ಹೈದರಾಬಾದ್ನಲ್ಲಿ ನಡೆದ ಮೊದಲ ಟೆಸ್ಟ್ನಲ್ಲಿ ಭಾರತೀಯರ ಸ್ಪಿನ್ ದಾಳಿಯನ್ನು ಸ್ವೀಪ್-ರಿವರ್ಸ್ಸ್ವೀಪ್ಗಳ ಮೂಲಕವೇ ನಿಭಾಯಿಸಿ ಯಶಸ್ಸು ಕಂಡಿದ್ದ ಆಂಗ್ಲರ ಬಾಜ್ಬಾಲ್ ತಂತ್ರಗಾರಿಕೆ ಈ ಬಾರಿ ಬುಮ್ರಾರ ಯಾರ್ಕರ್-ರಿವರ್ಸ್ ಸ್ವಿಂಗ್ ಎಸೆತಗಳ ಎದುರು ದಿಕ್ಕೆಟ್ಟಿತು. ಆರಂಭಿಕ ಜಾಕ್ ಕ್ರೌಲಿ (76 ರನ್, 78 ಎಸೆತ, 11 ಬೌಂಡರಿ, 2 ಸಿಕ್ಸರ್) ಮೊದಲ ವಿಕೆಟ್ಗೆ ಬೆನ್ ಡಕೆಟ್ (21) ಜತೆಗೂಡಿ 62 ಎಸೆತಗಳಲ್ಲೇ 59 ರನ್ ಕಲೆಹಾಕುವ ಮೂಲಕ ಆಂಗ್ಲರಿಗೆ ಉತ್ತಮ ಆರಂಭವನ್ನೇ ಒದಗಿಸಿದರು. ಡಕೆಟ್ ಸ್ಪಿನ್ನರ್ ಕುಲದೀಪ್ಗೆ ವಿಕೆಟ್ ಒಪ್ಪಿಸಿದ ಬಳಿಕ ಕ್ರೌಲಿ, ಒಲಿ ಪೋಪ್ (23) ಜತೆಗೂಡಿ 73 ಎಸೆತಗಳಲ್ಲಿ ಮತ್ತೆ 55 ರನ್ ಕಲೆಹಾಕಿದರು. ಈ ವೇಳೆ ಇಂಗ್ಲೆಂಡ್ 1 ವಿಕೆಟ್ಗೆ 114 ರನ್ ಗಳಿಸಿ ಸುಸ್ಥಿತಿಯಲ್ಲೇ ಇತ್ತು. ಅಕ್ಷರ್ ಪಟೇಲ್ ಈ ಜೋಡಿಯನ್ನು ಬೇರ್ಪಡಿಸಿದ ಬಳಿಕ ಇಂಗ್ಲೆಂಡ್ ತಂಡ ಬುಮ್ರಾಘಾತಕ್ಕೆ ತತ್ತರಿಸಿತು. ಪೋಪ್, ಜೋ ರೂಟ್ (5), ಜಾನಿ ಬೇರ್ಸ್ಟೋ (25) ಬುಮ್ರಾಗೆ ವಿಕೆಟ್ ಒಪ್ಪಿಸಿದರು. ನಂತರದಲ್ಲಿ ಆಂಗ್ಲರ ಹೋರಾಟ ಚಾಲ್ತಿಯಲ್ಲಿಟ್ಟಿದ್ದ ನಾಯಕ ಬೆನ್ ಸ್ಟೋಕ್ಸ್ (47) ಮತ್ತು ಟಾಮ್ ಹಾರ್ಟ್ಲಿ (21) ಕೂಡ ಬುಮ್ರಾ ದಾಳಿ ಎದುರು ಹೆಚ್ಚು ಹೊತ್ತು ನಿಲ್ಲಲಾಗಲಿಲ್ಲ. ಉಳಿದ ವಿಕೆಟ್ಗಳು ಕುಲದೀಪ್ ಪಾಲಾದವು. ಈ ನಡುವೆ ಅನುಭವಿ ಸ್ಪಿನ್ನರ್ ಆರ್. ಅಶ್ವಿನ್ ಮಾತ್ರ ಆಂಗ್ಲರ ಬಾಜ್ಬಾಲ್ನಿಂದ ಹೆಚ್ಚಿನ ಹೊಡೆತ ತಿಂದರು.
