ನವದೆಹಲಿ: ಯಾರಾದರೂ ನಮ್ಮತ್ತ ಕಲ್ಲು ಎಸೆದರೆ ಅದನ್ನೇ ಮೆಟ್ಟಿಲಾಗಿಸಿಕೊಳ್ಳಬೇಕು ಎಂಬ ಮಾತಿದೆ. ಆದರೆ ಇಲ್ಲೊಂದು ತಂಡ ಧೂಮಪಾನಿಗಳು ಸೇದಿ ಎಸೆದ ಸಿಗರೆಟ್ ತುಂಡುಗಳನ್ನೇ ತಮ್ಮ ಅಧ್ಯಯನಕ್ಕೆ ಬುನಾದಿ ಆಗಿಸಿಕೊಂಡಿದೆ.
ರಾಯಲ್ ಮೆಲ್ಬೋರ್ನ್ ಇನ್ಸ್ಟಿಟ್ಯೂಟ್ ಆಫ್ ಟೆಕ್ನಾಲಜಿ (ಆರ್ಎಂಐಟಿ) ಸಂಸ್ಥೆಯ ಸಂಶೋಧಕರು ಇಟ್ಟಿಗೆ ಮಾಡಲು ಸಿಗರೆಟ್ ತುಂಡುಗಳನ್ನು ಹೇಗೆ ಬಳಸಿಕೊಳ್ಳಬಹುದು ಎಂಬುದನ್ನು ಕಂಡುಹಿಡಿದಿದ್ದಾರೆ. ಮಾತ್ರವಲ್ಲ ಜಗತ್ತಿನಲ್ಲಿನ ಶೇ. 2.5ರಷ್ಟು ಇಟ್ಟಿಗೆ ಉತ್ಪಾದನೆಗೆ ಕೇವಲ ಶೇ. 1ರಷ್ಟು ಸಿಗರೆಟ್ ತುಂಡುಗಳನ್ನು ಬಳಸಿದರೂ ಒಂದು ವರ್ಷದಲ್ಲಿ ಎಲ್ಲ ಸಿಗರೆಟ್ ತುಂಡುಗಳನ್ನು ರಿಸೈಕಲ್ ಮಾಡಿಬಿಡಬಹುದು ಎಂಬುದನ್ನೂ ಹೇಳಿದ್ದಾರೆ.
ಇವರ ಪ್ರಕಾರ ಪ್ರತಿವರ್ಷ 6 ಟ್ರಿಲಿಯನ್ ಸಿಗರೆಟ್ ಜಾಗತಿಕವಾಗಿ ಉತ್ಪಾದನೆ ಆಗುತ್ತಿದ್ದು, ಅದರಿಂದ 1.2 ಮಿಲಿಯನ್ ಟನ್ಗಳಷ್ಟು ತ್ಯಾಜ್ಯ (ಸುಟ್ಟ ಸಿಗರೆಟ್ ತುಂಡು) ಸೃಷ್ಟಿಯಾಗುತ್ತದೆ. ಇದೇ ಸಿಗರೆಟ್ ತುಂಡುಗಳನ್ನು ಇಟ್ಟಿಗೆ ಉತ್ಪಾದನೆಗೆ ಬಳಸಬಹುದು. ಶೇ. 1ರಷ್ಟು ಈ ಸಿಗರೆಟ್ ತುಂಡುಗಳನ್ನು ಬಳಸಿ ಮಾಡಿದ ಇಟ್ಟಿಗೆ (ಫೈಯರ್ಡ್ ಬ್ರಿಕ್)ಮಾಮೂಲಿ ಇಟ್ಟಿಗೆಗಿಂತ ಗಟ್ಟಿಯಾಗಿರುತ್ತದೆ ಮತ್ತು ಇದರ ಉತ್ಪಾದನೆಗೆ ಕಡಿಮೆ ಇಂಧನ ಸಾಕು ಎಂಬುದಾಗಿ ಇವರ ಸಂಶೋಧನೆ ತಿಳಿಸಿದೆ. (ಏಜೆನ್ಸೀಸ್)