ನವದೆಹಲಿ: ಟ್ವಿಟರ್ನಲ್ಲಿ #BoysLockerRoom ಎಂಬ ಹ್ಯಾಷ್ಟ್ಯಾಗ್ ಸಿಕ್ಕಾಪಟೆ ಸದ್ದು ಮಾಡುತ್ತಿದೆ. ದೆಹಲಿಯ ಪ್ರತಿಷ್ಠಿತ ಶಾಲೆಗಳ ಗಂಡುಮಕ್ಕಳ ಹೊಲಸು ಮನಸ್ಥಿತಿ ಈ ಹ್ಯಾಷ್ಟ್ಯಾಗ್ನಡಿ ಬಯಲಾಗಿದೆ. ಸೈಬರ್ ಪೊಲೀಸರು ಕೂಡ ಈಗಾಗಲೇ ತನಿಖೆಗೆ ಇಳಿದಿದ್ದಾರೆ.
ದೆಹಲಿಯ ಪ್ರತಿಷ್ಠಿತ ಶಾಲೆ, ಕಾಲೇಜುಗಳಿಗೆ ಹೋಗುವ, ಸಾಮಾನ್ಯವಾಗಿ 15ರಿಂದ 18ರವರೆಗಿನ ವಯಸ್ಸಿನ ಗಂಡುಮಕ್ಕಳೆಲ್ಲ ಸೇರಿ ಒಂದು ಇನ್ಸ್ಟಾಗ್ರಾಂ ಗ್ರುಪ್ ರಚಿಸಿಕೊಂಡಿದ್ದಾರೆ. ಅದರ ಹೆಸರು ಬಾಯ್ಸ್ ಲಾಕರ್ ರೂಂ (bois locker room) ಆದರೆ ಈ ಗ್ರೂಪ್ನಲ್ಲಿ ಹದಿಹರೆಯದ ಯುವಕರು ಚರ್ಚೆ ಮಾಡುತ್ತಿದ್ದ ವಿಚಾರಗಳು ಬೆಚ್ಚಿಬೀಳಿಸುವಂಥವು.
ಆ ಗ್ರುಪ್ನಲ್ಲಿ ಗಂಡುಮಕ್ಕಳು ಮಾಡಿದಂತಹ ಚಾಟ್ಗಳ ಸ್ಕ್ರೀನ್ ಶಾಟ್ಗಳು ಸಾಮಾಜಿಕ ಜಾಲತಾಣಗಳಲ್ಲಿ #BoysLockerRoomನಡಿ ವೈರಲ್ ಆಗುತ್ತಿದ್ದಂತೆ ಪೊಲೀಸರೂ ಕೂಡ ಎಚ್ಚೆತ್ತುಕೊಂಡಿದ್ದಾರೆ. ಕೂಡಲೇ ಅದನ್ನು ಡಿ ಆ್ಯಕ್ಟಿವೇಟ್ ಮಾಡಿಸಲಾಗಿದೆ. ಅಷ್ಟಕ್ಕೂ ಅಂಥ ಚರ್ಚೆಗಳು ಏನು ನಡೆಯುತ್ತಿತ್ತು…? ಮುಂದೆ ಓದಿ…
ಇದನ್ನೂ ಓದಿ: ಬೆಳ್ಳಂಬೆಳಗ್ಗೆಯೇ ಬೆಂಗಳೂರಿನಲ್ಲಿ ಶೂಟೌಟ್: ಖಾರದ ಪುಡಿ ಎರಚಿ ಪರಾರಿಯಾಗಲೆತ್ನಿಸಿದ್ದ ಕೊಲೆ ಆರೋಪಿ
ಬಾಯ್ಸ್ ಲಾಕರ್ ರೂಂ ಎಂಬ ಗ್ರುಪ್ ರಚನೆ ಮಾಡಿಕೊಂಡಿದ್ದವರು ಬರೀ ಅಶ್ಲೀಲ ವಿಚಾರಗಳನ್ನು ಚಾಟ್ ಮಾಡುತ್ತಿದ್ದರು. ಇನ್ನೂ 18 ಮೀರದ, ಅತ್ತ ಬಾಲಕರೂ ಅಲ್ಲದ, ಇತ್ತ ಯುವಕರೂ ಎನ್ನಿಸಿಕೊಳ್ಳದವರೇ ತುಂಬಿದ್ದ ಈ ಗ್ರುಪ್ನಲ್ಲಿ ತಮ್ಮದೇ ವಯಸ್ಸಿನ ಹುಡುಗಿಯರ, ಹಿರಿಯ ಮಹಿಳೆಯರ ನಗ್ನ ಚಿತ್ರಗಳು ಹರಿದಾಡುತ್ತಿದ್ದವು. ರೇಪ್, ಸೆಕ್ಸ್ ಎಂಬಿತ್ಯಾದಿ ವಿಷಯಗಳೇ ತುಂಬಿಹೋಗಿದ್ದವು. ಯುವತಿಯರು, ಬಾಲಕಿಯರು, ಮಹಿಳೆಯರ ನಗ್ನ ಚಿತ್ರಗಳೊಂದಿಗೆ ಅಷ್ಟೇ ಅಶ್ಲೀಲವಾದ ಕಾಮೆಂಟ್ಗಳೂ ಇದ್ದವು. ತಮ್ಮದೇ ಕ್ಲಾಸಿನ ಹೆಣ್ಣುಮಕ್ಕಳ ಬಗ್ಗೆಯೂ ಕೆಟ್ಟದಾಗಿ ಸಂದೇಶಗಳನ್ನು ವಿನಿಮಯ ಮಾಡಿಕೊಂಡಿದ್ದು ಬೆಳಕಿಗೆ ಬಂದಿದೆ.
ಗ್ರುಪ್ನಲ್ಲಿರುವ ಗಂಡು ಮಕ್ಕಳು ತಮ್ಮ ಕ್ಲಾಸಿನ ಹುಡುಗಿಯರ ಸೋಷಿಯಲ್ ಮೀಡಿಯಾ ಅಕೌಂಟ್ಗಳನ್ನು ಹ್ಯಾಕ್ ಮಾಡುತ್ತಿದ್ದರು. ಅಲ್ಲದೆ, ಅವರ ನಗ್ನ ಚಿತ್ರಗಳನ್ನು ಗುಟ್ಟಾಗಿ ಸಂಗ್ರಹಿಸುತ್ತಿದ್ದರು ಎಂಬ ಆರೋಪವೂ ಕೇಳಿಬಂದಿದೆ.
ಟ್ವಿಟರ್ನಲ್ಲಿ ಕೆಲವು ನೆಟ್ಟಿಗರು ಸ್ಕ್ರೀನ್ ಶಾಟ್ಗಳನ್ನು ಪೋಸ್ಟ್ ಮಾಡಿದ ಬೆನ್ನಲ್ಲೇ ದೆಹಲಿ ಸೈಬರ್ ಪೊಲೀಸರು ಅಲರ್ಟ್ ಆಗಿದ್ದಾರೆ. ಅವರೆಲ್ಲರ ಸಂಪೂರ್ಣ ವಿವರಣೆ ನೀಡುವಂತೆ ಇನ್ಸ್ಟಾಗ್ರಾಂಗೆ ಕೇಳಿದ್ದಾರೆ. ಸದ್ಯ ಆ ಗ್ರುಪ್ ಈಗ ಡಿ ಆ್ಯಕ್ಟಿವೇಟ್ ಆಗಿದೆ.
ಇದನ್ನೂ ಓದಿ: ಎಷ್ಟು ಕೋಟಿ ರೂ. ಮೌಲ್ಯದ ಮದ್ಯ ಇವತ್ತು ರಾಜ್ಯದಲ್ಲಿ ಸೇಲ್ ಆಯ್ತು?
ಗುಂಪಿನ ಎಲ್ಲ ಸದಸ್ಯರನ್ನೂ ಬಂಧಿಸುವಂತೆ ದೆಹಲಿ ಮಹಿಳಾ ಆಯೋಗದ ಅಧ್ಯಕ್ಷೆ ಸ್ವಾತಿ ಮಾಲಿವಾಲ್ ಇನ್ಸ್ಟಾಗ್ರಾಂ ಮತ್ತು ದೆಹಲಿ ಪೊಲೀಸರಿಗೆ ನೋಟಿಸ್ ಕೂಡ ನೀಡಿ, ಒತ್ತಾಯಿಸಿದ್ದಾರೆ. (ಏಜೆನ್ಸೀಸ್)