ಬೆಂಗಳೂರು: ಬೆಂಗಳೂರು ಉಪನಗರ ರೈಲ್ವೆ ಯೋಜನೆ(ಕೆ-ರೈಡ್) ಕಾರಿಡಾರ್-4ರ ಸಿವಿಲ್ ನಿರ್ಮಾಣ ಕಾಮಗಾರಿಯ ಟೆಂಡರ್ನ್ನು ಲಾರ್ಸನ್‌ ಆ್ಯಂಡ್ ಟೂಬ್ರೊ(ಎಲ್ ಆ್ಯಂಡ್ ಟಿ) ಕಂಪೆನಿ ಪಡೆದುಕೊಳ್ಳುವಲ್ಲಿ ಯಶಸ್ವಿಯಾಗಿದೆ.
ಕಾಮಗಾರಿ ವಿನ್ಯಾಸ ಮತ್ತು ನಿರ್ಮಾಣ ಒಪ್ಪಂದ ಮೊತ್ತವು 1040.51 ಕೋಟಿ ರೂ. ಆಗಿದ್ದು, 30 ತಿಂಗಳ ಗುತ್ತಿಗೆ ಅವಧಿ ಹೊಂದಿದೆ. ಕಾರಿಡಾರ್-4 ಕನಕ ಮಾರ್ಗವು ಇಪಿಸಿ ಮಾದರಿಯಲ್ಲಿ ಹೀಲಲಿಗೆಯಿಂದ ರಾಜಾನುಕುಂಟೆ ವರೆಗೆ 48 ಕಿ.ಮೀ ಉದ್ದವಿದ್ದು, 8.9 ಕಿ.ಮೀ ಎತ್ತರಿಸಿದ ವಿಭಾಗ ಹಾಗೂ 37.9 ಕಿ.ಮೀ(ನಿಲ್ದಾಣ ಕಟ್ಟಡಗಳನ್ನು ಹೊರತುಪಡಿಸಿ) ಸಮತಲ ವಿಭಾಗಗಳನ್ನು ಒಳಗೊಂಡಿದೆ.
ನಿರ್ಮಾಣ ಕಾಮಗಾರಿಯ ಒಪ್ಪಂದವು ಯಲಹಂಕದ ಬಳಿ (ಬಿಎಸ್ಆರ್ಪಿ) ಕಾರಿಡಾರ್-1 ಮತ್ತು ಕಾರಿಡಾರ್-4ಗಾಗಿ 1.2 ಕಿ.ಮೀ ಉದ್ದದ ಡಬಲ್ ಡೆಕ್ಕರ್ ಜೋಡಣೆಯ ನಿರ್ಮಾಣವನ್ನು ಒಳಗೊಂಡಿದೆ. ಜತೆಗೆ ಬೆನ್ನಿಗಾನಹಳ್ಳಿ ಬಳಿ ಬಿಎಂಆರ್ಸಿಎಲ್ ವಾಯಡಕ್ಟ್ನ ಕೆಳಗೆ 500 ಮೀ. ಉದ್ದದ ಬಿಎಸ್ಆರ್ಪಿ ಎತ್ತರಿಸಿದ ವಿಭಾಗ ನಿರ್ಮಾಣವನ್ನು ಹೊಂದಿದೆ. ಇದು ಬಿಎಸ್ಆರ್ಪಿ ಮತ್ತು ಬಿ ಎಂಆರ್ಸಿಎಲ್ ನಡುವೆ ಸಮಮಾರ್ಗವನ್ನು ಹಂಚಿಕೊಳ್ಳುತ್ತದೆ. ದೇಶದಲ್ಲಿ ಇದೇ ಮೊದಲ ಬಾರಿಗೆ ಈ ಮಾದರಿಯ ಕಾಮಗಾರಿಯನ್ನು ಕೈಗೆತ್ತಿಕೊಳ್ಳಲಾಗುತ್ತಿದೆ.
ಈ ಹಿಂದೆ, ಕಾರಿಡಾರ್-2 (ಚಿಕ್ಕಬಾಣಾವರದಿಂದ ಬೈಯಪ್ಪನಹಳ್ಳಿಗೆ 25.2 ಕಿಮೀ) ಕಾಮಗಾರಿಯನ್ನು ಕೂಡ ಎಲ್ ಆ್ಯಂಡ್ ಟಿ ಕಂಪೆನಿ ನಿರ್ವಹಿಸುತ್ತಿದ್ದು, ಪ್ರಗತಿ ಕಾರ್ಯವು ಭರದಿಂದ ಸಾಗುತ್ತಿದೆ. ಪ್ರಸ್ತುತ ಟೆಂಡರ್ನೊಂದಿಗೆ ಬಿಎಸ್ಆರ್ಪಿಗಾಗಿ ಒಟ್ಟು 72.08 ಕಿ.ಮೀ ಉದ್ದದ ಸಿವಿಲ್ ಕೆಲಸ (ಎತ್ತರಿಸಿದ ಮತ್ತು ಸಮತಲ ವಿಭಾಗ) ನೀಡಲಾಗಿದೆ.