ಕಾರವಾರ: ಜಿಲ್ಲೆಯ ಕೋವಿಡ್ ಹರಡುವಿಕೆ ದರ (ಪಾಸಿಟಿವಿಟಿ ರೇಟ್) ಶೇ. 5.17ಕ್ಕೆ ಏರಿಕೆಯಾಗಿದೆ. ಸಕ್ರಿಯ ಪ್ರಕರಣಗಳ ಸಂಖ್ಯೆ ಸಾವಿರ ದಾಟಿದೆ.
ಜಿಲ್ಲೆಯ ಶಿರಸಿ ಹಾಗೂ ಕಾರವಾರ ಪ್ರಯೋಗಾಲಯಗಳಲ್ಲಿ ದಿನಕ್ಕೆ ಸರಾಸರಿ 5 ಸಾವಿರ ಜನರ ಗಂಟಲ ದ್ರವದ ಮಾದರಿ ಪರೀಕ್ಷೆ ಮಾಡಲಾಗುತ್ತಿದೆ. ವಾರದ ಹಿಂದೆ ಶೇ. 1ಕ್ಕಿಂತ ಕಡಿಮೆ ಇದ್ದ ಪಾಸಿಟಿವಿಟಿ ರೇಟ್ ಈಗ ಶೇ. 5ಕ್ಕಿಂತ ಹೆಚ್ಚು ಏರಿದೆ.
ಹೊನ್ನಾವರದ ಪ್ರಭಾತ ನಗರ ಸರ್ಕಾರಿ ಹೈಸ್ಕೂಲ್, ಕಾಲೇಜ್ನಲ್ಲಿ 14 ಮಕ್ಕಳಿಗೆ ಕೋವಿಡ್ ಖಚಿತವಾಗಿರುವುದರಿಂದ ಡಿ. 20ರವರೆಗೆ ತರಗತಿಗಳನ್ನು ಮುಚ್ಚಲಾಗಿದೆ. ಜಿಲ್ಲೆಯಲ್ಲಿ ಸದ್ಯ 18 ವರ್ಷದೊಳಗಿನ 54 ವಿದ್ಯಾರ್ಥಿಗಳಲ್ಲಿ, 18 ವರ್ಷ ಮೇಲ್ಪಟ್ಟ 112 ವಿದ್ಯಾರ್ಥಿಗಳಲ್ಲಿ ಕೋವಿಡ್ ಸೋಂಕು ತಗುಲಿದೆ.
278 ಜನರಿಗೆ ಸೋಂಕು: ಶುಕ್ರವಾರದ ಜಿಲ್ಲಾ ಹೆಲ್ತ್ ಬುಲೆಟಿನ್ನಂತೆ ಜಿಲ್ಲೆಯ 278 ಜನರಿಗೆ ಹೊಸದಾಗಿ ಕರೊನಾ ಖಚಿತವಾಗಿದೆ. 30 ಜನ ಗುಣವಾಗಿದ್ದಾರೆ. ಕಾರವಾರದಲ್ಲಿ-85, ಅಂಕೋಲಾ-41 ಕುಮಟಾ-27, ಹೊನ್ನಾವರ-50, ಭಟ್ಕಳ-11, ಶಿರಸಿ-19, ಸಿದ್ದಾಪುರ-15, ಯಲ್ಲಾಪುರ-10, ಮುಂಡಗೋಡ-16, ಜೊಯಿಡಾದಲ್ಲಿ-4 ಪ್ರಕರಣಗಳು ಖಚಿತವಾಗಿವೆ. 1096 ಸಕ್ರಿಯ ಪ್ರಕರಣಗಳಿವೆ. 78 ಜನ ಆಸ್ಪತ್ರೆಗಳಲ್ಲಿದ್ದಾರೆ.
ಲಸಿಕೆ ಪಡೆದ 766 ಜನರಿಗೆ ಜ್ವರ: ಒಟ್ಟು ಸಕ್ರಿಯ ಪ್ರಕರಣಗಳ ಪೈಕಿ ಕೋವಿಡ್ ಲಸಿಕೆ ಪಡೆದ 766 ಜನರಿಗೆ, ಲಸಿಕೆ ಪಡೆಯದ 82 ಜನರಿಗೆ ಕರೊನಾ ಸೋಂಕು ತಗುಲಿದೆ. ಒಟ್ಟು ಸೋಂಕಿತರಲ್ಲಿ 702 ಜನ ಎರಡು ಡೋಸ್ ಪಡೆದವರು. 57 ಜನ ಮೊದಲ ಡೋಸ್ ಮಾತ್ರ ಪಡೆದವರು, 7 ಜನ ಮೂರು ಡೋಸ್ ಪಡೆದವರಾಗಿದ್ದಾರೆ.
ವೈದ್ಯರ ಸಹಾಯವಾಣಿ: ಕೋವಿಡ್ಗೆ ಸಂಬಂಧಿಸಿದಂತೆ ತಹಸೀಲ್ದಾರ್ ಕಚೇರಿಯಿಂದ 24*7 ಸಹಾಯವಾಣಿ ಆರಂಭಿಸಲಾಗಿದೆ ಎಂದು ಕಾರವಾರ ತಹಸೀಲ್ದಾರ್ ನಿಶ್ಚಲ ನರೋನಾ ತಿಳಿಸಿದ್ದಾರೆ. ಕೋವಿಡ್ ಸಂಬಂಧಿ ಮಾಹಿತಿಗಾಗಿ ದೂರವಾಣಿ: 08382- 223350, ಮೊಬೈಲ್: 8147745176ಗೆ ಸಂರ್ಪಸಬಹುದು. ಆರೋಗ್ಯ ಸಂಬಂಧಿ ಮಾಹಿತಿಗಾಗಿ ಡಾ. ಪ್ರೀತಿ- 9901835516, ಡಾ. ಸುಚೇತಾ- 9197688380, ಡಾ. ನಾಗೇಶ- 6361576550 ಅವರನ್ನು ಸಂರ್ಪಸುವಂತೆ ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.