ರಾಜ್ಕೋಟ್: ಐಪಿಎಲ್ನಲ್ಲಿ ರಾಜಸ್ಥಾನ ರಾಯಲ್ಸ್ ಪರ ಮಿಂಚಿದ್ದ ಸೌರಾಷ್ಟ್ರದ ಯುವ ವೇಗಿ ಚೇತನ್ ಸಕಾರಿಯಾ ಅವರ ತಂದೆ ಕಂಜಿಭಾಯ್ ಸಕಾರಿಯಾ ಕರೊನಾ ಸೋಂಕಿನಿಂದ ನಿಧನ ಹೊಂದಿದ್ದಾರೆ. ಕಳೆದ ಕೆಲ ದಿನಗಳಿಂದ ಸೋಂಕಿನ ಜತೆಗೆ ಹೋರಾಡುತ್ತಿದ್ದ 42 ವರ್ಷದ ಕಂಜಿಭಾಯ್ ಭಾನುವಾರ ಭಾವ್ನಗರದ ಆಸ್ಪತ್ರೆಯಲ್ಲಿ ಕೊನೆಯುಸಿರೆಳೆದರು.
22 ವರ್ಷದ ಎಡಗೈ ವೇಗಿ ಚೇತನ್ ಸಕಾರಿಯಾ ಇತ್ತೀಚೆಗೆ ಸ್ಥಗಿತಗೊಂಡ ಐಪಿಎಲ್ 14ನೇ ಆವೃತ್ತಿಯಲ್ಲಿ ರಾಜಸ್ಥಾನ ರಾಯಲ್ಸ್ ಪರ ಆಡಿದ 7 ಪಂದ್ಯಗಳಲ್ಲಿ 7 ವಿಕೆಟ್ ಕಬಳಿಸಿ ಗಮನಸೆಳೆದಿದ್ದರು. ಸಯ್ಯದ್ ಮುಸ್ತಾಕ್ ಅಲಿ ಟ್ರೋಫಿ ಮತ್ತು ವಿಜಯ್ ಹಜಾರೆ ಟ್ರೋಫಿಯಲ್ಲಿ ಸೌರಾಷ್ಟ್ರ ಪರ ಉತ್ತಮ ನಿರ್ವಹಣೆ ತೋರಿದ್ದ ಸಕಾರಿಯಾ ಅವರನ್ನು ಕಳೆದ ಹರಾಜಿನಲ್ಲಿ ರಾಜಸ್ಥಾನ ತಂಡ 1.20 ಕೋಟಿ ರೂ. ಮೊತ್ತಕ್ಕೆ ಖರೀದಿಸಿತ್ತು. ಕಳೆದ ವರ್ಷದ ಐಪಿಎಲ್ ವೇಳೆ ಅವರು ಆರ್ಸಿಬಿ ತಂಡದ ನೆಟ್ ಬೌಲರ್ ಆಗಿದ್ದರು.
ಇದನ್ನೂ ಓದಿ: ಐಪಿಎಲ್ ಟೂರ್ನಿಯ ಉಳಿದ ಭಾಗ ಭಾರತದಲ್ಲಿ ನಡೆಯಲ್ಲ ಎಂದ ಗಂಗೂಲಿ
ಸಕಾರಿಯಾಗೆ ನೋವಿನ ಮೇಲೆ ನೋವು
ಚೇತನ್ ಸಕಾರಿಯಾ ಕುಟುಂಬಕ್ಕೆ ಈ ವರ್ಷ ಶೋಕದ ಮೇಲೆ ಶೋಕ ಎದುರಾಗಿದೆ. ಈ ಮುನ್ನ ಅವರ ಅಣ್ಣ ಆತ್ಮಹತ್ಯೆ ಮಾಡಿಕೊಂಡಿದ್ದರು. ಇದರಿಂದಾಗಿ ಕುಟುಂಬದ ಭಾರವೆಲ್ಲ ಚೇತನ್ ಸಕಾರಿಯಾ ಹೆಗಲ ಮೇಲೆ ಬಿದ್ದಿತ್ತು. ಟೆಂಪೋ ಚಾಲಕರಾಗಿದ್ದ ಚೇತನ್ ಸಕಾರಿಯಾ ತಂದೆ ಪುತ್ರದ ಕ್ರಿಕೆಟ್ ತರಬೇತಿ ವೆಚ್ಚ ಭರಿಸಲು ಅಪಾರವಾಗಿ ಶ್ರಮಿಸಿದ್ದರು. ಚೇತನ್ ಸೌರಾಷ್ಟ್ರ ಪರ 15 ಪ್ರಥಮ ದರ್ಜೆ ಪಂದ್ಯ ಆಡಿದ್ದು, 41 ವಿಕೆಟ್ ಕಬಳಿಸಿದ್ದಾರೆ.
It pains us so much to confirm that Mr Kanjibhai Sakariya lost his battle with Covid-19 earlier today.
We're in touch with Chetan and will provide all possible support to him and his family in this difficult time.
— Rajasthan Royals (@rajasthanroyals) May 9, 2021
ಚೇತನ್ ಸಕಾರಿಯಾ ತಂದೆಯ ನಿಧನಕ್ಕೆ ರಾಜಸ್ಥಾನ ರಾಯಲ್ಸ್ ತಂಡ ಸಂತಾಪ ಸೂಚಿಸಿದ್ದು, ನಾವು ಚೇತನ್ ಜತೆಗೆ ಸಂಪರ್ಕದಲ್ಲಿದ್ದು, ಈ ಕಠಿಣ ಸಮಯದಲ್ಲಿ ಅವರಿಗೆ ಅಗತ್ಯವಿರುವ ಎಲ್ಲ ಸಹಾಯವನ್ನೂ ಮಾಡಲಿದ್ದೇವೆ ಎಂದು ಹೇಳಿದೆ.
ಐಪಿಎಲ್ನಿಂದ ತವರಿಗೆ ಮರಳುವ ಮುನ್ನ ಗುಡ್ನ್ಯೂಸ್ ಪಡೆದ ಪ್ಯಾಟ್ ಕಮ್ಮಿನ್ಸ್!