ಬೆಂಗಳೂರು: ಬೆಂಗಳೂರಿನ ಬಿಷಪ್ ಕಾಟನ್ ಬಾಲಕಿಯರ ಶಾಲೆಯ ಪ್ರಾಂಶುಪಾಲರ ಜತೆ ಮಹಿಳೆಯೊಬ್ಬರು ವಾಗ್ವಿವಾದಕ್ಕೆ ಇಳಿದ ಕಾರಣ ಪ್ರಾಂಶುಪಾಲರು ಆ ಮಹಿಳೆಗೆ ಕಪಾಳ ಮೋಕ್ಷ ಮಾಡಿರುವ ಬಗ್ಗೆ ವಾಟ್ಸ್‌ಆ್ಯಪ್‌ ಸಂದೇಶಗಳು ಹರಿದಾಡುತ್ತಿವೆ.
ಕರೊನಾ ವೈರಸ್‌ ಹಿನ್ನೆಲೆಯಲ್ಲಿ, ಶಾಲೆಯು ಮುಚ್ಚಿರುವಾಗ ಅದರ ಲೈಬ್ರರಿಯನ್ನೂ ವಿದ್ಯಾರ್ಥಿಗಳು ಬಳಸಿಕೊಳ್ಳುತ್ತಿಲ್ಲ, ಆದರೂ ವಿದ್ಯಾರ್ಥಿಗಳಿಂದ ‘ಏಕೆ ಗ್ರಂಥಾಲಯ ಶುಲ್ಕ, ಆ ಶುಲ್ಕ, ಈ ಶುಲ್ಕ ಎಂದು ವಸೂಲು ಮಾಡುತ್ತಿದ್ದೀರಿ ಎಂದು ಪ್ರಿನ್ಸಿಪಾಲ್‌ಗೆ ಮಹಿಳೆ ಬೈಯುತ್ತಿದ್ದು, ಇದು ಅತಿರೇಕಕ್ಕೆ ಹೋದಾಗ ಪ್ರಾಂಶುಪಾಲರು ಆ ಮಹಿಳೆಗೆ ಹೊಡೆಯುವ ದೃಶ್ಯ ಇದಾಗಿದೆ.
ಬಿಹಾರದ ಶಾಲೆಯಲ್ಲಿ ಪೇರೆಂಟ್‌ಗೆ ಪ್ರಿನ್ಸಿಪಾಲ್ ಕಪಾಳಮೋಕ್ಷ!
ಬಿಹಾರದ ಪಾಟ್ನಾದ ಶಾಲೆಯೊಂದರಲ್ಲಿ ಪಾಲಕರು ಮತ್ತು ಪ್ರಾಂಶುಪಾಲರ ನಡುವೆ ಶುಲ್ಕದ ವಿಷಯವಾಗಿ ಜಗಳವಾಗಿದ್ದು, ಪ್ರಾಂಶುಪಾಲರು ಮಹಿಳೆಯ ಕೆನ್ನೆಗೆ ಬಾರಿಸಿದ್ದಾರೆ
Posted by Vijayavani on Thursday, July 9, 2020
ಇದು ಬೆಂಗಳೂರಿನ ಬಿಷಪ್ ಕಾಟನ್ ಶಾಲೆಯಲ್ಲಿ ನಡೆದಿರುವ ಘಟನೆ ಎಂಬ ಕ್ಯಾಪ್ಷನ್‌ ಜತೆ ವಾಟ್ಸ್‌ಆ್ಯಪ್‌ನಲ್ಲಿ ಸಂದೇಶ ಹರಿದಾಡುತ್ತಿದೆ. ಈ ಬಗ್ಗೆ ಸ್ಪಷ್ಟನೆ ನೀಡಿರುವ ಬಿಷಪ್ ಕಾಟನ್ ಬಾಲಕಿಯರ ಶಾಲೆಯ ಡಾ. ಲಾವಣ್ಯ ಮಿತ್ರನ್ ತಮ್ಮ ಶಾಲೆಯ ಘಟನೆ ಇಲ್ಲ, ವಿನಾಕಾರಣ ನಮ್ಮ ಸಂಸ್ಥೆಗೆ ಕೆಟ್ಟ ಹೆಸರು ತರುವ ಉದ್ದೇಶದಿಂದ ಶಾಲೆಯ ಹೆಸರನ್ನು ಬಳಸಿಕೊಳ್ಳಲಾಗಿದೆ. ನಮ್ಮ ಶಾಲೆಯು ಯಾವಾಗಲೂ ಸಾಮಾಜಿಕ ಮೌಲ್ಯ ಮತ್ತು ವಿದ್ಯಾರ್ಥಿಗಳ ರಕ್ಷಣೆಗೆ ಮಹತ್ವ ನೀಡುತ್ತಿದೆ. ಎಲ್ಲಿಯೋ ನಡೆದಿರುವ ಘಟನೆಯನ್ನು ನಮ್ಮ ಶಾಲೆಯಲ್ಲಿಯೇ ನಡೆದಿದೆ ಎಂದು ಬಿಂಬಿಸುತ್ತಿರುವುದು ತುಂಬಾ ನೋವಿನ ಸಂಗತಿ ಎಂದಿದ್ದಾರೆ.
ಅಷ್ಟಕ್ಕೂ ಈ ವಿಡಿಯೋದಲ್ಲಿ ಹಿಂದಿ ಭಾಷೆ ಮಾತನಾಡುವುದು ಕಾಣಬಹುದಾಗಿದೆ. ವಾಸ್ತವಿಕವಾಗಿ ಈ ಘಟನೆ ನಡೆದಿರುವುದು ಬಿಹಾರದ ಪಾಟ್ನಾದ ಶಾಲೆಯೊಂದರಲ್ಲಿ. ಅಲ್ಲಿಯ ಮಹಿಳೆ ಮತ್ತು ಪ್ರಾಂಶುಪಾಲರ ನಡುವೆ ಶುಲ್ಕದ ವಿಷಯವಾಗಿ ಜಗಳವಾಗಿದ್ದು, ಪ್ರಾಂಶುಪಾಲರು ಮಹಿಳೆಯ ಕೆನ್ನೆಗೆ ಬಾರಿಸಿದ್ದಾರೆ. ಇದನ್ನು ಅಲ್ಲಿಯೇ ಇರುವವರು ವಿಡಿಯೋ ಮಾಡಿ, ಶೇರ್‌ ಮಾಡಿದ್ದಾರೆ.
ಆದರೆ ಕ್ಯಾಪ್ಷನ್‌ನಲ್ಲಿ ಇದು ನಡೆದಿರುವುದು ಬೆಂಗಳೂರಿನ ಸೇಂಟ ಮಾರ್ಕ್ಸ್‌ ರಸ್ತೆಯಲ್ಲಿರುವ ಬಿಷಪ್ ಕಾಟನ್ ಗರ್ಲ್ಸ್‌ ಹೈಸ್ಕೂಲ್‌ನಲ್ಲಿ ಎಂದು ಬರೆಯಲಾಗಿದೆ.
ತಪ್ಪು ಮಾಹಿತಿ ಹರಡುವವರ ವಿರುದ್ಧ ಕ್ರಮ ಕೈಗೊಳ್ಳುವಂತೆ ಹಲವಾರು ಪಾಲಕರು ತಮಗೆ ದೂರು ನೀಡಿರುವುದಾಗಿ ವಣ್ಯ ಮಿತ್ರನ್ ಹೇಳಿದ್ದಾರೆ. (ಏಜೆನ್ಸೀಸ್‌)