ನವದೆಹಲಿ: ದೆಹಲಿ ವಿಧಾನಸಭಾ ಚುನಾವಣೆಯ ಮತದಾನ ಇಂದು ಮುಗಿದಿದ್ದು, ಆಮ್ ಆದ್ಮಿ ಪಕ್ಷ ಭರ್ಜರಿ ಬಹುಮತ ಸಾಧಿಸಲಿದೆ ಎಂದು ಮತದಾನೋತ್ತರ ಸಮೀಕ್ಷೆಗಳು ಭವಿಷ್ಯ ನುಡಿದಿವೆ. ಇದು ಎಷ್ಟರಮಟ್ಟಿಗೆ ಸತ್ಯವಾಗುತ್ತದೆ ಎಂಬುದು ಫೆ. 11ರ ಫಲಿತಾಂಶ ದಿನದಂದು ನಿರ್ಧಾರವಾಗಲಿದೆ. ಆದರೂ, ಬಹುತೇಕ ಎಕ್ಸಿಟ್ ಪೋಲ್ ನಿಜವಾಗಿರುವುದರಿಂದ ಇದನ್ನು ಅಲ್ಲಗೆಳೆಯುವಂತಿಲ್ಲ.
ಈ ಬಾರಿಯ ದೆಹಲಿ ವಿಧಾನಸಭಾ ಚುನಾವಣೆಯಲ್ಲಿ ಹೆಚ್ಚಾಗಿ ಮಹಿಳೆಯರು ಮತ್ತು ಮೊದಲ ಬಾರಿಗೆ ಮತ ಚಲಾಯಿಸಿದವರು ಆಪ್ಗೆ ಒಲವು ತೋರಿದ್ದಾರೆ ಎಂಬುದು ಇಂಡಿಯಾ ಟುಡೆ-ಆ್ಯಕ್ಸಿಸ್ ಮೈ ಇಂಡಿಯಾ ಎಕ್ಸಿಟ್ ಪೋಲ್ನಲ್ಲಿ ಬಹಿರಂಗವಾಗಿದೆ.
ಕಳೆದ ಐದು ವರ್ಷಗಳಲ್ಲಿ ಆಪ್ ಸರ್ಕಾರದ ಅಭಿವೃದ್ಧಿ ಕಾರ್ಯಗಳ ಆಧಾರದ ಮೇಲೆ ಮತ ಚಲಾಯಿಸಿದ್ದಾರೆ ಎಂದು ಸಮೀಕ್ಷೆ ಹೇಳಿದೆ. ಅದರಲ್ಲೂ ಉಚಿತ ನೀರು ಮತ್ತು ವಿದ್ಯುತ್ ಜನರನ್ನು ಹೆಚ್ಚು ಆಕರ್ಷಿಸಿದೆ. ಮಹಿಳೆಯರಿಗೆ ಉಚಿತ ಬಸ್ ಪ್ರಯಾಣ ನಿರ್ಧಾರವು ಹೆಚ್ಚು ಪ್ರಖ್ಯಾತಿಯನ್ನು ಆಪ್ಗೆ ತಂದುಕೊಟ್ಟಿದೆ ಎಂದು ಸಮೀಕ್ಷೆ ಹೇಳಿದೆ.
ಇದನ್ನೂ ಓದಿ: ದೆಹಲಿ ವಿಧಾನಸಭಾ ಚುನಾವಣೆ: ಕಳೆದ ಬಾರಿಗಿಂತಲೂ ನೀರಸ ಮತದಾನ, ಎಕ್ಸಿಟ್ ಫೋಲ್ನಲ್ಲಿ ಕೇಜ್ರಿವಾಲ್ ಕಮಾಲ್!
ಪುರಷರಿಗಿಂತ ಶೇ 6 ರಷ್ಟು ಹೆಚ್ಚು ಮಹಿಳೆಯರು ಆಪ್ಗೆ ಮತ ಚಲಾಯಿಸಿದ್ದಾರೆ. ಯುವಕರು, ವಿದ್ಯಾರ್ಥಿಗಳು ಹಾಗೂ ಮೊದಲ ಬಾರಿಗೆ ಮತ ಚಲಾಯಿಸುವವರು ಆಪ್ ಅನ್ನೇ ಆರಿಸಿಕೊಂಡಿರುವುದು ಈ ಬಾರಿಯ ವಿಶೇಷವಾಗಿದೆ.
ಇನ್ನು ಆಪ್ನ ಕೆಲ ಶಾಸಕರು ವಿರುದ್ಧವು ಅಸಮಾಧಾನ ಕಂಡುಬಂದಿದ್ದು ಸಿಎಂ ಅರವಿಂದ್ ಕೇಜ್ರಿವಾಲ್ ಮುಖ ನೋಡಿಕೊಂಡು ಮತ ಚಲಾಯಿಸಿರುವುದಾಗಿ ಸಮೀಕ್ಷಾ ವೇಳೆ ಜನರು ಹೇಳಿಕೊಂಡಿದ್ದಾರೆ.
ಒಟ್ಟಾರೆ ದೆಹಲಿ ಚುನಾವಣಾ ಕಣದಲ್ಲಿ ಆಪ್ 59 ರಷ್ಟು ಮತ ಪ್ರಮಾಣವನ್ನು ಪಡೆದುಕೊಂಡರೆ, ಬಿಜೆಪಿ ಶೇ. 43 ಮತ ಹಂಚಿಕೆ ಪಡೆದುಕೊಂಡಿದೆ. ಒಟ್ಟು 70 ವಿಧಾನಸಭಾ ಕ್ಷೇತ್ರಗಳಲ್ಲಿ ಆಪ್ 59 ರಿಂದ 68 ಮತ್ತು ಬಿಜೆಪಿ 2 ರಿಂದ 11 ಹಾಗೂ ಕಾಂಗ್ರೆಸ್ ಶೂನ್ಯ ಸಂಪಾದಿಸಲಿದೆ ಎಂದು ಎಕ್ಸಿಟ್ ಪೋಲ್ ಹೇಳಿದೆ. (ಏಜೆನ್ಸೀಸ್)