ನವದೆಹಲಿ: ಟೀಮ್ ಇಂಡಿಯಾದ ಮಾಜಿ ಆಟಗಾರ ಯುವರಾಜ್ ಸಿಂಗ್ ಕ್ರಿಕೆಟ್ ವೃತ್ತಿ ಜೀವನದ ನಂತರ ಇದೀಗ ಜೀವನದ ಮತ್ತೊಂದು ಇನ್ನಿಂಗ್ಸ್ ಆರಂಭಿಸಲು ನಿರ್ಧರಿಸಿದ್ದು, ನಟನೆಯ ಕಡೆ ತಮ್ಮ ಆಸಕ್ತಿಯನ್ನು ಹೊರಳಿಸಿದ್ದಾರೆ ಎಂದು ತಿಳಿದುಬಂದಿದೆ.
ಯುವರಾಜ್ ಸಿಂಗ್ ಅವರು ಪತ್ನಿ ಹಜೇಲ್ ಕೀಚ್ ಮತ್ತು ಸಹೋದರ ಜೋರಾವರ್ ಸಿಂಗ್ರೊಂದಿಗೆ ವೆಬ್ ಸರಣಿಯಲ್ಲಿ ನಟಿಸಲಿದ್ದಾರೆ ಎಂಬ ಮಾತುಗಳು ಕೇಳಿಬರುತ್ತಿದೆ. ಈ ವೆಬ್ ಸರಣಿಯನ್ನು ಡ್ರೀಮ್ ಹೌಸ್ ಪ್ರೊಡಕ್ಷನ್ ಆಫ್ ಅಸ್ಸಾಂ ನಿರ್ಮಾಣ ಮಾಡಲಿದೆ.
ವೆಬ್ ಸರಣಿಯಲ್ಲಿ ಯುವಿ ಸಹೋದರ ಜೋರಾವರ್ ಮುಖ್ಯ ಪಾತ್ರದಲ್ಲಿ ಕಾಣಿಸಿಕೊಳ್ಳಲಿದ್ದಾರೆ. ಯುವಿ ತಾಯಿ ಶಬ್ನಮ್ ಸಿಂಗ್ ಕೂಡ ಅಭಿನಯಿಸಲಿದ್ದಾರೆ ಎಂದು ಪ್ರೊಡಕ್ಷನ್ ಬ್ಯಾನರ್ ನೀತಾ ಶರ್ಮಾ ಅವರು ಪತ್ರಿಕಾಗೋಷ್ಠಿಯಲ್ಲಿ ಮಾಹಿತಿ ನೀಡಿದರು. ಈ ವೇಳೆ ಶಬ್ನಮ್ ಸಿಂಗ್ ಕೂಡ ಉಪಸ್ಥಿತರಿದ್ದರು. ಅಲ್ಲದೆ, ವೆಬ್ ಸರಣಿಯಲ್ಲಿ ಭಾಗಿಯಾಗುತ್ತಿರುವುದಕ್ಕೆ ಖುಷಿಯಾಗುತ್ತಿದೆ ಎಂದು ಹರ್ಷ ವ್ಯಕ್ತಪಡಿಸಿದರು.
ನಿಜವಾದ ಯುವರಾಜ್ ಸಿಂಗ್ ಮತ್ತು ಜೋರಾವರ್ ಸಿಂಗ್ ಅವರನ್ನು ವೆಬ್ ಸರಣಿ ಮೂಲಕ ವಿಶ್ವವೇ ನೋಡಲಿದೆ. ಇದರಲ್ಲಿ ಹೆಚ್ಚಾಗಿ ನನ್ನ ಕಿರಿಯ ಮಗ ಜೋರೊವರ್ ಮೇಲೆ ಗಮನ ನೀಡಲಾಗಿದೆ. ತಾಯಿಯಾಗಿ ನನ್ನಿಬ್ಬರು ಮಕ್ಕಳು ಮತ್ತು ಸೊಸೆಯ ಬಗ್ಗೆ ನನಗೆ ಹೆಮ್ಮೆ ಇದೆ ಎಂದು ಶಬ್ನಮ್ ಹೇಳಿದರು.
ನಟ ಅಕ್ಷಯ್ ಕುಮಾರ್ ಅವರ ಮುಂದಿನ ಬಚ್ಚನ್ ಪಾಂಡೆ ಚಿತ್ರದಲ್ಲಿ ತೊಡಗಿಕೊಂಡಿರುವ ಬಾಲಿವುಡ್ ಬರಹಗಾರ ವಿಪಿನ್ ಉನಿಯಾಲ್ ಕೂಡ ಈ ವೆಬ್ ಸರಣಿಗೆ ಸಾಥ್ ನೀಡಿದ್ದು, ಇನ್ನಿತರ ಬಾಲಿವುಡ್ ಕಲಾವಿದರು ಕೂಡ ವೆಬ್ ಸರಣಿಯಲ್ಲಿ ಒಳಗೊಳ್ಳುವ ಸಾಧ್ಯತೆ ಇದೆ ಎಂದು ನೀತಾ ಶರ್ಮಾ ತಿಳಿಸಿದ್ದಾರೆ. (ಏಜೆನ್ಸೀಸ್)