ವಾಷಿಂಗ್ಟನ್: ಅಮರಿಕದ ಮಾಜಿ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ವರ್ಗೀಕೃತ ದಾಖಲೆಗಳ ಪ್ರಕರಣದಲ್ಲಿ ಸಿಲುಕಿದ್ದು, ಅವರ ವಿರುದ್ಧ ದೋಷಾರೋಪಣೆ ಹೊರಿಸಲಾಗಿದೆ. ವರ್ಗೀಕೃತ ಸರ್ಕಾರಿ ದಾಖಲೆಗಳನ್ನು ಮರಳಿಸದ ಮತ್ತು ವೈಟ್ಹೌಸ್ ತೊರೆದ ಬಳಿಕ ತಮ್ಮ ಫ್ಲೊರಿಡಾ ನಿವಾಸದಲ್ಲೇ ದಾಖಲೆಗಳನ್ನು ಉಳಿಸಿಕೊಳ್ಳುವ ಮೂಲಕ ಕಾನೂನಿನ ಪ್ರಕ್ರಿಯೆಗೆ ಅಡಚಣೆ ಉಂಟು ಮಾಡಿದ ಆರೋಪದ ಮೇಲೆ ಫೆಡರಲ್ ಗ್ರ್ಯಾಂಡ್ ಜ್ಯೂರಿ ಟ್ರಂಪ್ ವಿರುದ್ಧ ದೋಷಾರೋಪಣೆ ಹೊರಿಸಿದೆ.
76 ವರ್ಷದ ಟ್ರಂಪ್, ವರ್ಗೀಕೃತ ದಾಖಲೆಗಳನ್ನು ಅನಧಿಕೃತವೃಗಿ ತಮ್ಮ ಬಳಿಯೇ ಇಟ್ಟುಕೊಂಡಿರುವುದು, ತಪ್ಪು ಹೇಳಿಕೆಗಳನ್ನು ನೀಡಿರುವುದು ಮತ್ತು ಕಾನೂನಿಗೆ ಅಡಚಣೆ ಸೇರಿದಂತೆ 7 ಪ್ರಕರಣಗಳನ್ನು ಎದುರಿಸುತ್ತಿದ್ದಾರೆ. ಇದು ಟ್ರಂಪ್ ವಿರುದ್ಧದ ಎರಡನೇ ದೋಷಾರೋಪಣೆಯಾಗಿದೆ ಮತ್ತು ಮಾಜಿ ಅಧ್ಯಕ್ಷರ ಮೊದಲ ಫೆಡರಲ್ ದೋಷಾರೋಪಣೆಯಾಗಿದೆ. ಈ ಕ್ರಿಮಿನಲ್ ಪ್ರಕರಣವನ್ನು ಅಮೆರಿಕದ ಕಾನೂನು ವಿಭಾಗವೇ ಹೊರತಂದಿರುವುದರಿಂದ ಟ್ರಂಪ್ ಅವರಿಗೆ ಭಾರೀ ಪರಿಣಾಮ ಬೀರುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ. ಮುಂದಿನ ವರ್ಷ ಅಧ್ಯಕ್ಷೀಯ ಚುನಾವಣೆಯಲ್ಲಿ ರಿಪಬ್ಲಿಕನ್ ಪಕ್ಷದ ಅಭ್ಯರ್ಥಿಯಾಗಿರುವ ಟ್ರಂಪ್ಗೆ ವರ್ಗೀಕೃತ ಕಡತಗಳ ಪ್ರಕರಣ ಮುಳುವಾಗುವ ಸಾಧ್ಯತೆ ಇದೆ ಎಂಬ ಚರ್ಚೆ ನಡೆಯುತ್ತಿದೆ.
ಟ್ರಂಪ್ ಈಗಾಗಲೇ ನ್ಯೂಯಾರ್ಕ್ನಲ್ಲಿ ಮತ್ತೊಂದು ಕ್ರಿಮಿನಲ್ ಪ್ರಕರಣವನ್ನು ಎದುರಿಸುತ್ತಿದ್ದಾರೆ. ಇದೀಗ ಮತ್ತೊಂದು ಕ್ರಿಮಿನಲ್ ಪ್ರಕರಣ ಟ್ರಂಪ್ ಅವರನ್ನು ಸುತ್ತಿಕೊಂಡಿದೆ. ಈಗಾಗಲೇ 7 ಪ್ರಕರಣಗಳ ಸಂಬಂಧ ಮಂಗಳವಾರದ ಮೈಮಿ ನ್ಯಾಯಾಲಯದ ಮುಂದೆ ಹಾಜರಾಗುವಂತೆ ಟ್ರಂಪ್ಗೆ ಸಮನ್ಸ್ ಜಾರಿ ಮಾಡಿರುವ ಸಂಗತಿಯನ್ನು ಅವರ ಕಾನೂನು ತಂಡ ಗಮನಿಸಿದೆ.
ನಾನು ಅಮಾಯಕ ಎಂದ ಟ್ರಂಪ್
ಈ ಬಗ್ಗೆ ಪ್ರತಿಕ್ರಿಯೆ ನೀಡಿರುವ ಟ್ರಂಪ್, ಮೈಮಿಯಲ್ಲಿರುವ ಫೆಡರಲ್ ಕೋರ್ಟ್ ಹೌಸ್ ಮುಂದೆ ಮಂಗಳವಾರ ಹಾಜರಾಗುವಂತೆ ನನಗೆ ಸಮನ್ಸ್ ನೀಡಲಾಗಿದೆ. ನಾನೊಬ್ಬ ಅಮಾಯಕ ಎಂದು ಟ್ರೂಥ್ ಹೆಸರಿನ ಸಾಮಾಜಿಕ ಜಾಲತಾಣದಲ್ಲಿ ಬರೆದುಕೊಂಡಿದ್ದಾರೆ. ಅಮೆರಿಕದ ಮಾಜಿ ಅಧ್ಯಕ್ಷರಿಗೆ ಇಂತಹದ್ದೊಂದು ಸಂಗತಿ ಸಂಭವಿಸಬಹುದು ಎಂದು ನಾನು ಎಂದಿಗೂ ಊಹಿಸಲಿಲ್ಲ ಎಂದಿದ್ದಾರೆ. ಇದು ನಿಜಕ್ಕೂ ಯುನೈಟೆಡ್ ಸ್ಟೇಟ್ಸ್ ಆಫ್ ಅಮೆರಿಕದ ಕರಾಳ ದಿನವಾಗಿದೆ. ದೇಶವು ಕುಸಿತದೆಡೆಗೆ ಸಾಗುತ್ತಿದೆ. ಆದರೆ, ಆದರೆ ನಾವು ಅಮೆರಿಕವನ್ನು ಮತ್ತೆ ಶೇಷ್ಠವನ್ನಾಗಿಸುತ್ತೇವೆ ಎಂದು ಹಾಲಿ ಅಧ್ಯಕ್ಷ ಜೋ ಬೈಡೆನ್ ಅವರಿಗೆ ಟ್ರಂಪ್ ಟಾಂಗ್ ನೀಡಿದ್ದಾರೆ.
ಟ್ರಂಪ್ ವಿರುದ್ಧದ 7 ಪ್ರಕರಣಗಳು ಯಾವುವು?
ಎನ್ಡಿಐ (ಬೇಹುಗಾರಿಕೆ ಕಾಯಿದೆ) ಉದ್ದೇಶಪೂರ್ವಕ ತಡೆಹಿಡಿಯುವುದು, ನ್ಯಾಯಕ್ಕೆ ಅಡ್ಡಿಪಡಿಸುವ ಪಿತೂರಿ, ಕಡತಗಳು ಅಥವಾ ದಾಖಲೆಯನ್ನು ತಡೆಹಿಡಿಯುವುದು, ದಾಖಲೆಗಳನ್ನು ಮರೆಮಾಚುವುದು, ಫೆಡರಲ್ ತನಿಖೆಯಿಂದ ದಾಖಲೆಯನ್ನು ಮುಚ್ಚಿಡುವುದು, ಮರೆಮಾಚುವ ಸಂಚು ಮತ್ತು ಸುಳ್ಳು ಹೇಳಿಕೆಗಳು. ಈ ಪ್ರಕರಣಗಳಲ್ಲಿ ಟ್ರಂಪ್ ಅವರು ತಪ್ಪಿತಸ್ಥರೆಂದು ಸಾಬೀತಾದರೆ, ಗರಿಷ್ಠ 100 ವರ್ಷಗಳ ಜೈಲು ಶಿಕ್ಷೆ ಅನುಭವಿಸಬೇಕಾಗುತ್ತದೆ.
ಇದನ್ನೂ ಓದಿ: ಬೈದರು ಎಂಬ ಕಾರಣಕ್ಕೆ ಅಜ್ಜಿಯನ್ನು ಹತ್ಯೆ ಮಾಡಿದ ಮೊಮ್ಮಗ : ವೆಬ್ಸೀರೀಸ್ ಈತನಿಗೆ ಪ್ರೇರಣೆ..!
ಏನಿದು ವರ್ಗೀಕೃತ ದಾಖಲೆಗಳ ತನಿಖೆ?
ಟ್ರಂಪ್ ಅವರು ವೈಟ್ಹೌಸ್ ಅನ್ನು ತೊರೆಯುವಾಗ ಕೆಲವು ವರ್ಗೀಕೃತ ದಾಖಲೆಗಳನ್ನು ತಮ್ಮೊಂದಿಗೆ ತೆಗೆದುಕೊಂಡು ಹೋಗಿದ್ದಾರೆ ಎಂಬ ಆರೋಪವಿದೆ. ಈ ದಾಖಲೆಗಳನ್ನು ಟ್ರಂಪ್ ಅವರು ತಪ್ಪಾಗಿ ನಿರ್ವಹಿಸಿದ್ದಾರೆಯೇ ಎಂಬ ಬಗ್ಗೆ 2021 ರಲ್ಲಿ ಅಮೆರಿಕದ ನ್ಯಾಯಾಂಗ ಇಲಾಖೆ ತನಿಖೆಯನ್ನು ಪ್ರಾರಂಭಿಸಿತು. ಬಳಿಕ ತನಿಖಾಧಿಕಾರಿಗಳು ಫ್ಲೊರಿಡಾದ ಪಾಮ್ ಬೀಚ್ನಲ್ಲಿರುವ ಟ್ರಂಪ್ ಅವರ ಮಾರ್ ಎ ಲಾಗೋ ಎಸ್ಟೇಟ್ನಲ್ಲಿ ಸುಮಾರು 13 ಸಾವಿರ ದಾಖಲೆಗಳನ್ನು ವಶಪಡಿಸಿಕೊಂಡಿತು. ಎಲ್ಲ ವರ್ಗೀಕೃತ ದಾಖಲೆಗಳನ್ನು ಹಿಂದಿರುಗಿಸಿದ್ದೇವೆ ಎಂದು ಟ್ರಂಪ್ ಅವರ ವಕೀಲ ತಂಡ ಈ ಹಿಂದೆಯೇ ಹೇಳಿಕೆ ನೀಡಿದರೂ ವಶಪಡಿಸಿಕೊಂಡ ದಾಖಲೆಗಳಲ್ಲಿ ಸುಮಾರು 100 ದಾಖಲೆಗಳನ್ನು ವರ್ಗೀಕೃತ ಎಂದು ಗುರುತಿಸಲಾಯಿತು. (ಏಜೆನ್ಸೀಸ್)
1 ಲಕ್ಷ ರೂ. ಬೇಕಂತೆ! ವಿಡಿಯೋ ರೆಕಾರ್ಡ್ ಮಾಡಿದ್ದಕ್ಕೆ ಮಹಿಳಾ ಅಧಿಕಾರಿಯಿಂದ ಅನುಚಿತ ವರ್ತನೆ