ದೋಹ: ಅಫ್ಘಾನಿಸ್ತಾನದ ಅತಿಜನಪ್ರಿಯ ಮಹಿಳಾ ಪಾಪ್ ಸ್ಟಾರ್ ಅರ್ಯಾನಾ ಸಯೀದ್ ಅವರು ತಾಲಿಬಾನ್ ಆಕ್ರಮಿತ ಕಾಬುಲ್ನಿಂದ ಪಾರಾಗುವಲ್ಲಿ ಯಶಸ್ವಿಯಾಗಿದ್ದಾರೆ ಎಂದು ನ್ಯೂಯಾರ್ಕ್ ಪೋಸ್ಟ್ ವರದಿ ಮಾಡಿದೆ. ಈ ಬಗ್ಗೆ ಗಾಯಕಿ ಹಾಗೂ ಗೀತರಚನಾಕಾರರಾದ ಅರ್ಯಾನಾ ತಮ್ಮ ಇನ್ಸ್ಟಾಗ್ರಾಂನಲ್ಲಿ ತಿಳಿಸಿದ್ದಾರೆ ಎನ್ನಲಾಗಿದೆ.
“ಎರಡು ಮರೆಯಲಾರದ ರಾತ್ರಿಗಳ ನಂತರ ಖತಾರ್ನ ದೋಹ ತಲುಪಿದ್ದೇನೆ. ನಾನು ಆರಾಮವಾಗಿದ್ದೇನೆ. ಇಲ್ಲಿಂದ ಇಸ್ತಾನ್ಬುಲ್ನ ನನ್ನ ಮನೆಗೆ ತೆರಳಲಿದ್ದೇನೆ” ಎಂದು ಇನ್ಸ್ಟಾಗ್ರಾಂನ ತಮ್ಮ 1.3 ಮಿಲಿಯನ್ ಫಾಲೋವರ್ಸ್ಗೆ ಅರ್ಯಾನಾ ಪೋಸ್ಟ್ನಲ್ಲಿ ತಿಳಿಸಿದ್ದಾರೆ. “ಮನೆಗೆ ಹಿಂತುರುಗಿ, ನನ್ನ ಮನಸ್ಸು ಗಾಬರಿ ಮತ್ತು ಅಪನಂಬಿಕೆಗಳ ಜಾಲದಿಂದ ಸಹಜಸ್ಥಿತಿಗೆ ಮರಳಿದ ನಂತರ, ನಿಮ್ಮೊಂದಿಗೆ ಹಂಚಿಕೊಳ್ಳಲು ನನ್ನ ಬಳಿ ಹಲವು ಕಥೆಗಳಿವೆ” ಎಂದು ಬರೆದಿದ್ದಾರೆ.
View this post on Instagram
ತಾಲಿಬಾನ್ ಉಗ್ರವಾದದ ವಿರುದ್ಧ ಮಾತನಾಡುತ್ತಿದ್ದ ಅಫ್ಘನ್ ಮಹಿಳೆಯರಲ್ಲಿ 36 ವರ್ಷದ ಅರ್ಯಾನಾ ಕೂಡ ಒಬ್ಬರು. ಅಫ್ಘನ್ ಟೆಲಿವಿಷನ್ನ ಗಾಯನ ಸ್ಪರ್ಧೆಯ ಶೋನ ತೀರ್ಪುಗಾರರಾಗಿ ಕಾರ್ಯನಿರ್ವಹಿಸುತ್ತಿದ್ದ ಆಕೆ, ಅಮೆರಿಕದ ಕಾರ್ಗೋ ಜೆಟ್ ಒಂದರಲ್ಲಿ ಕಾಬುಲ್ನಿಂದ ಹೊರಟುಬಂದರು. ತಮ್ಮ ಪತಿ ಅಫ್ಘನ್ ಸಂಗೀತ ನಿರ್ಮಾಪಕ ಹಸೀಬ್ ಸಯ್ಯೆದ್ ಅವರೊಂದಿಗೆ ಟರ್ಕಿಯ ಇಸ್ತಾನ್ಬುಲ್ ನಗರದಲ್ಲಿ ವಾಸ್ತವ್ಯ ಹೊಂದಿದ್ದು, ಸದ್ಯಕ್ಕೆ ಅಲ್ಲಿಗೇ ಹೋಗಿ ನೆಲೆಸಲಿದ್ದಾರೆ ಎನ್ನಲಾಗಿದೆ.
ಇದನ್ನೂ ಓದಿ: ತಾಲಿಬಾನಿಗಳಿಗೆ ಹೆದರಿ ಅಫ್ಘಾನ್ನಿಂದ ಯಾವ್ಯಾವ ದೇಶಗಳಿಗೆ ಹೋದವರೆಷ್ಟು? ಇಲ್ಲಿದೆ ಅಂಕಿ ಅಂಶ
“ಅರ್ಯಾನಾ ಸಯೀದ್ 2015 ರಲ್ಲಿ ಸ್ಟೇಡಿಯಂ ಒಂದರಲ್ಲಿ ಹಾಡಿದ್ದು, 3 ಟಬೂಗಳನ್ನು ಮಾಡಿದ್ದಾರೆ. 1. ಮಹಿಳೆಯಾಗಿ ಹಾಡುವುದು, 2. ಹಿಜಾಬ್ ಧರಸದಿರುವುದು 3. ಮಹಿಳೆಯಾಗಿ ಕ್ರೀಡಾಂಗಣವನ್ನು ಪ್ರವೇಶಿಸಿದ್ದು – ಇವೆಲ್ಲವೂ ತಾಲಿಬಾನ್ ನಿಷೇಧಿಸುವಂಥವು. ಈಗ ಇವೆಲ್ಲವೂ ಕನಸಾಗಿ ಮಾರ್ಪಟ್ಟಿವೆ” ಎಂದೊಬ್ಬರು ಮಾನವ ಹಕ್ಕುಗಳ ಚಳುವಳಿಗಾರರು ಟ್ವೀಟ್ ಮಾಡಿದ್ದಾರೆ ಎಂದು ವರದಿ ತಿಳಿಸಿದೆ. (ಏಜೆನ್ಸೀಸ್)
ಇಂದು ರಾಜ್ಯದಲ್ಲಿ ಪ್ರೌಢಶಾಲೆ-ಕಾಲೇಜು ಪುನರಾರಂಭದ ಸಂಭ್ರಮ! ವಿದ್ಯಾರ್ಥಿಗಳೊಂದಿಗೆ ಸಿಎಂ ಬೊಮ್ಮಾಯಿ ಮಾತು
VIDEO| ‘ಈಗ ಎಲ್ಲಾ ಜೀರೋ ಆಗಿಬಿಟ್ಟಿದೆ’ – ಕಣ್ಣೀರು ಹಾಕಿದ ಅಫ್ಘಾನಿಸ್ತಾನದ ಮಾಜಿ ಸಂಸದ