ಚಂಡೀಗಢ: ರಾಷ್ಟ್ರದಲ್ಲಿ ಮಾರಕ ಕೊರೊನಾ ವೈರಸ್ ಸೋಂಕು ಸ್ಫೋಟಗೊಂಡ ಬೆನ್ನಲ್ಲೇ ಹರಿಯಾಣದ ಕಾಂಗ್ರೆಸ್ ಶಾಸಕರು ವಿಧಾನಸಭೆಯಲ್ಲಿ ಚೀನಾ ತಯಾರಿತ ಮೊಬೈಲ್ ಟ್ಯಾಬ್ಲೆಟ್ಸ್ ವಿರುದ್ಧ ಧ್ವನಿ ಎತ್ತಿದ್ದಾರೆ.
ಹರಿಯಾಣದ ಬಜೆಟ್ ಅಧಿವೇಶನಕ್ಕಾಗಿ ವಿತರಿಸಲಾಗಿರುವ ಮೊಬೈಲ್ ಟ್ಯಾಬ್ಲೆಟ್ಸ್ಗಳ ವಿರುದ್ಧ ಸದನದಲ್ಲೇ ಆಕ್ರೋಶ ವ್ಯಕ್ತಪಡಿಸಿದರು. ಕೊರೊನಾ ವೈರಸ್ ಮೊದಲು ಸ್ಫೋಟಗೊಂಡ ಚೀನಾದ ಹುಬೇ ಪ್ರಾಂತ್ಯದ ವುಹಾನ್ನಿಂದ ಮೊಬೈಲ್ ಟ್ಯಾಬ್ಲೆಟ್ಸ್ಗಳನ್ನು ಆಮದು ಮಾಡಿಕೊಳ್ಳಲಾಗಿದೆ. ಅವುಗಳಿಂದ ನಮಗೆ ಸಮಾಧಾನವಿಲ್ಲ ಎಂದಿದ್ದಾರೆ.
ಕಾಂಗ್ರೆಸ್ ಶಾಸಕರಾದ ಭೂಪೇಂದ್ರ ಸಿಂಗ್ ಹೂಡ, ಗೀತಾ ಭಕ್ಕುಲ, ವರುಣ್ ಮುಲಾನಾ, ಚಿರಂಜೀವ್ ರಾವ್, ಅಫ್ತಾಬ್ ಅಹ್ಮದ್ ಹಾಗೂ ರಾವ್ ದನ್ ಸಿಂಗ್ ಸೇರಿದಂತೆ ಅನೇಕ ನಾಯಕರು ಸದನದಲ್ಲಿ ಚೈನೀಸ್ ಟ್ಯಾಬ್ಲೆಟ್ಗಳ ವಿರುದ್ಧ ಕಿಡಿಕಾರಿದರು.
ಕೊರೊನಾ ವೈರಸ್ ಚೀನಾ ವ್ಯಾಪಾರದ ಮೇಲೆ ಭಾರಿ ಪರಿಣಾಮ ಬೀರಿದ್ದು, ಅಲ್ಲಿನ ವಸ್ತುಗಳು ಭಾರಿ ಅಗ್ಗದಲ್ಲಿ ಸಿಗುತ್ತಿರುವುದರಿಂದ ಟ್ಯಾಬ್ಲೆಟ್ಗಳನ್ನು ಆಮದು ಮಾಡಿಕೊಂಡಂತೆ ಕಾಣುತ್ತದೆ ಎಂದು ಕಾಂಗ್ರೆಸ್ ಶಾಸಕರು ಹೇಳಿದರು. ಅಲ್ಲದೆ, ಆರೋಗ್ಯ ಸಚಿವ ಅನಿಲ್ ವಿಜ್ ಕಡೆ ತಿರುಗಿ ಟ್ಯಾಬ್ಲೆಟ್ಗಳ ಸುರಕ್ಷತೆ ಬಗ್ಗೆ ಭರವಸೆ ನೀಡುವಂತೆ ಒತ್ತಾಯಿಸಿದರು. (ಏಜೆನ್ಸೀಸ್)