ಬೆಂಗಳೂರು: ‘ಒನ್ ನೇಷನ್ ಒನ್ ಕಾರ್ಡ್’ ಪರಿಕಲ್ಪನೆಯಲ್ಲಿ ನ್ಯಾಷನಲ್ ಕಾಮನ್ ಮೊಬಿಲಿಟಿ ಕಾರ್ಡ್ (ಎನ್ಸಿಎಂಸಿ) ಪರಿಚಯಿಸಲಾಗಿದೆ. ನಮ್ಮ ಮೆಟ್ರೋ ಪ್ರಯಾಣಕ್ಕೆ ಬಳಸುವ ಜತೆಗೆ ಡೆಬಿಟ್ ಕಾರ್ಡ್ ಮಾದರಿಯಲ್ಲಿ ಎಲ್ಲಿ ಬೇಕಾದರೂ ಎನ್ಸಿಎಂಸಿ ಕಾರ್ಡ್ ಉಪಯೋಗಿಸಲು ಅವಕಾಶವಿರುವುದರಿಂದ ಕಾರ್ಡ್ಗಳ ಖರೀದಿಗೆ ನಮ್ಮ ಮೆಟ್ರೋ ಪ್ರಯಾಣಿಕರು ಹೆಚ್ಚಿನ ಆಸಕ್ತಿ ತೋರುತ್ತಿದ್ದಾರೆ.
ಪ್ರತಿ ತಿಂಗಳು ಶೇ.45 ಪ್ರಯಾಣಿಕರು ಸ್ಮಾರ್ಟ್ಕಾರ್ಡ್ ಬಳಸಿ ಮೆಟ್ರೋದಲ್ಲಿ ಪ್ರಯಾಣಿಸುತ್ತಿದ್ದಾರೆ. ದೇಶದ ವಿವಿಧ ಸಾರಿಗೆ ವ್ಯವಸ್ಥೆಗಳಲ್ಲಿ ಬಳಸಬಹುದಾದ್ದರಿಂದ ಎನ್ಸಿಎಂಸಿ ಕಾರ್ಡ್ಗಳ ಖರೀದಿಗೂ ಪ್ರಯಾಣಿಕರು ಉತ್ಸುಕರಾಗಿದ್ದಾರೆ. ಆರ್ಬಿಎಲ್ ಬ್ಯಾಂಕ್ನ ಒಡಂಬಡಿಕೆಯೊಂದಿಗೆ ಎಜಿಎಸ್ ಟ್ರಾನ್ಸಾಕ್ಟ್ ಟೆಕ್ನಾಲಜೀಸ್ ಸಂಸ್ಥೆ ಈ ಕಾರ್ಡ್ ಅಭಿವೃದ್ಧಿಪಡಿಸಿದೆ. ಗ್ರಾಹಕರು ಮೆಟ್ರೋ ನಿಲ್ದಾಣದಲ್ಲಿರುವ ಟಿಕೆಟ್ ಕೌಂಟರ್ನಿಂದ ಎನ್ಸಿಎಂಸಿ ಕಾರ್ಡ್ ಖರೀದಿಸಬಹುದು. ಕಾರ್ಡ್ ಬೆಲೆ 100 ರೂ. ಆಗಿದ್ದು, ಇದರಲ್ಲಿ 50 ರೂ. ಠೇವಣಿಯಾಗಿ ಖಾತೆಯಲ್ಲೇ ಉಳಿದುಕೊಳ್ಳುತ್ತದೆ.
ಕೆವೈಸಿ ಸಲ್ಲಿಸದೆ ಹೆಸರು ಹಾಗೂ ಮೊಬೈಲ್ ಸಂಖ್ಯೆ ನೀಡಿ ವಿವಿಧ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಗಳಲ್ಲಿ ಬಳಸಬಹುದಾದ ಪ್ರಿಪೇಡ್ ಕಾರ್ಡ್ಗಳನ್ನು ನೀಡಲು ಪರವಾನಗಿ ಪಡೆದ ಬ್ಯಾಂಕ್ ಮತ್ತು ಬ್ಯಾಂಕೇತರ ನಿರ್ವಹಣೆಯ ಪ್ರಿಪೇಯ್ಡ್ ಪೇಮೆಂಟ್ ಇನ್ಸ್ಟ್ರುಮೆಂಟ್ಗಳಿಗೆ (ಪಿಪಿಐ) ಭಾರತೀಯ ರಿಸರ್ವ್ ಬ್ಯಾಂಕ್ ಅನುಮತಿ ನೀಡಿದೆ. ಬಳಿಕ ಸುಲಭವಾಗಿ ಎನ್ಸಿಎಂಸಿ ಕಾರ್ಡ್ಗಳು ಲಭ್ಯವಾಗುತ್ತಿವೆ.
ಬಳಕೆ ಹೇಗೆ?
ಎನ್ಸಿಎಂಸಿ ಕಾರ್ಡ್ಗಳನ್ನು ಡೆಬಿಟ್ ಕಾರ್ಡ್ ಮಾದರಿಯಲ್ಲಿ ಎಲ್ಲಿ ಬೇಕಿದ್ದರೂ ಬಳಕೆ ಮಾಡಬಹುದು. ಆರ್ಬಿಎಲ್ ಬ್ಯಾಂಕ್, ಖಾತೆಯನ್ನು ಸಂಪೂರ್ಣವಾಗಿ ನಿರ್ವಹಣೆ ಮಾಡುತ್ತದೆ. ಕಾರ್ಡ್ಗಳಿಗೆ ಯುಪಿಐ, ಕ್ರೆಡಿಟ್/ಡೆಬಿಟ್ ಕಾರ್ಡ್, ನಮ್ಮ ಮೆಟ್ರೋ ನಿಲ್ದಾಣ ಹಾಗೂ ಆರ್ಬಿಎಲ್ ಬ್ಯಾಂಕ್ ಶಾಖೆಗಳಲ್ಲಿ ಸುಲಭವಾಗಿ ರೀಚಾರ್ಜ್ ಮಾಡಬಹುದು.
ಎಲ್ಲೆಲ್ಲಿ ಬಳಸಬಹುದು?
ನ್ಯಾಷನಲ್ ಕಾಮನ್ ಮೊಬಿಲಿಟಿ ಕಾರ್ಡ್ಗಳು ರುಪೇ ಕಾರ್ಡ್ ಮಾದರಿಯ ಸುರತ ಪ್ರಿಪೇಡ್ ಕಾರ್ಡ್ಗಳಾಗಿವೆ. ಪೆಟ್ರೋಲ್ ಬಂಕ್, ಹೋಟೆಲ್, ರುಪೇ ಪಾವತಿಗಳನ್ನು ಸ್ವೀಕರಿಸುವ ಅಂಗಡಿ ಹಾಗೂ ಇ&ಕಾಮರ್ಸ್ ತಾಣಗಳಲ್ಲಿ ಬಳಸಬಹುದು. ಗೂಗಲ್ ಪ್ಲೇ ಸ್ಟೋರ್ ಮೂಲಕ ‘ಬಿಎಂಆರ್ಸಿಎಲ್ ಆರ್ಬಿಎಲ್ ಬ್ಯಾಂಕ್ ಎನ್ಸಿಎಂಸಿ’ ಆ್ಯಪ್ ಡೌನ್ಲೋಡ್ ಮಾಡಬಹುದು.
ಈಗಾಗಲೇ 40 ಸಾವಿರ ನಮ್ಮ ಮೆಟ್ರೋ ಪ್ರಯಾಣಿಕರು ನ್ಯಾಷನಲ್ ಕಾಮನ್ ಮೊಬಿಲಿಟಿ ಕಾರ್ಡ್ ಬಳಸುತ್ತಿದ್ದಾರೆ. ಮುಂದಿನ ಎರಡು ವರ್ಷದಲ್ಲಿ ದೇಶಾದ್ಯಂತ 25 ಲಕ್ಷ ಬಳಕೆದಾರರನ್ನು ತಲುಪುವ ಗುರಿ ಹೊಂದಿದ್ದೇವೆ.
> ಅಲೋಕ್ ಸಿಂಗ್, ಎಜಿಎಸ್ ಟ್ರ್ಯಾನ್ಸಾಕ್ಟ್ ಟೆಕ್ನಾಲಜೀಸ್ನ ಕಾರ್ಯನಿರ್ವಾಹಕ ಉಪಾಧ್ಯಕ್ಷ