ಹಾಥರಸ್: ದೇಶದ ಗಮನವನ್ನೇ ಸೆಳೆದಿದ್ದ ಹಾಥರಸ್ ಅತ್ಯಾಚಾರ ಪ್ರಕರಣವನ್ನು ಉತ್ತರ ಪ್ರದೇಶ ಸರ್ಕಾರ ಸಿಬಿಐ ತಂಡಕ್ಕೆ ವಹಿಸಿದ್ದು, ಇದೀಗ ಮಹತ್ವದ ಸಾಕ್ಷ್ಯವೊಂದು ಸಿಬಿಐ ಅಧಿಕಾರಿಗಳಿಗೆ ಸಿಕ್ಕಿದೆ.
ಪ್ರಕರಣದ ತನಿಖೆ ನಡೆಸುತ್ತಿರುವ ಸಿಬಿಐ ತಂಡ ಆರೋಪಿಗಳಲ್ಲಿ ಒಬ್ಬನಾಗಿರುವ ಲವಕುಶ್ ಸಿಕರ್ವರ್ ಎಂಬಾತನ ಮನೆಗೆ ತೆರಳಿ ಪರಿಶೀಲನೆ ನಡೆಸಿದ್ದು, ಈ ಸಂದರ್ಭದಲ್ಲಿ ಅಲ್ಲಿ ಕೆಂಪು ಕಲೆಗಳಿರುವ ಅಂಗಿವೊಂದು ಸಿಕ್ಕಿದೆ. ಇದನ್ನು ಫೊರೆನ್ಸಿಕ್ ಸೈನ್ಸ್ ವಿಭಾಗಕ್ಕೆ ಕಳಿಸಲಿರುವ ತಂಡ, ಕೆಂಪು ಕಲೆಗಳು ರಕ್ತದ್ದೂ ಆಗಿರಬಹುದು ಎಂದು ಅಭಿಪ್ರಾಯಪಟ್ಟಿದೆ.
ಆದರೆ ಆರೋಪಿಯ ಮನೆಯವರು ಈ ಆರೋಪವನ್ನು ತಳ್ಳಿ ಹಾಕಿದ್ದಾರೆ. ಲವಕುಶ್ ಪೇಂಟ್ ಫ್ಯಾಕ್ಟರಿಯೊಂದರಲ್ಲಿ ಕೆಲಸ ಮಾಡುತ್ತಿದ್ದು, ಅದು ಪೇಂಟ್ ಕಲೆ ಎಂದು ಆತನ ಸಹೋದರ ರವಿ ಸಿಕರ್ವರ್ ತಿಳಿಸಿದ್ದಾನೆ.
ಸಿಬಿಐ ಅಧಿಕಾರಿಗಳು ಮನೆಯಲ್ಲಿ ಸುಮಾರು ಎರಡು ಗಂಟೆ ಕಾಲ ಜಾಲಾಡಿದ್ದು, ಅವರಿಗೆ ಅಂತಹ ಸುಳಿವೇನೂ ಸಿಗಲಿಲ್ಲ. ಹೀಗಾಗಿ ಅವರು ಪೇಂಟ್ನಿಂದ ಕಲೆ ಆಗಿರುವ ಅಂಗಿ ಕೊಂಡೊಯ್ದಿದ್ದಾರೆ ಎಂದು ಆರೋಪಿಯ ಕಿರಿಯ ಸಹೋದರ ಲಲಿತ್ ಸಿಕರ್ವರ್ ತಿಳಿಸಿದ್ದಾನೆ. ಹಾಥರಸ್ನಲ್ಲಿ ಸೆ. 14ರಂದು 19 ವರ್ಷದ ಹುಡುಗಿ ಮೇಲೆ ನಾಲ್ವರು ಅತ್ಯಾಚಾರ ಎಸಗಿದ್ದು, ಬಳಿಕ ಯುವತಿ ಮೃತಪಟ್ಟಿದ್ದಳು. (ಏಜೆನ್ಸೀಸ್)