“ಯೇ ಹೈ ಮೊಹಬ್ಬತೇ’ ಹಿಂದಿ ಧಾರಾವಾಹಿ ಖ್ಯಾತಿಯ ನಟಿ ದಿವ್ಯಾಂಕಾ ತ್ರಿಪಾಠಿ, ಕಳೆದ ಎರಡು ದಶಕಗಳಲ್ಲಿ 40ಕ್ಕೂ ಅಧಿಕ ಧಾರಾವಾಹಿಗಳು, ರಿಯಾಲಿಟಿ ಶೋಗಳಲ್ಲಿ ಮಿಂಚಿದ್ದು, ಕಿರುತೆರೆಯ ಸ್ಟಾರ್ ನಟಿ ಎನಿಸಿಕೊಂಡಿದ್ದಾರೆ. ಇಂತಹ ದಿವ್ಯಾಂಕಾ ಕೆಲ ದಿನಗಳ ಹಿಂದಷ್ಟೇ ಬಿದ್ದು ಎರಡೂ ಕೈಗಳನ್ನು ಮುರಿದುಕೊಂಡಿದ್ದಾರೆ.
ಘಟನೆ ಹೇಗಾಯಿತು? ಬೀಳಲು ಕಾರಣವೇನು? ಎಂಬುದರ ಬಗ್ಗೆ ಹೇಳಿಕೊಂಡಿಲ್ಲವಾದರೂ, ಜಿಮ್ನಲ್ಲಿ ಹ್ಯಾಂಡ್ ಸ್ಟ್ಯಾಂಡ್ ಮಾಡುತ್ತಿರುವ ವಿಡಿಯೋ ಹಂಚಿಕೊಂಡಿರುವ ಅವರು, “ನಾನು ಕೈ ಫ್ರ್ಯಾಕ್ಚರ್ ಆದ ದಿನ ಹೀಗಿದ್ದೆ. ಆದಷ್ಟು ಬೇಗ ಮತ್ತಷ್ಟು ಶಕ್ತಿಯುತವಾಗಿ ವಾಪಸ್ಸಾಗಲಿದ್ದೇನೆ. ಪ್ರಾಮಿಸ್’ ಎಂದು ಬರೆದುಕೊಂಡಿದ್ದಾರೆ.
ಹಾಗೇ ಕೈಗಳ ಸರ್ಜರಿ ಬಳಿಕ ದಿವ್ಯಾಂಕಾ, “ಸರ್ಜರಿ ಯಶಸ್ವಿಯಾಗಿ ಪೂರ್ಣಗೊಂಡಿದೆ. ನಾನು ಆಸ್ಪತ್ರೆಯಿಂದ ಡಿಸ್ಚಾರ್ಜ್ ಆಗಿದ್ದೇನೆ. ನಮ್ಮ ವಿಜ್ಞಾನ ತುಂಬಾ ಮುಂದುವರಿದಿದೆ. ರಿಕವರ್ ಆಗುತ್ತಿರುವುದನ್ನು ನೋಡಿ ವೈದ್ಯರು ಖುಷಿಪಟ್ಟರು. ಈಗಾಗಲೇ ಫಿಸಿಯೋಥೆರಪಿ ಕೂಡ ಪ್ರಾರಂಭಿಸಿದ್ದೇನೆ. ಆದಷ್ಟು ಬೇಗ ಗುಣಮುಖಳಾಗಿ ವಾಪಸ್ಸಾಗಲಿದ್ದೇನೆ’ ಎಂದು ಹೇಳಿಕೊಂಡಿದ್ದಾರೆ. ಸದ್ಯ ವೈದ್ಯರು ದಿವ್ಯಾಂಕಾ ತ್ರಿಪಾಠಿಗೆ ವಿಶ್ರಾಂತಿ ಪಡೆಯಲು ಸೂಚಿಸಿದ್ದಾರೆ.
