ನವದೆಹಲಿ: ಕ್ರಿಕೆಟ್ ಹುಟ್ಟುವಿನಿಂದ ಹಿಡಿದು ಇಂದಿನವರೆಗೂ ಇಂಡೋ-ಪಾಕ್ ಕದನ ರೋಚಕತೆ ಕಾಯ್ದುಕೊಂಡಿದೆ. ಅದರಲ್ಲೂ ವಿಶ್ವಕಪ್ ಕದನಗಳ ಬಗ್ಗೆಯಂತೂ ಹೇಳತೀರದು, ಐಸಿಸಿ ಟಿ20 ಮತ್ತು ಏಕದಿನ ವಿಶ್ವಕಪ್ ಟೂರ್ನಿಯ ಇತಿಹಾಸದಲ್ಲಿ ಒಟ್ಟು 14 ಬಾರಿ ಉಭಯ ತಂಡಗಳು ಮುಖಾಮುಖಿಯಾಗಿವೆ. ಗಮನಾರ್ಹ ಸಂಗತಿ ಏನೆಂದರೆ, ಏಕದಿನ ವಿಶ್ವಕಪ್ನಲ್ಲಿ ಏಳು ಬಾರಿಯೂ ಭಾರತವೇ ವಿಜಯೋತ್ಸವ ಆಚರಿಸಿದೆ. ಟಿ20 ವಿಶ್ವಕಪ್ನಲ್ಲಿಯೂ 7 ಬಾರಿ ಉಭಯ ತಂಡಗಳು ಸೆಣಸಾಡಿದ್ದು, ಪಾಕಿಸ್ತಾನ 2021ರಲ್ಲಿ ಒಂದು ಬಾರಿ ಗೆಲುವು ದಾಖಲಿಸಿದೆ. ಎರಡು ಮಾದರಿಯಲ್ಲೂ ಭಾರತವೇ ಪಾರುಪತ್ಯ ಸಾಧಿಸಿದೆ. ಇಂಡೋ-ಪಾಕ್ ಕದನ ಅನೇಕ ರೋಚಕ ಕ್ಷಣಗಳಿಗೆ ಸಾಕ್ಷಿಯಾಗಿದ್ದು, ಅದರಲ್ಲೊಂದು ಘಟನೆಯನ್ನು ನಾವಿಂದು ಮೆಲಕು ಹಾಕೋಣ.
ಟೀಮ್ ಇಂಡಿಯಾದ ಮಾಜಿ ಆಟಗಾರ ಅಜಯ್ ಜಡೇಜಾ ಅವರು ಪಾಕಿಸ್ತಾನ ವಿರುದ್ಧ 1996ರ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ನೀಡಿದ ಸ್ಫೋಟಕ ಪ್ರದರ್ಶನ ಇಂದಿಗೂ ನೆನಪಿನಲ್ಲಿ ಉಳಿಯುವಂತಿದೆ. ಆ ಕಾಲದಲ್ಲಿ ಕ್ರಿಕೆಟ್ ಜಗತ್ತಿನ ಬಲಿಷ್ಠ ಬೌಲರ್ ಎನಿಸಿಕೊಂಡಿದ್ದ ವಾಕರ್ ಯೂನಿಸ್ಗೆ ಜಡೇಜಾ ಅವರು ಬೆವರಿಳಿಸಿದ ಪರಿಯಂತೂ ಮರೆಯುವಂತಿಲ್ಲ.
ಶ್ರೀಲಂಕಾ ಗೆಲುವು
ವಿವರಣೆಗೆ ಬರುವುದಾರೆ 1996ರ ಏಕದಿನ ವಿಶ್ವಕಪ್ ಅನ್ನು ಭಾರತ, ಪಾಕಿಸ್ತಾನ ಮತ್ತು ಶ್ರೀಲಂಕಾ ಆಯೋಜಿಸಿತು. ಭಾರತದ 17 ಸ್ಥಳಗಳಲ್ಲಿ 17 ಪಂದ್ಯಗಳು, ಪಾಕಿಸ್ತಾನ 6 ಸ್ಥಳಗಳಲ್ಲಿ 16 ಪಂದ್ಯಗಳು ಮತ್ತು ಶ್ರೀಲಂಕಾದ 3 ಸ್ಥಳಗಳಲ್ಲಿ 4 ಪಂದ್ಯಗಳು ನಡೆದವು. ಈ ಟೂರ್ನಿಯಲ್ಲಿ ಶ್ರೀಲಂಕಾ ಮತ್ತು ಆಸ್ಟ್ರೇಲಿಯಾ ಫೈನಲ್ ಪ್ರವೇಶಿಸಿದವು. ಅಂತಿಮವಾಗಿ ಗೆಲುವು ಸಾಧಿಸುವ ಮೂಲಕ ಲಂಕಾ ಮೊದಲ ಬಾರಿಗೆ ವಿಶ್ವಕಪ್ ಟ್ರೋಫಿಗೆ ಮುತ್ತಿಟ್ಟಿತು. ಆದರೆ, ಇಡೀ ಟೂರ್ನಿಯಲ್ಲಿ ಅಜಯ್ ಜಡೇಜಾ ಅವರ ಇನ್ನಿಂಗ್ಸ್ ಮಾತ್ರ ಇಂದಿಗೂ ಮನಸ್ಸಿನಲ್ಲಿ ಉಳಿದಿದೆ. ಆ ಕಾಲದಲ್ಲೇ ಅಬ್ಬರದ ಬ್ಯಾಟಿಂಗ್ ಏನು ಎಂಬುದನ್ನು ಅದೂ ಪಾಕಿಸ್ತಾನದ ವಿರುದ್ಧವೇ ಜಡೇಜಾ ತೋರಿಸಿಕೊಟ್ಟಿದ್ದರು.
ಬೆಂಗಳೂರಿನ ಚಿನ್ನಸ್ವಾಮಿ ಕ್ರೀಡಾಂಗಣದಲ್ಲಿ ನಡೆದ ಕ್ವಾರ್ಟರ್ ಫೈನಲ್ನಲ್ಲಿ ಸಾಂಪ್ರದಾಯಿಕ ಎದುರಾಳಿಗಳು ಮುಖಾಮುಖಿಯಾದರು. 1996ರ ಮಾರ್ಚ್ 9ರಂದು ಈ ಪಂದ್ಯ ನಡೆಯಿತು. ಈ ವೇಳೆ ಇಡೀ ಮೈದಾನ ಕಿಕ್ಕಿರಿದು ತುಂಬಿತ್ತು. ಭಾರತದ ಪ್ರದರ್ಶನ ಕಂಡು ಇಡೀ ಕ್ರೀಡಾಂಗಣವೇ ಹುಚ್ಚೆದ್ದು ಕುಣಿದಿತ್ತು.
ವಾಕರ್ ಯೂನಿಸ್ ಮೇಲೆ ಜಡೇಜಾ ಸವಾರಿ
ಮೊದಲು ಬ್ಯಾಟ್ ಮಾಡಿದ ಭಾರತದ ಪರ ಮಧ್ಯಮ ಕ್ರಮಾಂಕದಲ್ಲಿ ಕ್ರೀಸ್ಗೆ ಇಳಿದಿದ್ದ ಅಜೇಯ್ ಜಡೇಜಾ ಟಿ20 ಪಂದ್ಯದ ಮಾದರಿಯಲ್ಲಿ ಬ್ಯಾಟ್ ಬೀಸಿದರು. ಕೇವಲ 25 ಎಸೆತದಲ್ಲಿ 4 ಬೌಂಡರಿ ಹಾಗೂ 2 ಸಿಕ್ಸರ್ನೊಂದಿಗೆ 45 ರನ್ ಕಲೆ ಹಾಕಿದರು. 180 ಸ್ಟ್ರೈಕ್ರೇಟ್ ಹೊಂದಿದ್ದರು. ಆ ಕಾಲದಲ್ಲಿ ಪಾಕ್ನ ವಾಕರ್ ಯೂನಿಸ್ ಶ್ರೇಷ್ಠ ಬೌಲರ್ ಆಗಿದ್ದರು. ಅವರು ಬೌಲಿಂಗ್ಗೆ ಬಂದರೆ ಅನೇಕರು ನಡುಗುತ್ತಿದ್ದರು. ಆದರೆ, ವಾಕರ್ ಯೂನಿಸ್ ಅವರ ಒಂದೇ ಓವರ್ನಲ್ಲಿ ಜಡೇಜಾ ಅವರು 22 ರನ್ ಬಾರಿಸುವ ಮೂಲಕ ಅವರನ್ನು ಕ್ಲಬ್ ಬೌಲರ್ ರೀತಿ ಮಾಡಿಟ್ಟಿದ್ದರು. ಇಂದಿಗೂ ಭಾರತ ಪಾಲಿಗೆ ಇದೊಂದು ಒಳ್ಳೆಯ ಕ್ಷಣವಾಗಿಯೇ ಉಳಿದುಕೊಂಡಿದೆ.
ಭಾರತಕ್ಕೆ ಅಮೋಘ ಜಯ
ಜಡೇಜಾ ಅವರ ಅದ್ಭುತ ಬ್ಯಾಟಿಂಗ್ ನೆರವಿನಿಂದ ಭಾರತ ಈ ಪಂದ್ಯದಲ್ಲಿ 8 ವಿಕೆಟ್ ನಷ್ಟಕ್ಕೆ 287 ರನ್ ಕಲೆಹಾಕಿತ್ತು. ಗುರಿ ಬೆನ್ನತ್ತಿದ್ದ ಪಾಕ್ 9 ವಿಕೆಟ್ ನಷ್ಟಕ್ಕೆ ಕೇವಲ 248 ರನ್ ಮಾತ್ರ ಕಲೆಹಾಕುವ ಮೂಲಕ ಭಾರತ ಎದುರು ಪಾಕ್ ಸೋಲುಂಡಿತು.
ಮ್ಯಾಚ್ ಫಿಕ್ಸಿಂಗ್ ಆರೋಪ
ಆದರೆ, ಜಡೇಜಾ ಅವರ ವೃತ್ತಿಜೀವನವು 2000ರಲ್ಲಿ ಮ್ಯಾಚ್ ಫಿಕ್ಸಿಂಗ್ ಆರೋಪದೊಂದಿಗೆ ಅಂತ್ಯವಾಯಿತು. 5 ವರ್ಷಗಳ ಕಾಲ ನಿಷೇಧಕ್ಕೊಳಗಾದ ಬಳಿಕ ಜಡೇಜಾ ಅವರು ಮತ್ತೆ ಭಾರತದ ಪರ ಆಡಲು ಸಾಧ್ಯವಾಗಲಿಲ್ಲ. ವಕಾರ್ ಯೂನಿಸ್ ಅವರು 2003ರ ವಿಶ್ವಕಪ್ ವರೆಗೆ ತಮ್ಮ ಆಟವನ್ನು ಮುಂದುವರೆಸಿದರು.
ನಾಡಿದ್ದು ಹೈವೋಲ್ಟೇಜ್ ಪಂದ್ಯ
ಕ್ರೀಡಾಲೋಕದ ಸಾಂಪ್ರಾದಾಯಿಕ ಎದುರಾಳಿಗಳ ಕ್ರಿಕೆಟ್ ಕದನಕ್ಕೆ ಕೇವಲ 2 ದಿನವಷ್ಟೇ ಬಾಕಿ ಇದೆ. ಅ. 14ರಂದು ಗುಜರಾತಿನ ಅಹಮದಾಬಾದ್ನಲ್ಲಿರುವ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ಇಂಡೋ-ಪಾಕ್ ಕ್ರಿಕೆಟ್ ಕದನ ನಡೆಯಲಿದೆ. ಈಗಾಗಲೇ ಈ ಪಂದ್ಯದ ಟಿಕೆಟ್ಗಳು ಸೋಲ್ಡೌಟ್ ಆಗಿವೆ. ಮೊನ್ನೆ (ಅ.8) ಆಸ್ಟ್ರೇಲಿಯಾ ವಿರುದ್ಧ ನಡೆದ ತಂಡದ ಮೊದಲ ಪಂದ್ಯದಲ್ಲಿ ಗೆದ್ದು ಭಾರತ ಶುಭಾರಂಭ ಕಂಡಿದೆ. ನಿನ್ನೆ ಆಫ್ಘಾನ್ ವಿರುದ್ಧ ನಡೆದ ಪಂದ್ಯದಲ್ಲೂ ಭಾರತ ಗೆಲುವು ಸಾಧಿಸಿದೆ. ಇದೇ ಹುಮ್ಮಸ್ಸಿನಲ್ಲಿ ಪಾಕ್ ವಿರುದ್ಧ ಗೆಲುವು ದಾಖಲಿಸಲು ಭಾರತ ತಯಾರಿ ನಡೆಸುತ್ತಿದೆ. (ಏಜೆನ್ಸೀಸ್)
ವಿಶ್ವಕಪ್ನ ಮೊದಲ ಮುಖಾಮುಖಿಯಲ್ಲೇ ಇಂಡೋ-ಪಾಕ್ ಆಟಗಾರರ ನಡುವೆ ನಡೆದಿತ್ತು ಮಾತಿನ ಚಕಮಕಿ!