ಕೊಲ್ಲಂ(ಕೇರಳ): ಕಳೆದ ಒಂದು ತಿಂಗಳಿನಿಂದ ನಾಪತ್ತೆಯಾಗಿದ್ದ ಕೊಲ್ಲಂ ಜಿಲ್ಲೆಯ 42 ವರ್ಷದ ಬ್ಯೂಟಿಷಿಯನ್ ಮಹಿಳೆಯ ಶವ ಸುಟ್ಟ ಸ್ಥಿತಿಯಲ್ಲಿ ಪಲಕ್ಕಾಡ್ ಜಿಲ್ಲೆಯಲ್ಲಿ ಪತ್ತೆಯಾಗಿದೆ. ಕೊಲೆ ತಪ್ಪೊಪ್ಪಿಗೆ ಆಧಾರದ ಮೇಲೆ ಪಲಕ್ಕಾಡ್ ಜಿಲ್ಲೆಯ ಸಂಗೀತ ಶಿಕ್ಷಕನನ್ನು ವಶಕ್ಕೆ ಪಡೆಯಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಬ್ಯೂಟಿಷಿಯನ್ ಸುಚಿತ್ರಾ ಕೊಲ್ಲಂನ ಕೊಟ್ಟಿಯಾಂ ಬಳಿಯಿರುವ ಥ್ರಿಕ್ಕೊವಿಲ್ವಟ್ಟಂ ಪಟ್ಟಣದ ನಿವಾಸಿ. ವೃತ್ತಿಯಲ್ಲಿ ಬ್ಯೂಟಿಷಿಯನ್ ಆಗಿದ್ದ ಸುಚಿತ್ರಾ ಅವರ ಮೃತದೇಹ ಕಾಲುಗಳನ್ನು ಕತ್ತರಿಸಿ, ಅರ್ಧ ದೇಹ ಸುಟ್ಟು, ಹೂತಿದ್ದ ಸ್ಥಿತಿಯಲ್ಲಿ ಪತ್ತೆಯಾಗಿದೆ.
ಕೊಚ್ಚಿಯಲ್ಲಿ ತರಬೇತಿ ಇದೆ ಎಂದು ಹೇಳಿ ಸುಚಿತ್ರಾ ಅವರು ಮಾರ್ಚ್ 18ರಂದು ಮನೆಯಿಂದ ಹೊರಹೋದರು. ಅದಾದ ಎರಡು ದಿನಗಳಲ್ಲೇ (ಮಾರ್ಚ್ 20) ಅವರ ಮೊಬೈಲ್ ಫೋನ್ ನಾಟ್ ರೀಚಬಲ್ ಆಗಿತ್ತು. ಗಾಬರಿಗೊಂಡ ಅವರ ಕುಟುಂಬ ಮಾರ್ಚ್ 22ರಂದು ಕೊಟ್ಟಿಯಂ ಪೊಲೀಸ್ ಠಾಣೆಯಲ್ಲಿ ನಾಪತ್ತೆ ಪ್ರಕರಣವನ್ನು ದಾಖಲಿಸಿದ್ದರು.
ಇದನ್ನೂ ಓದಿ: ತನ್ನ ಕುಟುಂಬವನ್ನೇ ಸರ್ವನಾಶ ಮಾಡಿದ ಪಾಪಿ: ತಂದೆ, ತಾಯಿ, ಅಣ್ಣ, ಅತ್ತಿಗೆ, ಮಕ್ಕಳಿಬ್ಬರನ್ನು ಕೊಂದು ಪೊಲೀಸರಿಗೆ ಶರಣು
ತನಿಖೆ ಕೈಗೆತ್ತಿಕೊಂಡ ಪೊಲೀಸರಿಗೆ, ತಾಯಿಗೆ ಹುಷಾರಿಲ್ಲ 5 ದಿನ ರಜೆ ಬೇಕೆಂದು ಉದ್ಯೋಗದಾತರ ಬಳಿ ಸುಚಿತ್ರಾ ರಜೆ ಕೇಳಿ ಹೋಗಿದ್ದು ಗೊತ್ತಾಯಿತು. ಆದರೆ, ಮನೆಯಲ್ಲಿ ತರಬೇತಿ ಇದೆ ಎಂದು ಹೇಳಿದ್ದರು. ಅನುಮಾನಗೊಂಡ ಪೊಲೀಸರು ಅವರ ಕಾಲ್ ಡೀಟೇಲ್ಸ್ ಅನ್ನು ತೆಗೆದು ನೋಡಿದಾಗ ಸುಚಿತ್ರಾ ಪಲಕ್ಕಾಡ್ ಸಂಗೀತ ಶಿಕ್ಷಕ ಪ್ರಶಾಂತ್ರೊಂದಿಗೆ ಸಂಪರ್ಕವಿದ್ದಿದ್ದು ತಿಳಿದುಬಂತು. ಪ್ರಶಾಂತ್ರೊಂದಿಗೆ ಸುಚಿತ್ರಾಗೆ ಸಂಬಂಧವಿತ್ತು ಎನ್ನಲಾಗಿದೆ.
ತನಿಖೆಗಾಗಿ ಕೊಲ್ಲಂ ಪೊಲೀಸ್ ತಂಡ ಪಲಕ್ಕಾಡ್ಗೆ ತೆರಳಿತು. ಈ ವೇಳೆ ತಾನೇ ಕೊಲೆ ಮಾಡಿದ್ದಾಗಿ ಪ್ರಶಾಂತ್ ತಪ್ಪೊಪ್ಪಿಕೊಂಡಿದ್ದು, ಪೊಲೀಸರ ವಶದಲ್ಲಿದ್ದಾನೆ.
ಸುಚಿತ್ರಾಳನ್ನು ತನ್ನ ಮನೆಗೆ ಕರೆತರಲು ತನ್ನ ಕುಟುಂಬವನ್ನು ಮಾರ್ಚ್ 18ರಂದು ಪ್ರಶಾಂತ್ ಹೊರಗೆ ಕಳುಹಿಸಿದ್ದ. ಮನೆಗೆ ಬಂದ ಸುಚಿತ್ರಾ ಮತ್ತು ಪ್ರಶಾಂತ್ ನಡುವೆ ಗಲಾಟೆ ನಡೆದಿದ್ದು, ಅದು ಕೊಲೆಯಲ್ಲಿ ಅಂತ್ಯವಾಗಿದೆ. ಟೇಬಲ್ ಲ್ಯಾಂಪ್ನ ಕೇಬಲ್ ಸಹಾಯದಿಂದ ಉಸಿರುಗಟ್ಟಿಸಿ ಕೊಲೆಗೈದಿದ್ದಾನೆ. ಬಳಿಕ ಆಕೆಯ ಮೃತದೇಹದ ಎರಡು ಕಾಲುಗಳನ್ನು ಚಾಕುವಿನಿಂದ ಕೊಯ್ದು, ಸುಡಲು ಯತ್ನಿಸಿ ಕೊನೆಗೆ ಹಾಗೇ ಹೂತಿದ್ದಾನೆ.
ಇದನ್ನೂ ಓದಿ: ಅಣ್ಣನನ್ನು ಬಾವಿಗೆ ಎಸೆದು ತಂಗಿಯನ್ನು ಹೊತ್ತೊಯ್ದ ಕಾಮುಕರು: ಮೂವರು ಅಪ್ರಾಪ್ತರು ಸೇರಿ 7 ಮಂದಿಯಿಂದ ದುಷ್ಕೃತ್ಯ
ಮತ್ತಷ್ಟು ವಿಚಾರಣೆ ನಡೆಸಿದಾಗ ಆರೋಪಿ ಪ್ರಶಾಂತ್ ಹೇಳಿದಂತೆ ಪಲಕ್ಕಾಡ್ನ ರಾಮನಾಥಪುರಂ ಬಳಿಯಿರುವ ಆತನ ಬಾಡಿಗೆ ಮನೆಯ ಆವರಣವನ್ನು ಹುಡುಕಾಡಿದಾಗ ಪೊಲೀಸರಿಗೆ ಸುಚಿತ್ರಾ ಮೃತದೇಹ ಪತ್ತೆಯಾಗಿದೆ. ಆಕೆ ಶವವನ್ನು ಪರೀಕ್ಷೆಗಾಗಿ ಪಲಕ್ಕಾಡ್ ಜಿಲ್ಲಾಸ್ಪತ್ರೆಗೆ ರವಾನಿಸಲಾಗಿದ್ದು, ಪ್ರಶಾಂತ್ ವಿರುದ್ಧ ಪ್ರಕರಣ ದಾಖಲಾಗಿದೆ. (ಏಜೆನ್ಸೀಸ್)