ನವಜಾತ ಹೆಣ್ಣು ಶಿಶುವಿನ ಶವ ಪತ್ತೆ

ಸವಣೂರ: ಪಟ್ಟಣದ ಹೊರ ವಲಯದ ಇಸ್ಲಾಂಪೂರ ಹತ್ತಿರದ ಸಣ್ಣಕೆರೆಯಲ್ಲಿ ಮಂಗಳವಾರ ಬೆಳಗ್ಗೆ ನವಜಾತ ಹೆಣ್ಣು ಶಿಶುವಿನ ಶವ ಪತ್ತೆಯಾಗಿದೆ. ದಾರಿಯಲ್ಲಿ ಹಾದು ಹೋಗುವವರು ಶವವನ್ನು ಕಂಡು ಪೊಲೀಸರಿಗೆ ತಿಳಿಸಿದ್ದಾರೆ. ತಕ್ಷಣ ಸಿಡಿಪಿಒ ಅಣ್ಣಪ್ಪ ಹೆಗಡೆ ಅವರೊಂದಿಗೆ ಪೊಲೀಸರು ಸ್ಥಳಕ್ಕೆ ಆಗಮಿಸಿ ಪರಿಶೀಲಿಸಿದರು. ನಂತರ, ಪುರಸಭೆ ಪೌರ ಕಾರ್ವಿುಕರ ಸಹಕಾರದಿಂದ ಶವವನ್ನು ಹೊರತೆಗೆದು ಮರಣೋತ್ತರ ಪರೀಕ್ಷೆಗಾಗಿ ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಗೆ ಸಾಗಿಸಿದರು. ಪಟ್ಟಣದ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ. ಶಿಶುವಿನ ಪಾಲಕರ ಪತ್ತೆ ಕಾರ್ಯ ಮುಂದುವರಿದಿದೆ ಎಂದು ಸಿಡಿಪಿಒ ತಿಳಿಸಿದರು. ಸಿಪಿಐ ಶಶಿಧರ ಜಿ.ಎಂ., ಪಿಎಸ್​ಐ ಹನುಮಂತಪ್ಪ ಶಿವಣ್ಣವರ ಇತರರು ಇದ್ದರು.