ನವದೆಹಲಿ: ಐದು ರಾಜ್ಯಗಳಲ್ಲಿ ವಿಧಾನಸಭೆ ಚುನಾವಣೆ ಮುಕ್ತಾಯವಾಗಿದ್ದು, ಇಂದಿನಿಂದ ಎಲ್ ಪಿಜಿ ಸಿಲಿಂಡರ್ ಬೆಲೆಯಲ್ಲಿ ಏರಿಕೆಯಾಗಿದೆ. 19 ಕೆಜಿ ವಾಣಿಜ್ಯ ಬಳಕೆ ಗ್ಯಾಸ್ ಸಿಲಿಂಡರ್ ಮೇಲೆ ಈ ಹೆಚ್ಚಳ ಕಂಡುಬಂದಿದ್ದು, ಪ್ರತಿ ಸಿಲಿಂಡರ್ಗೆ 21 ರೂ. ಹೆಚ್ಚಾಗಿದೆ. ಇಂದಿನಿಂದ, ಡಿಸೆಂಬರ್ 1, 2023 ರಿಂದ, ರಾಜಧಾನಿ ದೆಹಲಿಯಲ್ಲಿ ವಾಣಿಜ್ಯ ಬಳಕೆ ಗ್ಯಾಸ್ ಸಿಲಿಂಡರ್ಗೆ 1796.50ರೂ. ಪಾವತಿಸಬೇಕಾಗುತ್ತದೆ, ಆದರೆ ಕಳೆದ ತಿಂಗಳು ವಾಣಿಜ್ಯ ಬಳಕೆ ಎಲ್ಪಿಜಿ ಗ್ಯಾಸ್ ಸಿಲಿಂಡರ್ ಬೆಲೆ ಪ್ರತಿ ಸಿಲಿಂಡರ್ಗೆ 1775.50 ರೂ.ಆಗಿತ್ತು.
ಗೃಹಬಳಕೆ ಎಲ್ಪಿಜಿ ಸಿಲಿಂಡರ್ ಬೆಲೆಯಲ್ಲಿ ಬದಲಾವಣೆಯಿಲ್ಲ
ಸಬ್ಸಿಡಿ ಸಹಿತ 14.2 ಕೆಜಿ ದೇಶೀಯ ಎಲ್ಪಿಜಿ ಬೆಲೆಯಲ್ಲಿ ಯಾವುದೇ ಹೆಚ್ಚಳವಾಗಿಲ್ಲ ಅಥವಾ ಗ್ಯಾಸ್ ಸಿಲಿಂಡರ್ಗಳ ದರಗಳಲ್ಲಿ ಯಾವುದೇ ಬದಲಾವಣೆಯನ್ನು ಮಾಡಲಾಗಿಲ್ಲ. ಹಾಗಾದರೆ ಇಂದಿನಿಂದ ವಾಣಿಜ್ಯ ಬಳಕೆ ಎಲ್ಪಿಜಿ ಸಿಲಿಂಡರ್ಗಳ ಬೆಲೆಯನ್ನು ತೈಲ ಮಾರುಕಟ್ಟೆ ಕಂಪನಿಗಳು ಎಷ್ಟಕ್ಕೆ ಹೆಚ್ಚಿಸಿವೆ ಎಂಬುದನ್ನು ನೋಡೋಣ…
ಯಾವ ನಗರದಲ್ಲಿ ಎಷ್ಟು?
ಬೆಂಗಳೂರಿನಲ್ಲಿ 19 ಕೆಜಿ ವಾಣಿಜ್ಯ ಸಿಲಿಂಡರ್ ಬೆಲೆಯಲ್ಲಿ 26 ರೂಪಾಯಿ ಏರಿಕೆಯಾಗಿದ್ದು, 1883 ರೂಪಾಯಿಗೆ ತಲುಪಿದೆ. ಇನ್ನು 14.2 ಕೆಜಿ ಮತ್ತು 5 ಕೆಜಿಯ ಡೊಮೆಸ್ಟಿಕ್ ಗ್ಯಾಸ್ ಬೆಲೆ ಸ್ಥಿರವಾಗಿದೆ. ಕರ್ನಾಟಕದ ಅನೇಕ ಕಡೆಗಳಲ್ಲಿ ಗ್ಯಾಸ್ ದರ ಬಹುತೇಕ ಒಂದೇ ಆಗಿದೆ.
ದೆಹಲಿ 1796.50 ರೂ.
ಕೋಲ್ಕತ್ತಾ 1908.00 ರೂ.
ಮುಂಬೈ 1749.00 ರೂ.
ಚೆನ್ನೈ 1968.50 ರೂ.
ಕಳೆದ ತಿಂಗಳು 100 ರೂ. ಹೆಚ್ಚಳ
ಕಳೆದ ತಿಂಗಳ ಮೊದಲನೇ ತಾರೀಖಿನಂದು ಅಂದರೆ ನವೆಂಬರ್ 1ರಂದು ಸಹ ಎಲ್ಪಿಜಿ ಸಿಲಿಂಡರ್ ಬೆಲೆಯನ್ನು 101.50 ರೂ. ಹೆಚ್ಚಿಸಲಾಗಿತ್ತು. ಅಕ್ಟೋಬರ್ 1 ರಂದು ಎಲ್ಪಿಜಿ 1731.50 ರೂ.ನಷ್ಟಿತ್ತು. ಆದರೆ ನವೆಂಬರ್ 1 ರಂದು ಪ್ರತಿ ಸಿಲಿಂಡರ್ಗೆ 1833 ರೂ.ಆಯಿತು. ಇದಾದ ಬಳಿಕ ನವೆಂಬರ್ 16ರಂದು ವಾಣಿಜ್ಯ ಗ್ಯಾಸ್ ಸಿಲಿಂಡರ್ ಬೆಲೆ ಇಳಿಕೆಯಾಗಿ 57.05 ರೂ.ಗಳಷ್ಟು ಅಗ್ಗವಾಗಿ 1775.50 ರೂ.ಗೆ ಬಂದಿತ್ತು.
ಎಟಿಎಫ್ ಬೆಲೆ ಕಡಿತ
ತೈಲ ಮಾರುಕಟ್ಟೆ ಕಂಪನಿಗಳು ಡಿಸೆಂಬರ್ 1 ರಂದು ಏವಿಯೇಷನ್ ಟರ್ಬೈನ್ ಇಂಧನದ (ಎಟಿಎಫ್) ಬೆಲೆಯನ್ನು ಕಡಿಮೆ ಮಾಡಿದೆ. ದೇಶೀಯ ವಿಮಾನಯಾನ ಸಂಸ್ಥೆಗಳಿಗೆ ಈಗ ರಾಜಧಾನಿ ದೆಹಲಿಯಲ್ಲಿ 1,06,155.67 ರೂ., ಕೋಲ್ಕತ್ತಾದಲ್ಲಿ 1,44,639.70 ರೂ., ಮುಂಬೈನಲ್ಲಿ 99,223.44 ರೂ. ಮತ್ತು ಚೆನ್ನೈನಲ್ಲಿ ಪ್ರತಿ ಕಿಲೋ ಲೀಟರ್ಗೆ 1,09,966.39 ರೂ. ಇಳಿಕೆಯೊಂದಿಗೆ, ವಿಮಾನ ದರದಲ್ಲಿ ಪ್ರಯಾಣಿಕರಿಗೆ ನಿಟ್ಟುಸಿರು ಬಿಡುವಂತಾಗಿದೆ. ಇದರರ್ಥ ದೇಶದಲ್ಲಿ ವಿಮಾನ ಪ್ರಯಾಣವು ಅಗ್ಗವಾಗಬಹುದು.
ದುಬಾರಿಯಾಗುವುದರ ಪರಿಣಾಮವೇನು?
ವಾಣಿಜ್ಯ ಅನಿಲದ ಬೆಲೆ ಏರಿಕೆಯ ಪರಿಣಾಮವು ಆಹಾರ ಉದ್ಯಮ ಮತ್ತು ರೆಸ್ಟೋರೆಂಟ್ ವ್ಯವಹಾರದ ಮೇಲೆ ಹೆಚ್ಚು ಗೋಚರಿಸುತ್ತದೆ. ಸಾಮಾನ್ಯ ಜನರಿಗೆ ಹೊರಗೆ ತಿನ್ನುವುದು ಹೆಚ್ಚು ದುಬಾರಿಯಾಗಲಿದೆ ಮತ್ತು ಅವರಿಗೆ ಈ ಬಜೆಟ್ ದುಬಾರಿಯಾಗಲಿದೆ.