ನವದೆಹಲಿ: ಮೆಸೇಜಿಂಗ್ ಆ್ಯಪ್ಗಳ ಪೈಕಿ ಅಡ್ವಾನ್ಸ್ಡ್ ಎನ್ನುವಂಥ ಫೀಚರ್ಗಳನ್ನು ಹೊಂದಿರುವಂಥ ಟೆಲಿಗ್ರಾಂ, ಸಂವಹನಕ್ಕೆ ಅತ್ಯುತ್ತಮ ಮಾಧ್ಯಮ ಎಂದರೂ ತಪ್ಪೇನಲ್ಲ. ಆದರೆ ಅದರ ಫೀಚರ್ಗಳನ್ನು ದುರ್ಬಳಕೆ ಮಾಡಿಕೊಂಡು ಕೆಲವರು ತಪ್ಪೆಸಗುತ್ತಿರುವುದು ಕೂಡ ನಡೆಯುತ್ತಿದೆ. ಈ ಮಧ್ಯೆ ಟೆಲಿಗ್ರಾಂ ಬಳಕೆದಾರರ ಮಾಹಿತಿ ನೀಡಬೇಕು ದೆಹಲಿ ಹೈಕೋರ್ಟ್ ಟೆಲಿಗ್ರಾಂ ಸಂಸ್ಥೆಗೆ ಸೂಚನೆ ನೀಡಿದೆ.
ಈಗಲೂ ಸಿನಿಮಾಗಳ ಪೈರಸಿ ಕಾಪಿಗಳನ್ನು ನೋಡಲು ಕೆಲವರು ಟೆಲಿಗ್ರಾಂ ಮೊರೆ ಹೋಗುತ್ತಾರೆ. ಸಿನಿಮಾ ಮಾತ್ರವಲ್ಲದೆ ಇನ್ನೂ ಕೆಲವು ಕಾಪಿರೈಟ್ ಉಲ್ಲಂಘನೆ ಆಗುವಂಥ ಕಂಟೆಂಟ್ಗಳನ್ನು ಹಾಕಿರುತ್ತಾರೆ. ಇಂಥ ಅಕ್ರಮಗಳು ಟೆಲಿಗ್ರಾಂ ಚಾನೆಲ್ಗಳಲ್ಲಿ ಪೋಸ್ಟ್ ಆಗುತ್ತಿದ್ದು, ಹಲವರು ಅದನ್ನು ಬಳಸಿಕೊಳ್ಳುತ್ತಿದ್ದರು. ಇಂಥದ್ದೇ ಒಂದು ಪ್ರಕರಣಕ್ಕೆ ಸಂಬಂಧಿಸಿದಂತೆ ಹೈಕೋರ್ಟ್ ಈ ನಿರ್ದೇಶನ ನೀಡಿದೆ.
ದೆಹಲಿಯ ಕೆ.ಡಿ. ಕ್ಯಾಂಪಸ್ ಪ್ರೈವೇಟ್ ಲಿ. ಶಿಕ್ಷಕಿ ನೀತು ಸಿಂಗ್ ತಾವು ತಯಾರಿಸಿರುವ ಸ್ಟಡಿ ಮೆಟಿರೀಯಲ್ಗಳನ್ನು ಟೆಲಿಗ್ರಾಂ ಚಾನೆಲ್ಗಳಲ್ಲಿ ಅನಧಿಕೃತವಾಗಿ ಹಾಕಿಕೊಳ್ಳಲಾಗಿದೆ. ಇದು ಕಾಪಿರೈಟ್ ಉಲ್ಲಂಘನೆ ಎಂದು ಪ್ರಕರಣ ದಾಖಲಿಸಿದ್ದರು. ಈ ಪ್ರಕರಣಕ್ಕೆ ಸಂಬಂಧಿಸಿದಂತೆ ದೆಹಲಿ ಹೈಕೋರ್ಟ್ನಲ್ಲಿ ವಿಚಾರಣೆ ನಡೆದಿದ್ದು, ಅಂಥ ಕಂಟೆಂಟ್ಗಳನ್ನು ಹಾಕುವವರ ಮಾಹಿತಿ ನೀಡುವಂತೆ ಕೋರ್ಟ್ ನಿರ್ದೇಶಿಸಿದೆ.
ಆದರೆ ನಮ್ಮ ಸರ್ವರ್ ಸಿಂಗಾಪುರದಲ್ಲಿದೆ ಎಂದು ಟೆಲಿಗ್ರಾಂ ಕೊಡಲು ನಿರಾಕರಿಸಿದ್ದರೂ, ಭಾರತದಲ್ಲಿ ಇಲ್ಲಿನ ಕಾನೂನಿಗೆ ತಕ್ಕಂತೆ ನಡೆದುಕೊಳ್ಳಬೇಕು ಎಂದು ಸೂಚನೆ ನೀಡಿರುವ ಹೈಕೋರ್ಟ್ ನ್ಯಾಯಾಧೀಶೆ ಪ್ರತಿಭಾ ಎಂ. ಸಿಂಗ್, ಅಂಥವರ ಮಾಹಿತಿ ನೀಡಬೇಕು ಎಂದು ಟೆಲಿಗ್ರಾಮ್ಗೆ ನಿರ್ದೇಶನ ನೀಡಿದ್ದಾರೆ.
ಭದ್ರತೆಗೆ ನಿಯೋಜಿಸಿದ್ದ ಸಿಐಎಸ್ಎಫ್ ಯೋಧ ಪಿಸ್ತೂಲ್-ಗುಂಡುಗಳ ಸಮೇತ ನಾಪತ್ತೆ!