ಯಶ್ ಅಭಿನಯದ ‘ಕೆಜಿಎಫ್ 2’ ಚಿತ್ರತಂಡದಿಂದ ಅಧಿಕೃತ ಅಪ್ಡೇಟ್ಗಳು ಬರದೇ ಬಹಳ ದಿನಗಳೇ ಆಗಿವೆ. ಆದರೆ, ಗಾಳಿಸುದ್ದಿಗಳಿಗೆ ಮಾತ್ರ ಬರವಿಲ್ಲ. ಆಗಾಗ ಒಂದಲ್ಲ ಒಂದು ಗಾಳಿಸುದ್ದಿಗಳು ಕೇಳಿ ಬರುತ್ತಲೇ ಇದ್ದು, ಇದೀಗ ಚಿತ್ರದಲ್ಲಿ ನೋರಾ ಫತೇಹಿ ಐಟಂ ಡ್ಯಾನ್ಸ್ ಮಾಡಿದ್ದಾರೆ ಎಂಬ ಸುದ್ದಿಯೊಂದು ಕೇಳಿಬಂದಿದೆ.
‘ಕೆಜಿಎಫ್ – ಚಾಪ್ಟರ್ 1’ ಚಿತ್ರದಲ್ಲಿ ‘ಗಲಿಗಲಿ ಮೇ …’ ಎಂಬ ಐಟಂ ಸಾಂಗ್ಗೆ ಯಶ್ ಜತೆಗೆ ಮೌನಿ ರಾಯ್ ಹೆಜ್ಜೆ ಹಾಕಿದ್ದು ನೆನಪಿರಬಹುದು. ಇದೀಗ ‘ಕೆಜಿಎಫ್ – ಚಾಪ್ಟರ್ 2’ ಚಿತ್ರದಲ್ಲಿ ಯಶ್ ಜತೆಗೆ ನೋರಾ ಫತೇಹಿ ಕುಣಿದಿದ್ದಾರಂತೆ. ಈ ಬಾರಿ, ‘ಶೋಲೆ’ ಚಿತ್ರದ ‘ಮೆಹಬೂಬಾ’ ಹಾಡನ್ನು ಈ ಚಿತ್ರಕ್ಕಾಗಿ ವಿಶೇಷವಾಗಿ ರೀಮಿಕ್ಸ್ ಮಾಡಲಾಗಿದ್ದು, ಈಗಾಗಲೇ ಫೆಬ್ರವರಿಯಲ್ಲಿ ಸದ್ದಿಲ್ಲದೆ ಹೈದರಾಬಾದ್ನಲ್ಲಿ ಚಿತ್ರೀಕರಣ ಮಾಡಲಾಗಿದೆ ಎಂದು ಹೇಳಲಾಗುತ್ತಿದೆ. ಆದರೆ, ಚಿತ್ರತಂಡ ಮಾತ್ರ ಇದುವರೆಗೂ ಯಾವ ವಿಷಯವನ್ನೂ ಬಾಯಿಬಿಟ್ಟಿಲ್ಲ.
‘ಕೆಜಿಎಫ್ – 2’ ಚಿತ್ರವು ಜುಲೈ 16ರಂದು ಜಗತ್ತಿನಾದ್ಯಂತ ಬಿಡುಗಡೆ ಯಾಗಲಿದೆ ಎಂದು ಈಗಾಗಲೇ ಘೋಷಿಸಲಾಗಿದೆ. ಆದರೆ, ಇದೀಗ ಕರೊನಾದಿಂದಾಗಿ ದೊಡ್ಡ ಚಿತ್ರಗಳೆ ಬಿಡುಗಡೆ ಮುಂದೂಡಲ್ಪಡುತ್ತಿರುವುದರಿಂದ, ‘ಕೆಜಿಎಫ್ – 2’ ಬಿಡುಗಡೆಯಲ್ಲೂ ಏನಾದರೂ ವ್ಯತ್ಯಾಸವಾಗುತ್ತದಾ ಎಂಬ ಭಯ ಮತ್ತು ಗೊಂದಲ ಯಶ್ ಅವರ ಅಭಿಮಾನಿ ವಲಯದಲ್ಲಿ ಸಹಜವಾಗಿಯೇ ಇದೆ. ಆದರೆ, ಚಿತ್ರತಂಡ ಮಾತ್ರ ಈ ಕುರಿತಾಗಿ ಯಾವೊಂದು ಪ್ರತಿಕ್ರಿಯೆಯನ್ನೂ ನೀಡದೆ, ಪೋಸ್ಟ್ ಪ್ರೊಡಕ್ಷನ್ ಕೆಲಸಗಳಲ್ಲಿ ತೊಡಗಿಸಿಕೊಂಡಿದೆ.