ಆಸ್ಟ್ರೇಲಿಯಾ: ಆಸ್ಟ್ರೇಲಿಯಾದಲ್ಲಿ ಪಾಲಕ್ ಸೊಪ್ಪು ಎಂದುಕೊಂಡು ಜನ ಸಲಾಡ್ ಮಾಡಿಕೊಂಡು ಈ ಸೊಪ್ಪನ್ನು ತಿಂದಿದ್ದಾರೆ. ನಂತರ ಆಗಿದ್ದು ಘೋರ ದುರಂತ! ಜನ ಅಸಲಿಗೆ ತಿಂದಿದ್ದು ಒಂದು ರೀತಿಯ ಕಳೆ ಗಿಡದ ಎಲೆಗಳನ್ನು. ಇದರಿಂದ ಜನರು ತೀವ್ರವಾದ ಭ್ರಮೆಗಳಿಗೆ ಒಳಗಾಗಿದ್ದು ಇದರ ಎಫೆಕ್ಟ್ ಬಹುತೇಕ ಅತಿಯಾಗಿ ನಶೆ ಮಾಡಿದ ರೀತಿಯಲ್ಲೇ ಇದೆ. ಈ ಗಿಡವನ್ನು ಗುರುತಿಸುವುದೇ ‘ನಾರ್ಕೋಟಿಕ್ ಪ್ಲಾಂಟ್’ ಎಂದು!
ಆಗಿದ್ದೇನು?
ಇದು, ಕೊಯ್ಲು ಮಾಡುವಾಗ ಪಾಲಕ್ ಸೊಪ್ಪಿನ ಜೊತೆಗೆ ತಪ್ಪಿ ಸೇರಿಕೊಂಡಿದ್ದು ಮಾರುಕಟ್ಟೆ ತಲುಪಿದೆ. ಇದರಿಂದಾಗಿ ಜನ ಅನಾರೋಗ್ಯಕ್ಕೆ ತುತ್ತಾಗುತ್ತಿದ್ದಾರೆ. ಅಸಲಿಗೆ ಅಲ್ಲಿನ ಜನರು ತಿಂದದ್ದು ಥಾರ್ನ್ ಆ್ಯಪಲ್ ಎನ್ನುವ ಕಳೆ ಗಿಡವನ್ನು.
ಏನಿದು ಥಾರ್ನ್ ಆ್ಯಪಲ್?
ಜಿಮ್ಸನ್ವೀಡ್ ಎಂದೂ ಕರೆಯಲ್ಪಡುವ ಥಾರ್ನ್ ಆ್ಯಪಲ್ (ಡಾಟುರಾ ಸ್ಟ್ರಾಮೋನಿಯಂ), ಸನ್ನಿ, ಗೊಂದಲ, ಭ್ರಮೆಗಳು, ಮಸುಕಾದ ದೃಷ್ಟಿ, ಕೆಂಪು ಮುಖ, ತ್ವರಿತ ಹೃದಯ ಬಡಿತ ಮತ್ತು ಒಣ ಬಾಯಿ ಮತ್ತು ಚರ್ಮದಂತಹ ರೋಗಲಕ್ಷಣಗಳನ್ನು ಉಂಟುಮಾಡಬಹುದು. ಈ ಗಿಡವನ್ನು ಮುಟ್ಟುವುದರಿಂದ ಕೆಲವರಿಗೆ ಚರ್ಮರೋಗ, ತಲೆನೋವು ಮತ್ತು ವಾಕರಿಕೆ ಉಂಟಾಗುತ್ತದೆ.
ಡಿಸೆಂಬರ್ 18 ರ ಹೊತ್ತಿಗೆ, ನ್ಯೂ ಸೌತ್ ವೇಲ್ಸ್, ವಿಕ್ಟೋರಿಯಾ ಮತ್ತು ಕ್ವೀನ್ಸ್ಲ್ಯಾಂಡ್ನಾದ್ಯಂತ 190 ಕ್ಕೂ ಹೆಚ್ಚು ಪ್ರಕರಣಗಳು ವರದಿಯಾಗಿವೆ. ಇಲ್ಲಿಯವರೆಗೆ, ಹಲವಾರು ಜನರು ಆಸ್ಪತ್ರೆಗೆ ದಾಖಲಾಗಿದ್ದಾರೆ. ಬಹುಪಾಲು ಜನರು ತ್ವರಿತವಾಗಿ ಚೇತರಿಸಿಕೊಳ್ಳುತ್ತಿದ್ದಾರೆ ಎಂದು ತಿಳಿದುಬಂದಿದೆ.