ಇಸ್ಲಮಾಬಾದ್: ಪಾಕಿಸ್ತಾನದಲ್ಲಿರುವ ಚೀನಾ ಕಂಪನಿಗಳ ವಿರುದ್ಧ ಮುಸ್ಲಿಂ ಧರ್ಮಗುರುವೊಬ್ಬರು ಗಂಭೀರ ಆರೋಪ ಮಾಡಿರುವ ವಿಡಿಯೋವೊಂದು ಸಾಮಾಜಿಕ ಜಾಲತಾಣಗಳಲ್ಲಿ ವೈರಲ್ ಆಗುತ್ತಿದೆ.
ಪಾಕ್ನಲ್ಲಿರುವ ಚೀನಾದ ಕಂಪನಿಗಳು, ತಮ್ಮಲ್ಲಿ ಕೆಲಸ ಮಾಡುತ್ತಿರುವ ಪಾಕಿಸ್ತಾನದ ಉದ್ಯೋಗಿಗಳಿಗೆ ಕೆಲಸದ ಸಮಯದಲ್ಲಿ ನಮಾಜ್ ಮಾಡದಂತೆ ತಡೆ ಒಡ್ಡುತ್ತಿವೆ ಎಂದು ಧರ್ಮಗುರು ಹೇಳಿದ್ದಾರೆ. ಇಸ್ಲಾಂನ ಐದು ಆಧಾರ ಸ್ತಂಭಗಳಲ್ಲಿ ಒಂದಾದ ನಮಾಜ್ನ್ನು ಯಾರೂ ನಿರ್ಲಕ್ಷ್ಯ ಮಾಡಲು ಸಾಧ್ಯವಿಲ್ಲ. ಚೀನಾ ಮೂಲದ ಕಂಪನಿಗಳು ಪಾಕ್ಗೆ ಬಂದು, ಇಲ್ಲಿನ ನಿಯಮಗಳ ಮೇಲೆಯೇ ದಬ್ಬಾಳಿಕೆ ನಡೆಸುತ್ತಿವೆ ಎಂದು ಆರೋಪಿಸಿದ್ದಾರೆ.
ನಮಾಜ್ ಮಾಡಲು ಅವಕಾಶ ಕೊಡದ ಚೀನಾ ಕಂಪನಿಗಳ ವಿರುದ್ಧ ಪಾಕಿಸ್ತಾನಿಗಳು ತಿರುಗಿಬೀಳಬೇಕು. ಇಲ್ಲಿನ ಕಾನೂನನ್ನು ಬದಲಿಸಲು ಬರಬೇಡಿ ಎಂದು ಅವರಿಗೆ ಖಡಕ್ ಎಚ್ಚರಿಕೆ ನೀಡಬೇಕು ಎಂದು ಒತ್ತಾಯಿಸಿದ್ದಾರೆ.
ಚೀನಾ ಕಂಪನಿಗಳ ಮಾಲೀಕರು ತಮ್ಮಲ್ಲಿನ ಮುಸ್ಲಿಂ ಉದ್ಯೋಗಿಗಳಿಗೆ ಬೆದರಿಕೆ ಹಾಕುತ್ತಿದ್ದಾರೆ. ಡ್ಯೂಟಿ ಟೈಂನಲ್ಲಿ ನಮಾಜ್ ಮಾಡಿದರೆ ಕೆಲಸದಿಂದ ತೆಗೆಯುತ್ತೇವೆಂದು ಹೆದರಿಸುತ್ತಿದ್ದಾರೆ. ಆದರೆ ಮುಸ್ಲಿಮರಿಗೆ ನಮಾಜ್ ತುಂಬ ಪವಿತ್ರವಾದದ್ದು. ಯಾವ ಕಾರಣಕ್ಕೂ ಅದನ್ನು ನಾವು ನಿರ್ಲಕ್ಷಿಸಲು ಸಾಧ್ಯವೇ ಇಲ್ಲ. ಸಮಯಕ್ಕೆ ಸರಿಯಾಗಿ ನಮಾಜ್ ಮಾಡಬೇಕು. ಅದು ನಮ್ಮ ಆತ್ಮಾಭಿಮಾನದ ಪ್ರಶ್ನೆ ಎಂದಿದ್ದಾರೆ. ಇದನ್ನೂ ಓದಿ: 10 ವರ್ಷದ ಮಗನ ಆತ್ಮಹತ್ಯೆಯಿಂದ ಶಾಕ್ಗೆ ಒಳಗಾದ ತಾಯಿಯೂ ಸೂಸೈಡ್ ಮಾಡಿಕೊಂಡರು…
ಪಾಕಿಸ್ತಾನದೊಂದಿಗೆ ಚೀನಾ ಉತ್ತಮ ಸಂಬಂಧ ಕಾಯ್ದುಕೊಂಡು ಬಂದಿದೆ. ಪಾಕಿಸ್ತಾನ ಕೂಡ ಚೀನಾ ತನ್ನ ಸಾರ್ವಕಾಲಿಕ ಮಿತ್ರ ಎಂದು ಹೇಳಿಕೊಳ್ಳುತ್ತದೆ. ಈ ಮಧ್ಯೆ ಧರ್ಮಗುರುವಿನ ಈ ಮಾತುಗಳು ಅಚ್ಚರಿಗೆ ಕಾರಣವಾಗಿದೆ.(ಏಜೆನ್ಸೀಸ್)
ಇಂದೂ ರಾಜ್ಯಕ್ಕೆ ಶಾಕ್ ಕೊಟ್ಟ ಕೊವಿಡ್-19; 14 ಸಾವಿರದ ಗಡಿ ದಾಟಿದ ಸೋಂಕಿತರ ಸಂಖ್ಯೆ