ಮುಂಬೈ: ಸಾಮಾನ್ಯವಾಗಿ ಮದುವೆ ಎಂದರೆ ಹೆಣ್ಣಿಗೆ ಗಂಡು ತಾಳಿ ಕಟ್ಟಬೇಕು. ಆದರೆ ಈ ಕಥೆ ಸ್ವಲ್ಪ ವಿಚಿತ್ರವೇ. ಇಲ್ಲಿ ಹೆಣ್ಣಿಗೆ ಗಂಡು ತಾಳಿ ಕಟ್ಟುವ ಜತೆ ಗಂಡಿಗೆ ಹೆಣ್ಣೂ ತಾಳಿ ಕಟ್ಟಿದ್ದಾಳೆ. ಸ್ತ್ರೀ ಸಮಾನತೆಗಾಗಿ ಈ ರೀತಿ ಹೊಸ ಸಂಪ್ರದಾಯ ಆರಂಭಿಸಬೇಕೆಂದು ವರನೇ ಹಠ ಮಾಡಿದ್ದಾಗಿ ಹೇಳಲಾಗಿದೆ.
ಆತನ ಹೆಸರು ಶಾರ್ದೂಲ್ ಕದಮ್. ಕಾಲೇಜಿನಲ್ಲಿ ಒಟ್ಟಿಗೇ ಓದಿದ್ದ ತನುಜಾಳನ್ನು ಕಾಲೇಜು ಮುಗಿದು ನಾಲ್ಕು ವರ್ಷಗಳ ನಂತರ ಪ್ರೀತಿಸಲು ಆರಂಭಿಸಿದ್ದ. ಪರಸ್ಪರ ಪ್ರೀತಿ ಹಂಚಿಕೊಂಡಿದ್ದ ಜೋಡಿ 2020ರಲ್ಲಿ ಹಸೆಮಣೆ ಏರುವ ನಿರ್ಧಾರ ಮಾಡಿತ್ತು. ಆದರೆ ತನುಜಾ ಬಳಿ ತಾನು ಅಪ್ಪಟ ಸ್ತ್ರೀಸಮಾನತಾವಾದಿ ಎಂದು ಹೇಳಿಕೊಂಡಿದ್ದ ಶಾರ್ದೂಲ್ ಮದುವೆಗೆ ಮೊದಲು ಹೊಸ ಹಠ ಹಿಡಿದಿದ್ದಾನೆ. ನಾನು ಮದುವೆಯಾಗುತ್ತೇನೆ, ಆದರೆ ಮದುವೆಯಲ್ಲಿ ನಾನು ನಿನಗೆ ಹೇಗೆ ತಾಳಿ ಕಟ್ಟುತ್ತೇನೋ ಹಾಗೇ ನೀನೂ ನನಗೆ ತಾಳಿ ಕಟ್ಟಬೇಕು ಎಂದು ಹೇಳಿದ್ದಾನೆ.
ಮನೆಯವರು ಎಷ್ಟೇ ಹೇಳಿದರೂ ಶಾರ್ದೂಲ್ ತನ್ನ ವಾದ ಬಿಟ್ಟುಕೊಟ್ಟಿಲ್ಲ. ಕೊನೆಗೆ ಮನೆಯವರೆಲ್ಲರ ಒಪ್ಪಿಗೆ ಮೇರೆಗೆ ಆತನ ಇಷ್ಟದಂತೆಯೇ ಮದುವೆ ಮಾಡಲಾಗಿದೆ. ತನುಜ ಶಾರ್ದೂಲ್ಗೆ ತಾಳಿ ಕಟ್ಟಿದ್ದಾಳೆ. ಈ ವಿಚಾರ ಸಾಮಾಜಿಕ ಜಾಲತಾಣಗಳಲ್ಲಿ ಸಕತ್ ವೈರಲ್ ಆಗಿದೆ.
ಈ ವಿಚಾರವಾಗಿ ಅನೇಕರು ಟ್ರೋಲ್ ಮಾಡಿದ್ದಾರೆ. ನೀನು ಅಷ್ಟೊಂದು ಸ್ತ್ರೀ ಸಮಾನತಾವಾದಿ ಆಗಿದ್ದರೆ ಮದುವೆಯಲ್ಲಿ ಸೀರೆ ಉಟ್ಟು ಕೂರಬೇಕಿತ್ತು ಎಂದು ಕಾಲೆಳೆದಿದ್ದಾರೆ. ಆದರೆ ಇಂತಹ ಯಾವುದೇ ಮಾತಿಗೆ ಆ ಜೋಡಿ ತಲೆ ಕೆಡಿಸಿಕೊಂಡಿಲ್ಲ. ಹೆಣ್ಣು ಮಕ್ಕಳ ನೋವು ನನಗೆ ಗೊತ್ತು. ಅವರಿಗೆ ಗೌರವ ನೀಡುವುದು ನಮ್ಮ ಕರ್ತವ್ಯ ಎಂದು ಶಾರ್ದೂಲ್ ತಮ್ಮ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ. ಮದುವೆಯಾಗಿ ನಾಲ್ಕು ತಿಂಗಳಾಗಿದ್ದು, ಅಂದಿನಿಂದ ಇಬ್ಬರೂ ತಮ್ಮ ಮಂಗಲಸೂತ್ರಕ್ಕೆ ಅತ್ಯಂತ ಪವಿತ್ರ ಸ್ಥಾನ ಕೊಟ್ಟಿದ್ದಾರೆ ಎನ್ನಲಾಗಿದೆ. (ಏಜೆನ್ಸೀಸ್)
ದಿವ್ಯಾ ಉರುಡುಗ ಬಿಗ್ಬಾಸ್ನಿಂದ ಹೊರಗೆ? ಸ್ನೇಹಿತೆಯನ್ನು ನೆನೆದು ಕಣ್ಣೀರಿಟ್ಟ ಅರವಿಂದ್
ಶೇವಿಂಗ್ ಕ್ರೀಂ ಬದಲು ಹೇರ್ ರಿಮೂವಲ್ ಕ್ರೀಮ್ ಅನ್ನು ಮುಖದ ತುಂಬ ಹಚ್ಚಿಕೊಂಡ! ಮುಂದೇನಾಯ್ತು