ಏಕಕಾಲದಲ್ಲಿ, ‘ಆನ’ ಮತ್ತು ‘ಪುಷ್ಪ’ ಸಿನಿಮಾಗಳು ಇಂದು (ಡಿ. 17) ಬಿಡುಗಡೆ ಆಗುತ್ತಿವೆ. ಬಹುಪಾಲು ತೆರೆಗಳನ್ನು ‘ಪುಷ್ಪ’ ಪಡೆದಿರುವುದರಿಂದ ‘ಆನ’ ಚಿತ್ರಕ್ಕೆ ಚಿತ್ರಮಂದಿರಗಳ ಕೊರತೆ ಎದುರಾಗಿದೆ. ‘ನಮ್ಮ ರಾಜ್ಯದಲ್ಲಿ ನಮ್ಮ ಸಿನಿಮಾಗಳಿಗೇ ಥಿಯೇಟರ್ಗಳಿಲ್ಲ ...’ ಎಂದು ತಂಡ ಅಸಮಾಧಾನ ಹೊರಹಾಕಿದೆ. ಅದರ ಜತೆಗೆ ಸಿನಿಮಾದಲ್ಲೇನಿರಲಿದೆ ಎಂಬ ಬಗ್ಗೆಯೂ ಅದಿತಿ ಹೇಳಿಕೊಂಡಿದ್ದಾರೆ. ವೃತ್ತಿ ಜೀವನದಲ್ಲಿಯೇ ವಿಶೇಷ ಸಿನಿಮಾ ಎಂದು ಹೇಳಿಕೊಳ್ಳುವ ಅದಿತಿ, ‘‘ಆನ’ ಸಿನಿಮಾ ನನ್ನ ಪಾಲಿನ ವಿಶೇಷ ಸಿನಿಮಾಗಳಲ್ಲೊಂದು. ಇಲ್ಲಿಯವರೆಗೂ ನಾನು ಕಾಣಿಸಿಕೊಳ್ಳದ ಮತ್ತು ನನಗೆ ಅಷ್ಟೇ ಸವಾಲೆನಿಸುವ, ಆಪ್ತ ಎನಿಸುವ ಪಾತ್ರವದು. ನಾಯಕನ ಜತೆಗೆ ಹೆಜ್ಜೆ ಹಾಕುತ್ತ ಇದ್ದವಳಿಗೆ ಈ ತರಹದ ಪಾತ್ರ ಸಿಕ್ಕಾಗ ಆಗುವ ಖುಷಿಯೇ ಬೇರೆ. ಸೈನ್ಸ್ ಫಿಕ್ಷನ್ ಅನಿಸಿದರೂ, ಕಮರ್ಷಿಯಲ್ ಅಂಶಗಳು ಚಿತ್ರದಲ್ಲಿವೆ. ಇದೊಂದು ಪಕ್ಕಾ ಕಮರ್ಷಿಯಲ್ ಸಿನಿಮಾ’ ಎನ್ನುತ್ತಾರೆ ಅದಿತಿ.
