ವುಹಾನ್: ಚೀನಾದಲ್ಲಿ ಕರೊನಾ ವೈರಸ್ ಹರಡುವಿಕೆ ಬಗ್ಗೆ ಮೊದಲು ಎಚ್ಚರಿಕೆ ನೀಡಿ, ವದಂತಿ ಹಬ್ಬಿಸುವ ಆರೋಪದಲ್ಲಿ ಬಂಧಿಯಾಗಿ ಅದೇ ಕರೊನಾ ವೈರಸ್ ಸೋಂಕಿನಿಂದ ಸಂಶಯಾಸ್ಪದ ರೀತಿಯಲ್ಲಿ ಸಾವಿಗೀಡಾಗಿದ್ದ ಚೀನಾ ವೈದ್ಯನ ಮರಣ ಕುರಿತು ಚೀನಾ ಸರ್ಕಾರ ವೈದ್ಯನ ಕುಟುಂಬದ ಬಳಿ ಕ್ಷಮೆಯಾಚಿಸಿದೆ.
ವೈದ್ಯ ಲಿ ವೆನ್ಲಿಯಾಂಗ್ ಸಾವಿನ ತನಿಖಾ ವರದಿಯಲ್ಲಿ ಉಲ್ಲೇಖವಾಗಿರುವಂತೆ ವೆನ್ಲಿಯಾಂಗ್ ಯಾವುದೇ ವದಂತಿಯನ್ನು ಹಬ್ಬಿಸುವ ಮೂಲಕ ಸಾರ್ವಜನಿಕ ಆದೇಶಕ್ಕೆ ಭಂಗ ಉಂಟುಮಾಡಿಲ್ಲ. ಇದರ ಬದಲಾಗಿ ಕರೊನಾ ವೈರಸ್ ವಿರುದ್ಧ ಧೈರ್ಯವಾಗಿ ಹೋರಾಡಿದರು ಎಂದು ಹೇಳಲಾಗಿದೆ. ಅಲ್ಲದೆ ವೈದ್ಯನ ವಿರುದ್ಧದ ಖಂಡನೆಗಳನ್ನು ಹಿಂಪಡೆಯುವಂತೆ ವರದಿಯು ಶಿಫಾರಸು ಮಾಡಿದೆ.
34 ವರ್ಷದ ವೆನ್ಲಿಯಾಂಗ್ ಓರ್ವ ನೇತ್ರಶಾಸ್ತ್ರಜ್ಞರಾಗಿದ್ದರು. ವುಹಾನ್ನ ಕೇಂದ್ರೀಯ ಆಸ್ಪತ್ರೆಯಲ್ಲಿ ಕಾರ್ಯನಿರ್ವಹಿಸುತ್ತಿದ್ದರು. ಡಿಸೆಂಬರ್ 30ರಲ್ಲಿ ತನ್ನ ಸ್ನೇಹಿತನಿಗೆ ಖಾಸಗಿ ಸಂದೇಶದ ಮೂಲಕ ಜಿಲ್ಲೆಯಾದ್ಯಂತ ಸೋಂಕು ಹರಡುತ್ತಿರುವುದಾಗಿ ತಿಳಿಸಿದ್ದರು. ತನ್ನ ಆಸ್ಪತ್ರೆಯಲ್ಲಿ 7 ರೋಗಿಗಳು ದಾಖಲಾಗಿದ್ದಾರೆ. ಅವರಿಗೆ ಸಾರ್ಸ್ ರೀತಿಯ ರೋಗದ ಲಕ್ಷಣಗಳು ಕಾಣಿಸಿಕೊಂಡಿವೆ. ದಾಖಲಾಗಿರುವ ಏಳು ರೋಗಿಯೂ ಹುಬೇ ಪ್ರಾಂತ್ಯದ ವುಹಾನ್ನಲ್ಲಿನ ಒಂದೇ ಸಮುದ್ರ ಆಹಾರ ಮಾರುಕಟ್ಟೆಯಲ್ಲಿ ಪ್ರಾಣಿ ಮಾಂಸವನ್ನು ಸೇವಿಸಿದ್ದಾರೆ ಎಂದು ಮಾಹಿತಿ ನೀಡಿದ್ದರು.
ಇದಾದ ಕೆಲವೇ ದಿನಗಳಲ್ಲಿ ವೆನ್ಲಿಯಾಂಗ್ ಅವರನ್ನು ವದಂತಿ ಹಬ್ಬಿಸುತ್ತಿದ್ದಾರೆ ಎಂಬ ಆರೋಪದಲ್ಲಿ ಬಂಧಿಸಲಾಗಿತ್ತು. ಅಲ್ಲದೆ, ಸಾಮಾಜಿಕ ಆದೇಶಕ್ಕೆ ಭಂಗವುಂಟು ಮಾಡಿ, ಕಾನೂನು ಉಲ್ಲಂಘಿಸಿದ್ದೇನೆ ಎಂದು ಒಪ್ಪಿಕೊಳ್ಳುವಂತೆ ಬಲವಂತ ಮಾಡಲಾಗಿತ್ತು. ಇದಾದ ಒಂದು ವಾರದಲ್ಲಿ ವೆನ್ಲಿಯಾಂಗ್ಗೆ ಜ್ವರ ಕಾಣಿಸಿಕೊಂಡಿತ್ತು. ಜನವರಿ ಅಂತ್ಯದಲ್ಲಿ ಪರೀಕ್ಷೆಗೆ ಒಳಗಾದಾಗ ಕೋವಿಡ್-19 ಇರುವುದು ಧೃಡವಾಗಿತ್ತು. ವೈರಸ್ ಸೋಂಕಿನಿಂದಲೇ ಫೆ. ಆರಂಭದಲ್ಲಿ ವೆನ್ಲಿಯಾಂಗ್ ಸಾವಿಗೀಡಾಗಿದ್ದಾರೆ ಎಂಬ ಸುದ್ದಿ ಚೀನಾದಲ್ಲಿ ಕಾಡ್ಗಿಚ್ಚಿನಂತೆ ಹಬ್ಬಿತ್ತು.
ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶ
ವೆನ್ಲಿಯಾಂಗ್ ಸಾವಿನ ಸುದ್ದಿ ಹೊರಬೀಳುತ್ತಿದ್ದಂತೆ ಸಾಮಾಜಿಕ ಜಾಲತಾಣದಲ್ಲಿ ಆಕ್ರೋಶಗಳು ವ್ಯಕ್ತವಾಗತೊಡಗಿದವು. ಈ ವಿಚಾರದಲ್ಲಿ ಸರ್ಕಾರದ ವಿರುದ್ಧವೇ ಬೊಟ್ಟು ಮಾಡಲಾಗಿತ್ತು. ಸಾರ್ವಜನಿಕ ವಲಯದಲ್ಲಿ ತೀವ್ರ ಆಕ್ರೋಶ ವ್ಯಕ್ತವಾಗುತ್ತಿದ್ದಂತೆ ಚೀನಾ ಸರ್ಕಾರ ವೆನ್ಲಿಯಾಂಗ್ ಸಾವಿನ ತನಿಖೆಗೆ ಆದೇಶಿಸಿತ್ತು.
ಇದಕ್ಕೆ ಸಂಬಂಧಿಸಿದ ವರದಿಯನ್ನು ಚೀನಾ ಸರ್ಕಾರದ ತನಿಖಾ ಸಂಸ್ಥೆ ನೀಡಿದೆ. ವೆನ್ಲಿಯಾಂಗ್ ಸಾರ್ವಜನಿಕ ಆದೇಶಕ್ಕೆ ಭಂಗ ಉಂಟುಮಾಡಿಲ್ಲ. ಇದರ ಬದಲಾಗಿ ವೃತ್ತಿಪರತೆ ಮೆರೆದು, ಕರೊನಾ ವೈರಸ್ ವಿರುದ್ಧ ಹೋರಾಡಿ ತಮ್ಮ ಪ್ರಾಣವನ್ನೇ ತ್ಯಾಗ ಮಾಡಿದರು ಎಂದು ವರದಿಯಲ್ಲಿ ತಿಳಿಸಲಾಗಿದೆ. ಆರಂಭದಲ್ಲಿ ಕರೊನಾ ವೈರಸ್ ಭೀಕರತೆ ಇಲ್ಲದಿದ್ದರಿಂದ ವೆನ್ಲಿಯಾಂಗ್ಗೂ ಕೂಡ ಖಚಿತ ಮಾಹಿತಿ ಇರಲಿಲ್ಲ ಎಂದು ತಿಳಿದುಬಂದಿದೆ. ವರದಿಯ ಬೆನ್ನಲ್ಲೇ ಚೀನಾ ಸರ್ಕಾರ ಮೃತ ವೈದ್ಯನ ಕುಟುಂಬದ ಬಳಿ ಕ್ಷಮೆಯಾಚಿಸಿದೆ.
ಇದೇ ವೇಳೆ ವೆನ್ಲಿಯಾಂಗ್ರನ್ನು ಬಂಧಿಸಿದ ಪೊಲೀಸ್ ಅಧಿಕಾರಿಗಳಿಗೂ ಎಚ್ಚರಿಕೆಯನ್ನು ನೀಡಲಾಗಿದ್ದು, ಚೀನಾ ಸರ್ಕಾರದ ನಿರ್ಲಕ್ಯದಿಂದ ಓರ್ವ ಅಮಾಯಕ ಹಾಗೂ ದಿಟ್ಟ ವೈದ್ಯರನ್ನು ಕಳೆದುಕೊಂಡಂತಾಗಿದ್ದು, ಸಾರ್ವಜನಿಕ ವಲಯದಲ್ಲೂ ತೀವ್ರ ಟೀಕೆ ವ್ಯಕ್ತವಾಗಿವೆ. (ಏಜೆನ್ಸೀಸ್)
ಕೊರೊನಾ ವೈರಸ್ ಮೊದಲು ಪತ್ತೆ ಹಚ್ಚಿ ಬಂಧನವಾಗಿದ್ದ ಚೀನಾ ವೈದ್ಯ ವೈರಸ್ನಿಂದಲೇ ಮೃತ
ಕೊರೊನಾ ವೈರಸ್ ಮೊದಲು ಪತ್ತೆಹಚ್ಚಿ ವೈರಸ್ನಿಂದಲೇ ವೈದ್ಯನ ಸಾವು ಪ್ರಕರಣ: ತೀವ್ರ ಟೀಕೆಯ ಬಳಿಕ ತನಿಖೆಗೆ ಆದೇಶ