‘ಹುಡುಗಿಯರ ಸಹವಾಸ ಬೇಡ, ಈ ಪ್ರೀತಿ ಎಲ್ಲ ಸುಮ್ಮನೇ ಶೋಕಿ, ಪ್ರೀತಿ ಮಾಡಬಾರದು, ಮದುವೆ ಆಗದೇ ಒಬ್ಬನೇ ಸುಖವಾಗಿ ಇರಬಹುದು’ ಹೀಗೆ ಪ್ರೇಮ ಮತ್ತು ಹುಡುಗಿಯರ ಬಗ್ಗೆ ತಿರಸ್ಕಾರ ಭಾವ ಹೊಂದಿರುವ ವ್ಯಕ್ತಿ ಆರ್ಯ (ಕೃಷ್ಣ). ಈ ಕಾಲದವರಿಗೆ ನಿಜವಾದ ಪ್ರೀತಿ ಎಂದರೇನು ಎಂದು ಯಾರಿಗೂ ಗೊತ್ತಿಲ್ಲ ಎನ್ನುವುದೇ ಅವನ ಈ ಧೋರಣೆಗೆ ಕಾರಣ. ಏನೇ ಆದರೂ ಈ ಮನಸ್ಥಿತಿಯಿಂದ ದೂರವಾಗಬಾರದು ಎಂದು ಬದುಕುತ್ತಿರುವ ವ್ಯಕ್ತಿಯ ಜೀವನದಲ್ಲಿ ಇವನಂತೆಯೇ ಪ್ರೀತಿಯಿಂದ ದೂರವಿರಬೇಕು ಎಂಬ ಮನಸ್ಥಿತಿಯಿರುವ ಅದಿತಿ (ಸೋನಲ್) ಎಂಬ ಹುಡುಗಿಯ ಎಂಟ್ರಿ ಆಗುತ್ತದೆ. ಇಬ್ಬರೂ ಪ್ರೀತಿಸುವುದಿಲ್ಲ, ಆದರೂ ಪ್ರೀತಿಯಲ್ಲಿರುತ್ತಾರೆ. ಅದರ ನಡುವೆ ಮೂರನೆಯವರ ಪ್ರವೇಶ ಆದಾಗ ಕಥೆ ಇನ್ನೊಂದು ಸ್ವರೂಪ ಪಡೆದುಕೊಳ್ಳುತ್ತದೆ. ಮುಂದೆ? ಸ್ವತಃ ಆರ್ಯ ‘ಶುಗರ್ ಫ್ಯಾಕ್ಟರಿ’ ಪಬ್ನಲ್ಲಿ ಕುಳಿತು ಯೂಟ್ಯೂಬರ್ ಅಮುಲುಗೆ (ರುಹಾನಿ) ಹೇಳುತ್ತಾನೆ. ಈ ಜನರೇಷನ್ನವರು ಪ್ರೀತಿಯನ್ನು ಹೇಗೆ ನೋಡುತ್ತಾರೆ ಎಂಬುದನ್ನು ಹೇಳುವ ಪ್ರಯತ್ನ ನಿರ್ದೇಶಕ ದೀಪಕ್ ‘ಶುಗರ್ ಫ್ಯಾಕ್ಟರಿ’ ಸಿನಿಮಾದಲ್ಲಿ ಮಾಡಿರುವುದು ಕಾಣುತ್ತದೆ.
