ಅಂದು ಇಂದಿರಾಗಾಂಧಿ ಭದ್ರತಾ ಉಸ್ತುವಾರಿ, ಪಕ್ಷಾಂತರ ವಿರೋಧಿ ಕಾನೂನಿನಡಿಯಲ್ಲಿ ಅನರ್ಹಗೊಂಡ ಮೊದಲ ಸಂಸದ ಇಂದು ಮಿಜೋರಾಂ ಸಿಎಂ

ಐಜ್ವಾಲ್: 30 ವರ್ಷಗಳ ಸುದೀರ್ಘ ಕಾಯುವಿಕೆಯ ನಂತರ, ಮಾಜಿ ಪ್ರಧಾನಿ ಇಂದಿರಾ ಗಾಂಧಿ ಅವರ ಭದ್ರತಾ ಉಸ್ತುವಾರಿಯಾಗಿದ್ದ ZPM ಮುಖ್ಯಸ್ಥ ಲಾಲ್ದುಹೋಮ ಅವರು ಈಶಾನ್ಯ ರಾಜ್ಯವಾದ ಮಿಜೋರಾಂನಲ್ಲಿ ಮುಖ್ಯಮಂತ್ರಿಯಾಗಿ ಪ್ರಮಾಣವಚನ ಸ್ವೀಕರಿಸಲಿದ್ದಾರೆ. ಲಾಲ್ದುಹೋಮ ಅವರಿಗೆ 74 ವರ್ಷ. ಅವರ ಪಕ್ಷವಾದ ಜೋರಾಮ್ ಪೀಪಲ್ಸ್ ಮೂವ್‌ಮೆಂಟ್ (ZPM), 40 ಸದಸ್ಯ ಬಲದ ವಿಧಾನಸಭೆಯಲ್ಲಿ 27 ಸ್ಥಾನಗಳನ್ನು ಗೆದ್ದು ಸ್ವಂತ ಬಲದಿಂದ ಬಹುಮತ ಗಳಿಸಿದೆ. ಲಾಲ್ದುಹೋಮದ ಈವರೆಗಿನ ಪಯಣ ಸಾಕಷ್ಟು ಕುತೂಹಲಕಾರಿಯಾಗಿದೆ. ಪಕ್ಷಾಂತರ ನಿಷೇಧ ಕಾಯ್ದೆಯಡಿ ಸದಸ್ಯತ್ವ ಕಳೆದುಕೊಂಡ ಮೊದಲ ಸಂಸದ ಎಂಬ ಹೆಗ್ಗಳಿಕೆಗೂ ಅವರ ಹೆಸರು ದಾಖಲಾಗಿದೆ. 1998 ರಲ್ಲಿ ಲಾಲ್ದುಹೋಮರನ್ನು ಪಕ್ಷಾಂತರ ವಿರೋಧಿ ಕಾನೂನಿನ ಅಡಿಯಲ್ಲಿ ಅನರ್ಹಗೊಳಿಸಲಾಯಿತು.

ಜೋರಾಮ್ ನ್ಯಾಶನಲಿಸ್ಟ್ ಪಕ್ಷ ಸ್ಥಾಪನೆ
1984 ರಲ್ಲಿ ಮಿಜೋರಾಂನಿಂದ ಸಂಸದರಾಗಿ ಆಯ್ಕೆಯಾದರು. ನಂತರ ಅವರು ಆಗಿನ ಪ್ರಧಾನಿ ಇಂದಿರಾ ಗಾಂಧಿಯವರ ಭದ್ರತಾ ಉಸ್ತುವಾರಿ ಸೇವೆಗೆ ರಾಜೀನಾಮೆ ನೀಡಿದರು. ರಾಜಕೀಯಕ್ಕೆ ಪ್ರವೇಶಿಸಿದ ನಂತರ ಕಾಂಗ್ರೆಸ್‌ನಿಂದ ಲಾಲ್ದುಹೋಮ ಪಕ್ಷ ತೊರೆದರು. ಇದಾದ ಬಳಿಕ ಪಕ್ಷಾಂತರ ನಿಷೇಧ ಕಾನೂನಿಗೆ ಅನರ್ಹಗೊಳಿಸಬೇಕಾಯಿತು. ಈ ಕಾನೂನಿನಿಂದ ಸದಸ್ಯತ್ವ ಕಳೆದುಕೊಂಡ ದೇಶದ ಮೊದಲ ಸಂಸದ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಿದ್ದಾರೆ. ಇದರ ನಂತರ ಅವರು ಜೋರಾಮ್ ನ್ಯಾಶನಲಿಸ್ಟ್ ಪಕ್ಷವನ್ನು ಸ್ಥಾಪಿಸಿದರು. ನಂತರ ಅವರ ಪಕ್ಷವು ಜೋರಾಮ್ ಪೀಪಲ್ಸ್ ಮೂವ್‌ಮೆಂಟ್‌ಗೆ ಸೇರ್ಪಡೆಗೊಂಡಿತು. 2018ರ ವಿಧಾನಸಭಾ ಚುನಾವಣೆಯಲ್ಲಿ ಅವರನ್ನು ಮುಖ್ಯಮಂತ್ರಿ ಅಭ್ಯರ್ಥಿ ಎಂದು ಘೋಷಿಸಲಾಗಿತ್ತು. ಅವರು ಸೆರ್ಚಿಪ್ ಮತ್ತು ಐಜ್ವಾಲ್ ವೆಸ್ಟ್-1 ಎಂಬ ಎರಡು ಸ್ಥಾನಗಳಿಂದ ಗೆದ್ದಿದ್ದರು. ಕಾಂಗ್ರೆಸ್‌ನ ಹಾಲಿ ಮುಖ್ಯಮಂತ್ರಿ ಲಾಲ್ ಥನ್ಹಾವ್ಲಾ ಅವರನ್ನೂ ಸೋಲಿಸಿದರು. ತದನಂತರ ಐಜ್ವಾಲ್ ವೆಸ್ಟ್ 1 ಸ್ಥಾನವನ್ನು ಬಿಟ್ಟುಕೊಟ್ಟು ಸೆರ್ಚಿಪ್ ಅನ್ನು ಉಳಿಸಿಕೊಂಡರು.  

2018 ರಲ್ಲಿ ಒಗ್ಗೂಡಿದ ಏಳು ಪಕ್ಷಗಳು
ಮಿಜೋರಾಂನಲ್ಲಿ ಏಳು ವಿಭಿನ್ನ ರಾಜಕೀಯ ಪಕ್ಷಗಳು ZPM ಅನ್ನು ರಚಿಸಿ, 2018 ರಲ್ಲಿ ಚುನಾವಣೆಯಲ್ಲಿ ಸ್ಪರ್ಧಿಸಿದವು. ಈ ಗುಂಪು ಏಳು ಸ್ಥಾನಗಳನ್ನು ಗೆದ್ದು ವಿಧಾನಸಭೆಯಲ್ಲಿ ಪ್ರಧಾನ ಪ್ರತಿಪಕ್ಷವಾಯಿತು. ಇದೀಗ ಲಾಲ್ದುಹೋಮ ಭರ್ಜರಿ ಪುನರಾಗಮನ ಮಾಡಿದ್ದು, ರಾಜ್ಯದಲ್ಲಿ ಸಿಎಂ ಆಗಿ ಪ್ರಮಾಣ ವಚನ ಸ್ವೀಕರಿಸಲಿದ್ದಾರೆ. ಲಾಲ್ದುಹೋಮ ರೈತನ ಮಗ. ನಾಲ್ಕು ಸಹೋದರರಲ್ಲಿ ಇವರು ಕಿರಿಯ. 

ಲಾಲ್ದುಹೋಮ ರಾಜಕೀಯ ಪಯಣ

ಮೆಟ್ರಿಕ್ಯುಲೇಷನ್ ವರೆಗೆ ಓದಿದ ನಂತರ, ಲಾಲ್ದುಹೋಮ ಅವರು 1972 ರಲ್ಲಿ ಮಿಜೋರಾಂನ ಮುಖ್ಯಮಂತ್ರಿಗಳ ಕಚೇರಿಯಲ್ಲಿ ಪ್ರಧಾನ ಸಹಾಯಕರಾಗಿ ತಮ್ಮ ಮೊದಲ ಕೆಲಸ ಮಾಡಿದರು. ಇದರೊಂದಿಗೆ ಗೌಹಾಟಿ ವಿಶ್ವವಿದ್ಯಾಲಯದಿಂದ ಉನ್ನತ ಶಿಕ್ಷಣವನ್ನೂ ಮುಂದುವರಿಸಿದರು. 1977 ರವರೆಗೆ ಸಹಾಯಕರಾಗಿ ಕೆಲಸ ಮಾಡಿದ ನಂತರ ಲಾಲ್ದುಹೋಮ ಅವರು ನಾಗರಿಕ ಸೇವಾ ಪರೀಕ್ಷೆಯನ್ನು ತೆಗೆದುಕೊಂಡರು. ಇದಾದ ಬಳಿಕ ಐಪಿಎಸ್ ಆಗಿ ಸೇವೆ ಆರಂಭಿಸಿದರು. ಗೋವಾದಲ್ಲಿ ಕಳ್ಳಸಾಗಾಣಿಕೆದಾರರ ವಿರುದ್ಧ ಕ್ರಮ ಕೈಗೊಂಡ ನಂತರ ಮಾಧ್ಯಮಗಳ ಬೆಳಕಿಗೆ ಬಂದರು. ಇದರ ನಂತರ, 1982 ರಲ್ಲಿ, ಅವರಿಗೆ ಪ್ರಧಾನಿ ಇಂದಿರಾ ಗಾಂಧಿಯವರ ಭದ್ರತಾ ಉಸ್ತುವಾರಿ ಜವಾಬ್ದಾರಿಯನ್ನು ನೀಡಲಾಯಿತು. ಲಾಲ್ದುಹೋಮ ವಿಶೇಷ ಬಡ್ತಿ ಪಡೆದರು, ಅವರನ್ನು ಡಿಸಿಪಿ ಮಾಡಲಾಯಿತು ಮತ್ತು ನಂತರ 1982 ರ ಏಷ್ಯನ್ ಕ್ರೀಡಾಕೂಟದ ಸಂಘಟನಾ ಸಮಿತಿಯ ಕಾರ್ಯದರ್ಶಿಯಾದರು. ಇದರ ಅಧ್ಯಕ್ಷರು ರಾಜೀವ್ ಗಾಂಧಿ.

ಇದೀಗ ಮಿಜೋರಾಂ ಮುಖ್ಯಮಂತ್ರಿಯಾಗಲಿರುವ ಲಾಲ್ದುಹೋಮ ಅವರು ಮಾಜಿ ಪ್ರಧಾನಿ ಇಂದಿರಾಗಾಂಧಿಯವರ ಪ್ರಭಾವದಿಂದ ರಾಜಕೀಯಕ್ಕೆ ಕಾಲಿಟ್ಟರು. ಐಪಿಎಸ್ ಕೆಲಸ ಬಿಟ್ಟು ಕಾಂಗ್ರೆಸ್ ಸೇರಿದರು. ಲಾಲ್ದುಹೋಮ ಅವರು ಈ ಹಿಂದೆ ಮಿಜೋರಾಂ ಕಾಂಗ್ರೆಸ್‌ನ ಅಧ್ಯಕ್ಷರೂ ಆಗಿದ್ದರು. ಲಾಲ್ದುಹೋಮ ಅವರಿಗೆ ಇಬ್ಬರು ಗಂಡು ಮಕ್ಕಳಿದ್ದಾರೆ. 

ಬೆಂಗಳೂರು ಸೇರಿ ರಾಜ್ಯದ ಹಲವು ಜಿಲ್ಲೆಗಳಲ್ಲಿ ಏಕಕಾಲಕ್ಕೆ ಲೋಕಾ ದಾಳಿ; ಬಿ.ವೈ.ವಿಜಯೇಂದ್ರ ಪತ್ನಿಯ ಸಹೋದರನ ಮನೆ‌ ಮೇಲೂ‌ ರೇಡ್‌