ್ತದೆ.
ಈ ಸಿನಿಮಾದಲ್ಲಿ ಶಾರುಖ್ ಖಾನ್ ಜತೆಗೆ ನಟಿ ತಾಪ್ಪಿ ಪನ್ನು ಪ್ರಮುಖ ಪಾತ್ರದಲ್ಲಿ ನಟಿಸಿದ್ದಾರೆ. ನಟ ವಿಕ್ಕಿ ಕೌಶಲ್ ಗೆಸ್ಟ್ ರೋಲ್ ಮಾಡಿದ್ದಾರೆ. ಸಂಜು ಸಿನಿಮಾದ ಬ್ಲಾಕ್ ಬಸ್ಟರ್ ಸಕ್ಸಸ್ ಬಳಿಕ ನಿರ್ದೇಶಕ ರಾಜ್ಕುಮಾರ್ ಹಿರಾನಿ ಅವರು ಡಂಕಿ ಸಿನಿಮಾವನ್ನು ನಿರ್ದೇಶಿಸಿದ್ದಾರೆ. ಡಂಕಿ ಸಿನಿಮಾದ ಕತೆ ನೋಡಿದರೆ, ಈ ಸಿನಿಮಾವೂ ಕೂಡ ಸೂಪರ್ ಹಿಟ್ ಆಗುವ ಲಕ್ಷಣಗಳು ಕಾಣುತ್ತಿವೆ. ಡಿ. 21ಕ್ಕೆ ಸಿನಿಮಾ ತೆರೆಕಾಣಲಿದ್ದು, ಯಾವ ರೀತಿ ದಾಖಲೆಗಳನ್ನು ಬರೆಯಲಿದೆ ಎಂಬುದನ್ನು ಕಾದು ನೋಡಬೇಕಿದೆ. (ಏಜೆನ್ಸೀಸ್)
ಮನೆಯಲ್ಲಿ ಹೆಚ್ಚಾದ ಊಟದ ವೆಚ್ಚ! ವೆಜ್ಗೆ ಹೋಲಿಸಿದರೆ ನಾನ್ವೆಜ್ ಕಡಿಮೆ, ಕಾರಣ ಹೀಗಿದೆ…
ಹಸಿ ಮಾಂಸ ಆರೋಗ್ಯಕ್ಕೆ ಒಳ್ಳೆಯದಾ? ಸೋಶಿಯಲ್ ಮೀಡಿಯಾ ಸ್ಟಾರ್ಗಳ ವಾದಕ್ಕೆ ತಜ್ಞರ ಉತ್ತರವೇನು?