ಜೈಪುರ: ಭಾರತದ ಎಲೆಕ್ಟ್ರಿಕ್ ಸ್ಕೂಟರ್ಗಳ ಮಾರುಕಟ್ಟೆಗೆ ಮತ್ತೊಂದು ಮೇಡ್ ಇನ್ ಇಂಡಿಯ ಸ್ಕೂಟರ್ ಪ್ರವೇಶಿಸುತ್ತಿದೆ. ‘ಬೌನ್ಸ್ ಇನ್ಫಿನಿಟಿ’ ಹೆಸರಿನ ಈ ವಿದ್ಯುತ್ ಚಾಲಿತ ಸ್ಕೂಟರ್ನ ಪ್ರೀ-ಬುಕಿಂಗ್ ಡಿಸೆಂಬರ್ 2 ರಿಂದ ಆರಂಭವಾಗುತ್ತಿದೆ. ಮುಂದಿನ ವರ್ಷ ಗ್ರಾಹಕರಿಗೆ ತಲುಪಲಿರುವ ಈ ಸ್ಕೂಟರನ್ನು ಕೇವಲ 499 ರೂಪಾಯಿ ಪಾವತಿಸಿ, ಕಾದಿರಿಸಬಹುದಾಗಿದೆ.
ರಾಜಸ್ಥಾನದ ಭಿವಾಡಿಯಲ್ಲಿ 22ಮೋಟರ್ಸ್ನ ಉತ್ಪಾದನಾ ಘಟಕದಲ್ಲಿ ತಯಾರಾಗುತ್ತಿರುವ ಈ ಎಲೆಕ್ಟ್ರಿಕ್ ಸ್ಕೂಟರ್ಗಳನ್ನು ಬೌನ್ಸ್ ಕಂಪೆನಿ, ಎರಡು ಮಾದರಿಗಳಲ್ಲಿ ಮಾರಾಟ ಮಾಡಲಿದೆ – ಬ್ಯಾಟರಿ ಪ್ಯಾಕ್ನೊಂದಿಗೆ ಮತ್ತು ಬ್ಯಾಟರಿ ಪ್ಯಾಕ್ ಇಲ್ಲದೆ. ಬ್ಯಾಟರಿ ಸ್ವಾಪಿಂಗ್ ನೆಟ್ವರ್ಕನ್ನೂ ಹೊಂದಿರುವ ಬೌನ್ಸ್, ಲೀ-ಐಯಾನ್ ಬ್ಯಾಟರಿಗಳನ್ನು ಮಾರಾಟ ಮಾಡುವ ಮತ್ತು ಬಾಡಿಗೆಗೆ ಒದಗಿಸುವ ಸೇವೆ ಕೂಡ ನೀಡಲಿದೆ. ಈ ಮೂಲಕ ವಾಹನದ ಬ್ಯಾಟರಿಯನ್ನು ಚಾರ್ಜ್ ಮಾಡುವ ಬದಲು, ಖಾಲಿ ಬ್ಯಾಟರಿಯನ್ನು ಪೂರ್ಣವಾಗಿ ಚಾರ್ಜ್ ಆಗಿರುವ ಬ್ಯಾಟರಿಯೊಂದಿಗೆ ಬದಲಾಯಿಸಿಕೊಳ್ಳುವ ಆಯ್ಕೆಯನ್ನು ಗ್ರಾಹಕರು ಹೊಂದಲಿದ್ದಾರೆ ಎನ್ನಲಾಗಿದೆ.
ಇದನ್ನೂ ಓದಿ: ಕಾರು ಶೋ ರೂಂಗೆ ನುಗ್ಗಿ ಆತಂಕ ಸೃಷ್ಟಿಸಿದ ಕಾಡು ಹಂದಿ
ಹಾಲಿ ವರ್ಷಕ್ಕೆ 1.8 ಲಕ್ಷ ಎಲೆಕ್ಟ್ರಿಕ್ ಸ್ಕೂಟರ್ಗಳನ್ನು ಉತ್ಪಾದಿಸುವ ಸಾಮರ್ಥ್ಯವನ್ನು ತನ್ನ ರಾಜಸ್ಥಾನದ ಘಟಕ ಹೊಂದಿದ್ದು, ದಕ್ಷಿಣ ಭಾರತದಲ್ಲಿ ಮತ್ತೊಂದು ಉತ್ಪಾದನಾ ಘಟಕವನ್ನು ಶೀಘ್ರದಲ್ಲೇ ಸ್ಥಾಪಿಸಲಾಗುವುದು. ಮುಂದಿನ ವರ್ಷದಲ್ಲಿ ತನ್ನ ಇವಿ ವ್ಯವಹಾರ ಮತ್ತು ಬ್ಯಾಟರಿ ಸ್ವಾಪಿಂಗ್ ನೆಟ್ವರ್ಕನ್ನು ಬೂಸ್ಟ್ ಮಾಡಲಿದ್ದು, ಡೀಲರ್ಶಿಪ್ ಜಾಲವನ್ನು ವಿಸ್ತರಿಸಲು 100 ಮಿಲಿಯನ್ ಡಾಲರ್ ಹಣವನ್ನು ತೆಗೆದಿರಿಸಲಾಗಿದೆ ಎಂದು ಬೌನ್ಸ್ ಕಂಪೆನಿಯ ಹೇಳಿಕೆ ತಿಳಿಸಿದೆ. (ಏಜೆನ್ಸೀಸ್)
ಕೋವಿಡ್ಯೇತರ ಕಾಯಿಲೆಗಳಿಗೆ 2-3 ದಿನದಲ್ಲಿ ಔಷಧ ಪೂರೈಕೆ: ಆರೋಗ್ಯ ಸಚಿವ ಕೆ. ಸುಧಾಕರ್