ಬೆಂಗಳೂರು: ‘ಇದು ಅವರ 50ನೇ ಚಿತ್ರ. ನಾನು 55ನೇ ಚಿತ್ರ ಮಾಡುತ್ತಿದ್ದೇನೆ. ಅವರು ನನಗಿಂತ ಸ್ಪೀಡ್ ಆಗಿದ್ದಾರೆ. ನನ್ನನ್ನೇ ಓವರ್ಟೇಕ್ ಮಾಡುತ್ತಿದ್ದಾರೆ …’
ಹಾಗಂತ ಹೇಳಿದ್ದು ಉಪೇಂದ್ರ. ಅವರನ್ನು ಓವರ್ಟೇಕ್ ಮಾಡುತ್ತಿರುವುದು ಪತ್ನಿ ಪ್ರಿಯಾಂಕಾ ಉಪೇಂದ್ರ. ಪ್ರಿಯಾಂಕಾ ಅವರ 50ನೇ ಚಿತ್ರವಾದ ‘ಡಿಟೆಕ್ಟಿವ್ ತೀಕ್ಷ್ಣ’ದ ಮೊದಲ ಪೋಸ್ಟರ್ ಗುರುವಾರ ಬಿಡುಗಡೆಯಾಗಿದೆ. ಅದಕ್ಕೆ ಕಾರಣವೂ ಇದೆ. ನಿನ್ನೆ ಉಪೇಂದ್ರ ಮತ್ತು ಪ್ರಿಯಾಂಕಾ ಅವರ ಮಗ ಆಯುಷ್ನ ಹುಟ್ಟುಹಬ್ಬ. ಮೊದಲು ಸಂಭ್ರಮಾಚರಣೆಯಾಗಿ, ಆ ನಂತರ ಪೋಸ್ಟರ್ ಬಿಡುಗಡೆ ಮಾಡುವ ಮೂಲಕ ಚಿತ್ರಕ್ಕೂ ಚಾಲನೆ ನೀಡಲಾಯಿತು. ಈ ಸಂದರ್ಭದಲ್ಲಿ ಮಾತನಾಡಿದ ಉಪೇಂದ್ರ, ‘ಪೋಸ್ಟರ್ ಬಹಳ ಚೆನ್ನಾಗಿದೆ. ಗೆಟಪ್ ತೀಕ್ಷ್ಣವಾಗಿದೆ. ಕಥೆ ಮತ್ತು ಮೇಕಿಂಗ್ ಸಹ ಇದೇ ರೀತಿ ಶಾರ್ಪ್ ಆಗಿರಲಿ’ ಎಂದು ಹಾರೈಸಿದರು.
‘ಒಂದು ವರ್ಷದ ಹಿಂದೆ ರಘು ಬಂದು ಈ ಕಥೆ ಹೇಳಿದಾಗ ಬಹಳ ಖುಷಿಯಾಯಿತು. ಬಹಳ ಚೆನ್ನಾಗಿ ಸ್ಕ್ರಿಪ್ಟ್ ಮಾಡಿಕೊಂಡಿದ್ದಾರೆ. ಪ್ರತಿ ಚಿತ್ರದಲ್ಲೂ ವಿಭಿನ್ನ ಪಾತ್ರ ಮಾಡಬೇಕು ಎಂಬುದು ನನ್ನ ಆಸೆ. ಅದರಂತೆ ಬೇತೆ ತರಹದ ಸ್ಕ್ರಿಪ್ಟ್ ಗಳನ್ನು ಆಯ್ಕೆ ಮಾಡಿಕೊಳ್ಳುತ್ತಿದ್ದೇನೆ. ಈ ಪಾತ್ರ ನನಗೆ ಕೊಟ್ಟಿದ್ದಿಕ್ಕೆ ನಿರ್ದೇಶಕ ರಘು ಅವರಿಗೆ ಥ್ಯಾಂಕ್ಸ್. ಒಂದೊಳ್ಳೆಯದು ತಂಡ ಇದೆ. ಜೂನ್ನಿಂದ ಚಿತ್ರ ಶುರುವಾಗಲಿದೆ’ ಎನ್ನುತ್ತಾರೆ ಪ್ರಿಯಾಂಕಾ. ‘ಡಿಟೆಕ್ಟಿವ್ ತೀಕ್ಷ್ಣ’ ಚಿತ್ರವನ್ನು ತ್ರಿವಿಕ್ರಮ ರಘು ಕಥೆ-ಚಿತ್ರಕಥೆ ಬರೆದು ನಿರ್ದೇಶಿಸಿದರೆ, ಪುರುಷೋತ್ತಮ ನಿರ್ಮಾಣ ಮಾಡುತ್ತಿದ್ದಾರೆ.
ಭಾರಿ ಬೆಂಕಿ ಅನಾಹುತ: ಕನಿಷ್ಠ 26 ಮಂದಿ ಸಾವು, ಸುಮಾರು 40 ಜನರಿಗೆ ಗಾಯ..