ನವದೆಹಲಿ: ಚೀನಾದಲ್ಲಿ ಮೃತ್ಯಕೂಪ ನಿರ್ಮಿಸಿರುವ ಮಾರಕ ಕೊರೊನಾ ವೈರಸ್ ಭೂಮೇಲ್ಮೈನಲ್ಲಿ ಸುಮಾರು 9 ದಿನಗಳವರೆಗೂ ಸಾಂಕ್ರಮಿಕವಾಗಿ ಉಳಿದುಕೊಳ್ಳಲಿವೆ ಎಂದು ಹೊಸ ಅಧ್ಯಯನವೊಂದು ಬಹಿರಂಗಪಡಿಸಿದ್ದು, ಸಂಶೋಧಕರು ಎಚ್ಚರಿಕೆ ನೀಡಿದ್ದಾರೆ.
ಸರಾಸರಿ ನಾಲ್ಕರಿಂದ ಐದು ದಿನಗಳವರೆಗೆ ಕೊರೊನಾ ವೈರಸ್ ಬದುಕಿರಲಿವೆ ಎಂದು ಜರ್ನಲ್ ಆಫ್ ಆಸ್ಪಿಟಲ್ ಇನ್ಫೆಕ್ಶನ್ನಲ್ಲಿ ಪ್ರಕಟವಾಗಿದೆ. ಕಡಿಮೆ ಉಷ್ಣಾಂಶ ಮತ್ತು ಹೆಚ್ಚು ವಾಯು ಆರ್ದ್ರತೆಯಲ್ಲಿ ವೈರಸ್ ಜೀವಿತಾವಧಿ ಮತ್ತಷ್ಟು ಹೆಚ್ಚಲಿದೆ ಎಂದು ಜರ್ಮನಿಯ ಗ್ರೀಫ್ಸ್ವಾಲ್ಡ್ ಯೂನಿವರ್ಸಿಟಿ ಆಸ್ಪತ್ರೆಯ ಪ್ರೊಫೆಸರ್ ಗುಂಟರ್ ಕಂಫ್ ವಿವರಿಸಿದ್ದಾರೆ.
ಕೊರೊನಾ ವೈರಸ್ ಮೇಲೆ ನಡೆದ ಸುಮಾರು 22 ಅಧ್ಯಯನದ ಬಳಿಕ ಈ ತೀರ್ಮಾನಕ್ಕೆ ಬರಲಾಗಿದೆ. ಅಧ್ಯಯನದಲ್ಲಿ ಹೆಚ್ಚಾಗಿ ಸಾರ್ಸ್ ಕೊರೊನಾವೈರಸ್ ಮತ್ತು ಮೆರ್ಸ್ ಕೊರೊನಾ ವೈರಸ್ ಮೇಲೆ ಗಮನ ವಹಿಸಲಾಗಿದೆ. ವಿವಿಧ ಕೊರೊನಾ ವೈರಸ್ ಅನ್ನು ವಿಶ್ಲೇಷಿಸಲಾಯಿತು. ಆದರೆ, ಎಲ್ಲ ಫಲಿತಾಂಶವು ಕೂಡ ಒಂದೇ ರೀತಿಯಾಗಿದೆ ಎಂದು ಜರ್ಮನಿಯ ರುಹ್ರ್ ಯೂನಿವರ್ಸಿಟಿ ಬೊಚುಮ್ ಪ್ರೊಫೆಸರ್ ಐಕ್ ಸ್ಟೇನ್ಮನ್ ತಿಳಿಸಿದ್ದಾರೆ.
ಈವರೆಗೂ ಕೊರೊನಾ ವೈರಸ್ಗೆ ನಿರ್ಧಿಷ್ಟವಾದ ಚಿಕಿತ್ಸಾ ವಿಧಾನವನ್ನು ಕಂಡುಹಿಡಿದಿಲ್ಲ. ಆದರೆ, ಸೋಂಕಿನಿಂದ ರಕ್ಷಿಸಿಕೊಳ್ಳಲು ಮುಂಜಾಗ್ರತ ಕ್ರಮಗಳಿಗೆ ಎಲ್ಲೆಡೆ ಒತ್ತು ನೀಡಲಾಗುತ್ತಿದೆ. ಕೈಗಳ ಮೂಲಕ ಪದೇಪದೆ ವಸ್ತುಗಳ ಮೇಲ್ಭಾಗವನ್ನು ಸ್ಪರ್ಶಿಸುವುದರಿಂದ ಸೋಂಕು ತಗಲುತ್ತಿದೆ ಎಂದು ಗುಂಟರ್ ಕಂಫ್ ಎಚ್ಚರಿಸಿದ್ದಾರೆ. (ಏಜೆನ್ಸೀಸ್)