ತಿರುವನಂತಪುರ: ಭೂಕಕ್ಷೆಯಲ್ಲಿ ಸುತ್ತುತ್ತಿರುವ ಚಂದ್ರಯಾನ-3ರ ಬಾಹ್ಯಾಕಾಶ ನೌಕೆಯನ್ನು ಕಕ್ಷೆಗೆ ಏರಿಸುವ ಮೂಲಕ ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ಯ ವಿಜ್ಞಾನಿಗಳು ಮೊದಲ ಹಂತದ ಪ್ರಕ್ರಿಯೆಯಲ್ಲಿ ಯಶಸ್ಸು ಸಾಧಿಸಿದ್ದಾರೆ.
ಪ್ರಪಲ್ಶನ್ ಮಾಡ್ಯೂಲ್ನಲ್ಲಿ ಇಂಧನವನ್ನು ಸುಡುವ ಮೂಲಕ ಅದಕ್ಕೆ ಅಗತ್ಯವಾದ ನೂಕು ಬಲವನ್ನು ನೀಡಿ ಈ ಹಂತವನ್ನು ಶನಿವಾರ ಪೂರ್ಣಗೊಳಿಸಲಾಗಿದೆ. ಸದ್ಯ ಬಾಹ್ಯಾಕಾಶ ನೌಕೆಯ ಸ್ಥಿತಿ ಉತ್ತಮವಾಗಿದೆ ಎಂದು ಇಸ್ರೋ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.
ಬೆಂಗಳೂರಿನಲ್ಲಿರುವ ಇಸ್ರೋದ ಟೆಲಿಮೆಟ್ರಿ, ಟ್ರ್ಯಾಕಿಂಗ್ ಮತ್ತು ಕಮಾಂಡ್ ನೆಟ್ವರ್ಕ್ ಸೆಂಟರ್ನಿಂದ ನೌಕೆಯನ್ನು ಕಕ್ಷೆಗೆ ಏರಿಸುವ ಪ್ರಕ್ರಿಯೆಯನ್ನು ಯಶಸ್ವಿಯಾಗಿ ನಿರ್ವಹಣೆ ಮಾಡಲಾಗಿದೆ. ಇದೇ ಸಂದರ್ಭದಲ್ಲಿ ಇಸ್ರೋ LVM3 ರಾಕೆಟ್ ಬಳಸಿ ಚಂದ್ರಯಾನ 3 ಉಡಾವಣೆ ಮಾಡಿದ ದೃಶ್ಯಗಳನ್ನು ಬಿಡುಗಡೆ ಮಾಡಿದೆ. ರಾಕೆಟ್ನಲ್ಲಿ ಅಳವಡಿಸಲಾಗಿದ್ದ ಕ್ಯಾಮೆರಾಗಳಲ್ಲಿ ಈ ದೃಶ್ಯಾವಳಿ ಸೆರೆಯಾಗಿದೆ. ಇದರಲ್ಲಿ ರಾಕೆಟ್ನ ಭಾಗಗಳನ್ನು ಬೇರ್ಪಡಿಸಿ ಬಾಹ್ಯಾಕಾಶ ನೌಕೆಯನ್ನು ಉಡಾವಣೆ ಮಾಡುತ್ತಿರುವ ದೃಶ್ಯಗಳಿವೆ.
ಅಂದಹಾಗೆ ಚಂದ್ರಯಾನ 3 ಭಾರತದ ಮಹತ್ವಾಕಾಂಕ್ಷಿ ಯೋಜನೆಯಾಗಿದೆ. ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) 15 ವರ್ಷದಲ್ಲಿ ಚಂದ್ರನ ಅಧ್ಯಯನಕ್ಕೆ ಕಳುಹಿಸುತ್ತಿರುವ ಮೂರನೇ ನೌಕೆ ಇದಾಗಿದ್ದು, ‘ಬಾಹುಬಲಿ’ ಎಂದು ಕರೆಯಲಾಗುವ ಎಲ್ವಿಎಂ3-ಎಂ4 (ಜಿಎಸ್ಎಲ್ವಿಎಂಕೆ-3) ರಾಕೆಟ್ ಇದನ್ನು ಹೊತ್ತೊಯ್ದಿದೆ. ಇದರಲ್ಲಿ ಮೂರು ಭಾಗಗಳಿದ್ದು, ರಾಕೆಟ್ಗೆ ಅಗತ್ಯ ಇಂಧನ ಒದಗಿಸುವ ಪ್ರಪಲ್ಶನ್, ಗಗನನೌಕೆಯಲ್ಲಿ ಮಹತ್ವದ್ದಾದ ಲ್ಯಾಂಡರ್ ಮತ್ತು ರೋವರ್ಗಳು ಸೇರಿ 3,900 ಕೆ.ಜೆ. ತೂಕ ಹೊಂದಿತ್ತು. ಉಡಾವಣೆಯಾದ 16 ನಿಮಿಷದಲ್ಲಿ ರಾಕೆಟ್ನಿಂದ ನೌಕೆ ಬೇರ್ಪಟ್ಟಿದೆ. ಆಗಸ್ಟ್ 23ರಂದು ಚಂದ್ರನ ದಕ್ಷಿಣ ಧ್ರುವದಲ್ಲಿ ಲ್ಯಾಂಡರ್ ಮೃದುವಾಗಿ ಇಳಿಯಲಿದೆ (ಸಾಫ್ಟ್ ಲ್ಯಾಂಡಿಂಗ್). 2019ರಲ್ಲಿ ಚಂದ್ರಯಾನ-2 ಈ ರೀತಿಯ ಲ್ಯಾಂಡಿಂಗ್ನಲ್ಲಿ ವಿಫಲವಾಗಿತ್ತು. (ಏಜೆನ್ಸೀಸ್)
ಚಂದ್ರಯಾನ-3: ಯಶಸ್ವಿ ಉಡಾವಣೆ; 16 ನಿಮಿಷಕ್ಕೆ ರಾಕೆಟ್ನಿಂದ ಬೇರ್ಪಟ್ಟ ನೌಕೆ, ಚಂದ್ರನಲ್ಲಿಗೆ 40 ದಿನದ ಪಯಣ
ಕಾನೂನು ಹೋರಾಟಕ್ಕೆ ಸುದೀಪ್ ಸಜ್ಜು: ಸಂಧಾನಕ್ಕೆ ಒಪ್ಪದ ಕಿಚ್ಚ ಕೋರ್ಟ್ ಮೆಟ್ಟಿಲೇರಲು ಇದೇ ಕಾರಣ!