ಸುಳ್ಯ -ಮಡಿಕೇರಿ ರಸ್ತೆಯಲ್ಲಿ ಭಾರಿ ವಾಹನ ಸಂಚಾರ ನಿಷೇಧ

ಸುಳ್ಯ: ಧಾರಾಕಾರ ಮಳೆಗೆ ಮಾಣಿ-ಮೈಸೂರು ಹೆದ್ದಾರಿಯ ಕೊಯನಾಡು ಗಣಪತಿ ದೇವಾಲಯ ಬಳಿಯ ಸೇತುವೆ ಹಾಗೂ ಕೊಯನಾಡು -ದೇವರಕೊಲ್ಲಿ ಮಧ್ಯೆ ರಸ್ತೆಯಲ್ಲಿ ಭಾರಿ ಪ್ರಮಾಣದ ಬಿರುಕು ಬಿಟ್ಟ ಹಿನ್ನೆಲೆಯಲ್ಲಿ ಸುಳ್ಯ -ಮಡಿಕೇರಿ ರಸ್ತೆಯಲ್ಲಿ ಭಾರಿ ವಾಹನಗಳ ಸಂಚಾರ ನಿಷೇಧಿಸಿ ಕೊಡಗು ಜಿಲ್ಲಾಧಿಕಾರಿ ಡಾ.ಸತೀಶ್ ಆದೇಶ ಹೊರಡಿಸಿದ್ದಾರೆ.
ನೀರಿನ ಸೆಳೆತದಿಂದ ಸುಳ್ಯ -ಮಡಿಕೇರಿ ರಸ್ತೆಯ ಕೊಯನಾಡಿನ ಗಣಪತಿ ದೇವಾಲಯ ಬಳಿಯಿರುವ ಸೇತುವೆಯ ಎರಡೂ ಬದಿಯ ಮಣ್ಣು ದಿನದಿಂದ ದಿನಕ್ಕೆ ಕುಸಿಯುತ್ತಿದ್ದು, ಈ ಪ್ರದೇಶದಲ್ಲಿ ಮುಂಜಾಗ್ರತಾ ಕ್ರಮವಾಗಿ ಮರಳು ಚೀಲ ಇರಿಸಲಾಗಿದೆ. ಈ ರಸ್ತೆಯಲ್ಲೇ ಭಾರಿ ಗಾತ್ರದ ಲಾರಿ, ಟ್ಯಾಂಕರ್, ಕಂಟೇನರ್‌ಗಳ ಸಂಚಾರವನ್ನೂ ನಿಷೇಧಿಸಲಾಗಿದೆ. ಕೇವಲ ದ್ವಿಚಕ್ರ ವಾಹನ, ಕಾರು ಹಾಗೂ ಬಸ್‌ಗಳಿಗೆ ಮಾತ್ರ ಸಂಚಾರಕ್ಕೆ ಅವಕಾಶ ಕಲ್ಪಿಸಲಾಗಿದೆ. ಇದರಿಂದ ಗುರುವಾರ ಬೆಳಗ್ಗೆ ಸಂಪಾಜೆ ಗೇಟ್ ಬಳಿಯಲ್ಲಿ ಅನೇಕ ಘನ ವಾಹನಗಳು ಸಾಲುಗಟ್ಟಿ ನಿಲ್ಲುವಂತಾಗಿದೆ.