ನವದೆಹಲಿ : ಕರೊನಾ ಎರಡನೇ ಅಲೆಗೆ ತತ್ತರಿಸಿರುವ ಭಾರತದಲ್ಲಿ ಎಲ್ಲರೂ ಕರೊನಾ ಲಸಿಕೆಯನ್ನು ಶೀಘ್ರವಾಗಿ ಪಡೆದು ಸುರಕ್ಷಿತರಾಗಬೇಕೆಂದು ಹಂಬಲಿಸುತ್ತಿದ್ದಾರೆ. ಆದರೆ ಹಲವು ರಾಜ್ಯಗಳಲ್ಲಿ ಭಾರತ್ ಬಯೋಟೆಕ್ನ ಕೋವಾಕ್ಸಿನ್ ಮತ್ತು ಸೀರಮ್ ಇನ್ಸ್ಟಿಟ್ಯೂಟ್ನ ಕೋವಿಶೀಲ್ಡ್ ಲಸಿಕೆಗಳ ಪೂರೈಕೆಯು ಬೇಡಿಕೆಗೆ ತಕ್ಕಷ್ಟು ನಡೆಯುತ್ತಿಲ್ಲ ಎಂಬ ದೂರು ಕೇಳಿಬರುತ್ತಿದೆ. ಹೀಗಿರುವಾಗ, ಸರ್ಕಾರಿ ಲಸಿಕೆ ಉತ್ಪಾದಕ ಕಂಪೆನಿ ಭಾರತ್ ಇಮ್ಯುನಾಲಾಜಿಕಲ್ಸ್ ಅಂಡ್ ಬಯೊಲಾಜಿಕಲ್ಸ್ ಕಾರ್ಪೊರೇಷನ್ ಲಿಮಿಟೆಡ್ (ಬಿಬ್ಕಾಲ್) ಕಂಪೆನಿಗೆ ಕೋವಾಕ್ಸಿನ್ ಲಸಿಕೆಯನ್ನು ಉತ್ಪಾದಿಸುವುದಕ್ಕೆ ಕೇಂದ್ರ ಸರ್ಕಾರ ಅನುಮತಿ ನೀಡಿದೆ.
ಸೆಪ್ಟೆಂಬರ್ನಿಂದ ಉತ್ತರಪ್ರದೇಶದ ಬುಲಂದ್ಶಹರ್ನಲ್ಲಿರುವ ತನ್ನ ಘಟಕದಲ್ಲಿ ಕರೊನಾ ಲಸಿಕೆ ಉತ್ಪಾದನೆ ಆರಂಭಿಸಲಿರುವ ಬಿಬ್ಕಾಲ್, ತಿಂಗಳಿಗೆ 1 ಕೋಟಿ ಕೋವಾಕ್ಸಿನ್ ಡೋಸ್ಗಳನ್ನು ತಯಾರಿಸುವ ಗುರಿ ಹೊಂದಿದೆ. ತದನಂತರದಲ್ಲಿ ಕ್ರಮೇಣ ಈ ಪ್ರಮಾಣವನ್ನು 2 ಕೋಟಿಗೂ ಹೆಚ್ಚಿಸಲಾಗುವುದು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. ಕೋವಾಕ್ಸಿನ್ ಉತ್ಪಾದನೆಗಾಗಿ ಕೇಂದ್ರ ಆರೋಗ್ಯ ಸಚಿವಾಲಯವು ಬಿಬ್ಕಾಲ್ಗೆ 30 ಕೋಟಿ ರೂ.ಗಳನ್ನು ಒದಗಿಸುವುದಾಗಿ ಹೇಳಿದೆ.
ಇದನ್ನೂ ಓದಿ: ಹೇರಳವಾಗಿ ಲಭ್ಯವಾಗಲಿದೆ ಸ್ಪುಟ್ನಿಕ್ ವಿ ಲಸಿಕೆ; ಆಗಸ್ಟ್ನಿಂದ ಭಾರತದಲ್ಲೇ ಉತ್ಪಾದನೆ ಶುರು
“ನಮ್ಮ ಈ ಘಟಕವು ಹಾಲಿ ಶೇ. 60 ರಷ್ಟು ಭಾರತದ ಪೋಲಿಯೋ ಲಸಿಕೆಗಳನ್ನು ಉತ್ಪಾದಿಸುತ್ತಿದೆ. ಈ ಘಟಕದಲ್ಲಿ ಕರೊನಾ ಲಸಿಕೆಯನ್ನು ಶೇಖರಿಸಿಡಲು ಸೌಲಭ್ಯಗಳಿದ್ದು, ಕೋಲ್ಡ್ ಚೈನ್ ಮೂಲಸೌಕರ್ಯವಿದೆ” ಎಂದು ಬಿಬ್ಕಾಲ್ ಉಪಾಧ್ಯಕ್ಷ ರಾಜೀವ್ ಕುಮಾರ್ ಶುಕ್ಲ ಹೇಳಿದ್ದಾರೆ. “ಭಾರತ್ ಬಯೋಟೆಕ್ ಮತ್ತು ಬಿಬ್ಕಾಲ್ ವಿಜ್ಞಾನಿಗಳು ಶೀಘ್ರದಲ್ಲೇ ಜೈವಿಕ ಸುರಕ್ಷತೆ ಪ್ರಯೋಗಾಲಯ-3(ಬಿಎಸ್-3)ಅನ್ನು ಸ್ಥಾಪಿಸಲಿದ್ದಾರೆ ಮತ್ತು ಕೊವಾಕ್ಸಿನ್ ಉತ್ಪಾದನೆಯು ಸೆಪ್ಟೆಂಬರ್ ವೇಳೆಗೆ ಪ್ರಾರಂಭವಾಗಲಿದೆ” ಎಂದಿದ್ದಾರೆ. (ಏಜೆನ್ಸೀಸ್)
ರಾಜ್ಯದಲ್ಲಿ ಕರೊನಾ ಆರ್ನಾಟ್ ವ್ಯಾಲ್ಯೂ ಇಳಿಕೆ… ಹರಡುವಿಕೆ ಪ್ರಮಾಣ ಕುಸಿತ
250 ರೂ.ಗೆ ಮನೆಯಲ್ಲೇ ಕರೊನಾ ಪರೀಕ್ಷೆ ! ರಾಪಿಡ್ ಆ್ಯಂಟಿಜನ್ ಹೋಂ ಟೆಸ್ಟ್ ಕಿಟ್ ಬಳಕೆಗೆ ಹಸಿರು ನಿಶಾನೆ