ವಾಷಿಂಗ್ಟನ್ ಡಿಸಿ: ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಮಾಧ್ಯಮಗಳ ವಿರುದ್ಧ ತೀವ್ರ ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ನನ್ನಷ್ಟು ಶ್ರಮ ವಹಿಸಿ ಕೆಲಸ ಮಾಡುವ ಅಧ್ಯಕ್ಷ ಅಮೆರಿಕ ಇತಿಹಾಸದಲ್ಲಿಯೇ ಯಾರೂ ಇರಲಿಲ್ಲ ಎಂದು ಟ್ವೀಟ್ ಮೂಲಕ ಹೇಳಿದ್ದಾರೆ. ಅಲ್ಲದೆ, ಮಾಧ್ಯಮಗಳಿಗೆ ಪ್ರಜಾಪ್ರಭುತ್ವ ಮಾದರಿಯಲ್ಲಿ ಮಾತನಾಡುವ ಸಂಪೂರ್ಣ ಅಧಿಕಾರ ಕೊಡಲಾಗಿದೆ. ಆದರೆ ಅವರು ಯಾವುದೇ ವಿಷಯಗಳ ಬಗ್ಗೆ ಸರಿಯಾಗಿ ಅನ್ವೇಷಣೆ ಮಾಡದೆ, ಅಳುಕಿಲ್ಲದೆ ಮಾತನಾಡುತ್ತಾರೆ ಎಂದು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ.
ಅಧ್ಯಕ್ಷ ಟ್ರಂಪ್ ಅವರು ಸರಣಿ ಟ್ವೀಟ್ ಮಾಡಿದ್ದಾರೆ. ಅಮೆರಿಕ ಜನರಿಗೆ ನನ್ನ ಬಗ್ಗೆ ಗೊತ್ತು. ಹಾಗೇ ಅವರಿಗೆ ಇಲ್ಲಿನ ಇತಿಹಾಸವೂ ತಿಳಿದಿದೆ. ನನ್ನಷ್ಟು ಕಠಿಣ ಶ್ರಮ ವಹಿಸಿ ಕೆಲಸ ಮಾಡುವ ಅಧ್ಯಕ್ಷ ಅಮರಿಕ ಇತಿಹಾಸದಲ್ಲಿಯೇ ಇಲ್ಲ. ಈ ಹಿಂದೆ ಆಡಳಿತ ನಡೆಸಿದ್ದ ಅಧ್ಯಕ್ಷರು ಮಾಡಿದ ಅಭಿವೃದ್ಧಿ ಕೆಲಸಗಳಿಗಿಂತ ಅತಿ ಹೆಚ್ಚು ಕೆಲಸವನ್ನು ನಾನು ಅಧಿಕಾರಕ್ಕೆ ಬಂದ ಮೊದಲ ಮೂರುವರೆ ವರ್ಷದ ಅವಧಿಯಲ್ಲೇ ಮಾಡಿದ್ದೇನೆ. ಆದರೆ ಕೆಲವು ಮಾಧ್ಯಮಗಳ ಸುಳ್ಳು ಸುದ್ದಿಗಳು ಈ ಸತ್ಯವನ್ನು ದ್ವೇಷಿಸಿ, ಮರೆಮಾಚುತ್ತಿವೆ ಎಂದಿದ್ದಾರೆ.
ನಾನು ಮುಂಜಾನೆಯಿಂದ ರಾತ್ರಿಯವರೆಗೆ ಕೆಲಸ ಮಾಡುತ್ತಿದ್ದೇನೆ. ಆದರೆ ನನ್ನ ಶೆಡ್ಯೂಲ್, ಊಟ-ತಿಂಡಿಯ ವಿಚಾರದ ಬಗ್ಗೆಗೆ ಕೆಲವು ಕಳಪೆ ಮಟ್ಟದ ವರದಿಗಾರರು ಸುಳ್ಳು ಬರೆಯುತ್ತಿದ್ದಾರೆ. ಅವರಿಗೆ ನನ್ನ ಬಗ್ಗೆ ಏನೇನೂ ಗೊತ್ತಿಲ್ಲದೆ ವರದಿ ಮಾಡುತ್ತಿದ್ದಾರೆ. ನನ್ನನ್ನು ಅವಮಾನ ಮಾಡಲು ಬರೆಯುತ್ತಿರುವ ವರದಿಗಳನ್ನು ನೋಡಿ, ನನ್ನ ಹತ್ತಿರದವರೇ ಆಶ್ಚರ್ಯ ವ್ಯಕ್ತಪಡಿಸುತ್ತಿದ್ದಾರೆ ಎಂದು ಟ್ರಂಪ್ ಹೇಳಿದ್ದಾರೆ.
ಇತ್ತೀಚೆಗೆ ಡೊನಾಲ್ಡ್ ಟ್ರಂಪ್ ಅವರು ಒಂದು ಹೇಳಿಕೆ ನೀಡಿದ್ದರು. ಕರೊನಾ ವೈರಸ್ ಪೀಡಿತರಿಗೆ ಕ್ರಿಮಿನಾಶಕಗಳನ್ನು ಇಂಜೆಕ್ಟ್ (ಚುಚ್ಚುಮದ್ದು) ಮಾಡಬಹುದು. ಅದರಿಂದ ಕರೊನಾವನ್ನು ಕೊಲ್ಲಬಹುದು ಎಂದು ಹೇಳಿದ್ದರು. ಈ ಹೇಳಿಕೆ ಸಿಕ್ಕಾಪಟೆ ವಿವಾದ ಸೃಷ್ಟಿಸಿತ್ತು. ಬಹುತೇಕ ಮಾಧ್ಯಮಗಳು ಡೊನಾಲ್ಡ್ ಟ್ರಂಪ್ ಅವರ ಬಗ್ಗೆ ವ್ಯಂಗ್ಯವಾಗಿ ವರದಿ ಮಾಡಿದ್ದವು. ಸಾಮಾಜಿಕ ಜಾಲತಾಣಗಳಲ್ಲೂ ಟ್ರಂಪ್ ಟೀಕೆಗೆ ಗುರಿಯಾಗಿದ್ದರು.
ಅದಾದ ಬಳಿಕ ವೈಟ್ಹೌಸ್ನಿಂದ ಒಂದು ಪತ್ರಿಕಾ ಪ್ರಕಟಣೆ ಬಿಡುಗಡೆ ಮಾಡಿ, ಡೊನಾಲ್ಡ್ ಟ್ರಂಪ್ ಅವರ ಹೇಳಿಕೆಯನ್ನು ತಿರುಚಲಾಗಿದೆ ಎನ್ನಲಾಗಿತ್ತು. ಹಾಗೇ ಟ್ರಂಪ್ ಅವರೂ ಕೂಡ, ತಮ್ಮನ್ನು ಬೇಕೆಂದೇ ವ್ಯಂಗ್ಯ ಮಾಡಲಾಗುತ್ತದೆ ಎಂದು ಹೇಳಿದ್ದರು.
ಆದರೂ ಅಮೆರಿಕದ ಹಲವು ಮಾಧ್ಯಮಗಳು ಡೊನಾಲ್ಡ್ ಟ್ರಂಪ್ ಅವರನ್ನು ತೀವ್ರ ಟೀಕೆ ಮಾಡಿ, ವರದಿ ಮಾಡುತ್ತಿವೆ. ಇದರಿಂದ ರೋಸಿ ಹೋದ ಟ್ರಂಪ್ ಸರಣಿ ಟ್ವೀಟ್ ಮೂಲಕ ಮಾಧ್ಯಮಗಳ ವಿರುದ್ಧ ಕಿಡಿ ಕಾರುತ್ತಿದ್ದಾರೆ.(ಏಜೆನ್ಸೀಸ್)
https://www.vijayavani.net/politician-locks-people-in-haunted-house-for-breaking-quarantine-rules/