ಮುಂಬೈ: ಭಾರತೀಯ ರಿಸರ್ವ್ ಬ್ಯಾಂಕ್ (ಆರ್ಬಿಐ) ಗುರುವಾರದಂದು (ಫೆ. 8) ಬ್ಯಾಂಕ್ ಬಡ್ಡಿ ದರ ಕುರಿತು ನಿರ್ಧಾರ ಪ್ರಕಟಿಸಲಿದೆ. ಇದರ ಹಿಂದಿನ ದಿನವಾದ ಬುಧವಾರದಂದು ಹೂಡಿಕೆದಾರರು ಷೇರು ವಹಿವಾಟಿನಲ್ಲಿ ಹೆಚ್ಚು ಆಸಕ್ತಿ ತೋರಲಿಲ್ಲ. ಹೂಡಿಕೆದಾರರು ಕಾದು ನೋಡುವ ಎಚ್ಚರಿಕೆ ನಡೆ ಅನುಸರಿಸಿದ ಕಾರಣ ಬೆಂಚ್ಮಾರ್ಕ್ ಸೂಚ್ಯಂಕಗಳು ಹೆಚ್ಚು ಬದಲಾವಣೆ ಇಲ್ಲದೆ ಫ್ಲ್ಯಾಟ್ ಆಗಿ ಉಳಿದವು.
30-ಷೇರುಗಳ ಬಿಎಸ್ಇ ಸೂಚ್ಯಂಕವು 34.09 ಅಂಕಗಳು ಅಥವಾ 0.05 ರಷ್ಟು ಕುಸಿದು 72,152 ಕ್ಕೆ ಸ್ಥಿರವಾಯಿತು. ದಿನದ ವಹಿವಾಟಿನ ನಡುವೆ ಇದು ಗರಿಷ್ಠ 72,559.21 ಮತ್ತು ಕನಿಷ್ಠ 71,938.22 ಅಂಕಗಳನ್ನು ಮುಟ್ಟಿತ್ತು. ನಿಫ್ಟಿ ಸೂಚ್ಯಂಕವು 1.10 ಅಂಕಗಳು ಅಥವಾ 0.01 ರಷ್ಟು ಏರಿಕೆಯಾಗಿ 21,930.50 ಕ್ಕೆ ಕೊನೆಗೊಂಡಿತು.
ಅನುಕೂಲಕರ ಜಾಗತಿಕ ಸೂಚನೆಗಳ ಹೊರತಾಗಿಯೂ ದೇಶೀಯ ಮಾರುಕಟ್ಟೆಯು ಆರ್ಬಿಐ ನೀತಿ ಸಭೆಯ ಕಾರಣ ಎಚ್ಚರಿಕೆಯ ಚಲನೆಯನ್ನು ಪ್ರದರ್ಶಿಸಿತು. ಆರ್ಬಿಐ ನಿಲುವಿನಲ್ಲಿ ಯಾವುದೇ ಬದಲಾವಣೆಯನ್ನು ನಿರೀಕ್ಷಿಸಲಾಗದಿದ್ದರೂ, ಸಂಭಾವ್ಯ ದರ ಕಡಿತ ಮತ್ತು ದ್ರವ್ಯತೆಯಲ್ಲಿನ ಸುಧಾರಣೆಗಳ ಕುರಿತು ಯಾವುದೇ ಸುಳಿವುಗಳ ಕುರಿತು ಮೇಲ್ವಿಚಾರಣೆ ಮಾಡಲಾಗುವುದು ಎಂದು ಜಿಯೋಜಿತ್ ಫೈನಾನ್ಷಿಯಲ್ ಸರ್ವಿಸಸ್ನ ಸಂಶೋಧನಾ ಮುಖ್ಯಸ್ಥ ವಿನೋದ್ ನಾಯರ್ ಹೇಳಿದ್ದಾರೆ.
ಎಸ್ಬಿಐ ಕ್ಯಾಪ್ಸ್ ಅಂಗಸಂಸ್ಥೆಯನ್ನು ರೂ. 708.07 ಕೋಟಿಗೆ ಸ್ವಾಧೀನಪಡಿಸಿಕೊಳ್ಳುವುದಾಗಿ ಘೋಷಿಸಿದ ನಂತರ ಸ್ಟೇಟ್ ಬ್ಯಾಂಕ್ ಆಫ್ ಇಂಡಿಯಾ ಷೇರುಗಳ ಬೆಲೆ ಶೇ.3.78 ರಷ್ಟು ಏರಿಕೆ ಕಂಡಿದೆ. ಮಾರಾಟದಲ್ಲಿ ಅಂದಾಜು ಶೇಕಡಾ 9ರಷ್ಟು ಬೆಳವಣಿಗೆಯನ್ನು ವರದಿ ಮಾಡಿದ ಹಿನ್ನೆಲೆಯಲ್ಲಿ ನೆಸ್ಲೆ ಇಂಡಿಯಾ ಷೇರುಗಳ ಬೆಲೆ ಶೇಕಡಾ 1.68 ರಷ್ಟು ಹೆಚ್ಚಾಗಿದೆ. ಜೆಎಸ್ಡಬ್ಲ್ಯೂ ಸ್ಟೀಲ್, ಬಜಾಜ್ ಫೈನಾನ್ಸ್, ಆಕ್ಸಿಸ್ ಬ್ಯಾಂಕ್ ಮತ್ತು ಏಷ್ಯನ್ ಪೇಂಟ್ಸ್ ಕಂಪನಿಯ ಷೇರುಗಳು ಲಾಭ ಗಳಿಸಿದವು. ಟೆಕ್ ಮಹೀಂದ್ರಾ, ಪವರ್ ಗ್ರಿಡ್, ಇನ್ಫೋಸಿಸ್, ಟಾಟಾ ಕನ್ಸಲ್ಟೆನ್ಸಿ ಸರ್ವಿಸಸ್, ಎಚ್ಡಿಎಫ್ಸಿ ಬ್ಯಾಂಕ್, ವಿಪ್ರೋ, ಲಾರ್ಸನ್ ಮತ್ತು ಟೂಬ್ರೊ ಮತ್ತು ಎನ್ಟಿಪಿಸಿ ಕಂಪನಿಯ ಷೇರುಗಳು ನಷ್ಟ ಅನುಭವಿಸಿದವು.
ಬಿಎಸ್ಇ ಮಿಡ್ಕ್ಯಾಪ್ ಸೂಚ್ಯಂಕ ಶೇಕಡಾ 1.31 ಮತ್ತು ಸ್ಮಾಲ್ಕ್ಯಾಪ್ ಸೂಚ್ಯಂಕವು ಶೇಕಡಾ 0.38 ರಷ್ಟು ಏರಿಕೆಯಾಗಿದೆ. ವಲಯವಾರು ಸೂಚ್ಯಂಕಗಳ ಪೈಕಿ ಐಟಿ ಶೇ.1.18, ಟೆಕ್ ಶೇ.0.97, ಸೇವೆಗಳು ಶೇ.0.81, ಬಂಡವಾಳ ಸರಕುಗಳು ಶೇ.0.31 ಮತ್ತು ಆಟೋ ಶೇ.0.06ರಷ್ಟು ಕುಸಿದಿವೆ. ರಿಯಾಲ್ಟಿ ಶೇ. 1.96, ದೂರಸಂಪರ್ಕ ಶೇ.1.18, ಗ್ರಾಹಕ ವಿವೇಚನೆ (ಶೇ.0.89), ಹಣಕಾಸು ಸೇವೆಗಳು (ಶೇ.0.76) ಮತ್ತು ಇಂಧನ (ಶೇ.0.92) ವಲಯದ ಷೇರುಗಳು ಏರಿಕೆ ಕಂಡಿವೆ.
ಏಷ್ಯಾದ ಮಾರುಕಟ್ಟೆಗಳ ಪೈಕಿ ಸಿಯೋಲ್ ಮತ್ತು ಶಾಂಘೈ ಲಾಭ ಕಂಡರೆ, ಟೋಕಿಯೊ ಮತ್ತು ಹಾಂಗ್ ಕಾಂಗ್ ಹಿನ್ನಡೆ ಅನುಭವಿಸಿದವು. ಮಂಗಳವಾರ ಅಮೆರಿಕದ ಮಾರುಕಟ್ಟೆಗಳು ಲಾಭದಲ್ಲಿ ಮುಂದುವರಿದವು. ವಿದೇಶಿ ಸಾಂಸ್ಥಿಕ ಹೂಡಿಕೆದಾರರು (ಎಫ್ಐಐ) ಮಂಗಳವಾರ 92.52 ಕೋಟಿ ರೂಪಾಯಿ ಮೌಲ್ಯದ ಷೇರುಗಳನ್ನು ಖರೀದಿಸಿದ್ದಾರೆ ಎಂದು ವಿನಿಮಯ ಕೇಂದ್ರ ತಿಳಿಸಿದೆ.
ಬಿಎಸ್ಇ ಬೆಂಚ್ಮಾರ್ಕ್ ಸೂಚ್ಯಂಕ ಮಂಗಳವಾರ 454.67 ಅಂಕಗಳು ಅಥವಾ 0.63 ರಷ್ಟು ಏರಿಕೆಯಾಗಿ 72,186.09 ಕ್ಕೆ ಸ್ಥಿರವಾಗಿತ್ತು. ನಿಫ್ಟಿ ಸೂಚ್ಯಂಕವು 157.70 ಅಂಕ ಅಥವಾ 0.72 ರಷ್ಟು ಏರಿಕೆಯಾಗಿ 21,929.40 ಕ್ಕೆ ಮುಟ್ಟಿತ್ತು.