ನವದೆಹಲಿ: ಜಗತ್ತಿನಾದ್ಯಂತ ಕಾಡುತ್ತಿರುವ ಕೋವಿಡ್-19 ಪಿಡುಗನ್ನು ಎದುರಿಸಲು ಜಗತ್ತೇ ಒಂದಾಗಿ ಶ್ರಮಿಸುತ್ತಿದ್ದು, ಬಹುತೇಕ ಯುದ್ಧೋಪಾದಿಯಲ್ಲಿ ಕೆಲಸಗಳು ನಡೆಯುತ್ತಿವೆ. ಇನ್ನೂ ತೊಲಗಿಸಲಾಗದ ಕರೊನಾಗೆ ಭಾರತವೂ ಸೇರಿ ಹಲವು ದೇಶಗಳಲ್ಲಿ ಲಸಿಕೆ ಕಂಡುಹಿಡಿಯಲು ಸಂಶೋಧನೆ ನಡೆಯುತ್ತಿದೆ.
ಈ ಮಧ್ಯೆ ಪ್ರಧಾನಿ ನರೇಂದ್ರ ಮೋದಿಯವರು ಕರೊನಾ ಹಿನ್ನೆಲೆಯಲ್ಲಿ ಎರಡನೇ ವಿಶ್ವ ಮಹಾಯುದ್ಧವನ್ನು ನೆನಪಿಸಿಕೊಂಡಿದ್ದಾರೆ. ಶುಕ್ರವಾರ ನಡೆದ ಭಾರತ-ಇಟಲಿ ವರ್ಚುವಲ್ ಸಮ್ಮೇಳನದಲ್ಲಿ ಇಟಲಿಯ ಪ್ರಧಾನಿ ಗಿಸೆಪ್ಪೆ ಕಾಂಟೆ ಜತೆ ಮಾತನಾಡಿದ ಅವರು, ಕೋವಿಡ್-19 ಇತಿಹಾಸದಲ್ಲಿ ವರ್ಲ್ಡ್ ವಾರ್-2ರ ಥರ ನೆನಪಾಗಿ ಉಳಿಯಲಿದೆ ಎಂದರು.
ಕರೊನೋತ್ತರ ಜಗತ್ತಿಗೆ ನಾವು ಹೊಂದಿಕೊಳ್ಳಬೇಕಾಗಿದೆ. ಕರೊನಾ ಬಳಿಕದ ಅವಕಾಶ ಹಾಗೂ ಸವಾಲುಗಳಿಗೆ ನಾವು ಸಿದ್ಧರಾಗಿ ತೆರೆದುಕೊಳ್ಳಬೇಕಿದೆ ಎಂದು ಪ್ರಧಾನಿ ಮೋದಿ ಅಭಿಪ್ರಾಯ ಪಟ್ಟರು. ಹಾಗೆಯೇ ಕೋವಿಡ್ನಿಂದಾಗಿ ಇಟಲಿಯಲ್ಲಿ ಮೃತಪಟ್ಟವರ ಕುಟುಂಬಕ್ಕೆ ಭಾರತದ ಪರವಾಗಿ ಮೋದಿ ಸಾಂತ್ವನ ಸಲ್ಲಿಸಿದರು. (ಏಜೆನ್ಸೀಸ್)