ಬೆಂಗಳೂರು: ನಟ ಇರ್ಫಾನ್ ಖಾನ್ ಈಗಿಲ್ಲ ನಿಜ. ಆದಾಗ್ಯೂ ಅವರ ಅಭಿಮಾನಿಗಳಿಗೆ, ಆಪ್ತರಿಗೆ ಅವರು ಆಗಾಗ ನೆನಪಾಗುತ್ತಲೇ ಇರುತ್ತಾರೆ. ಅದಕ್ಕೆ ಅವರ ಪತ್ನಿ ಸುತಾಪಾ ಸಿಕ್ದರ್ ಕೂಡ ಹೊರತೇನಲ್ಲ. ಆದರೆ ಇಂದು ಅವರು ತಮ್ಮ ಪತಿಯನ್ನು ವಿಶೇಷವಾಗಿ ನೆನಪಿಸಿಕೊಂಡಿದ್ದಾರೆ.
ಇಂದು ವಿಶ್ವ ಪುತ್ರಿಯರ ದಿನ. ಈ ಹಿನ್ನೆಲೆಯಲ್ಲಿ ಇರ್ಫಾನ್ ಅವರನ್ನು ನೆನಪಿಸಿಕೊಂಡಿರುವ ಪತ್ನಿ, ಕಲಾವಿದೆ ಸುತಾಪಾ ತಮ್ಮ ಹೆರಿಗೆಯ ದಿನಗಳನ್ನೂ ಸ್ಮರಿಸಿಕೊಂಡಿದ್ದಾರೆ. ಅದು ನನ್ನ ಎರಡನೆಯ ಹೆರಿಗೆ ಸಂದರ್ಭ. ನನಗೆ ಹಾಗೂ ಇರ್ಫಾನ್ ಇಬ್ಬರಿಗೂ ಒಂದು ಹೆಣ್ಣು ಮಗು ಬೇಕೇಬೇಕು ಎಂಬ ಮಹದಾಸೆ ಇತ್ತು. ಎರಡನೆಯ ಮಗು ಹೆಣ್ಣಾದೀತು ಎಂಬ ನಿರೀಕ್ಷೆಯಲ್ಲಿ ನಾವಿಬ್ಬರೂ ಇದ್ದೆವು.
ಎಷ್ಟರಮಟ್ಟಿಗೆ ಎಂದರೆ, ನಾನು ಮಗುವಿಗೆ ಜನ್ಮ ನೀಡಿದಾಗ, ಹುಟ್ಟಿದ್ದು ಮಗ ಎಂದು ಹೇಳಲೂ ಡಾಕ್ಟರ್ ನರ್ವಸ್ ಆಗಿದ್ದರು. ‘ಕಂಗ್ರಾಚ್ಯುಲೇಷನ್.. ಹೆಲ್ದಿ ಚೈಲ್ಡ್..’ ಎಂದಷ್ಟೇ ಹೇಳಿದ್ದ ಡಾಕ್ಟರ್, ಹುಟ್ಟಿದ್ದು ಗಂಡೋ ಹೆಣ್ಣೋ ಎಂಬುದನ್ನು ಹೇಳಲು ಹಿಂಜರಿದಿದ್ದರು ಎಂಬುದನ್ನು ಸುತಾಪಾ ಇಂದು ಸ್ಮರಿಸಿಕೊಂಡಿದ್ದಾರೆ.
ಇದೇ ಏಪ್ರಿಲ್ 29ರಂದು ಇರ್ಫಾನ್ ಎಲ್ಲರನ್ನೂ ಅಗಲಿದ್ದರು. ಪತ್ನಿ ಸುತಾಪಾ ಈಗ ತಮ್ಮ ಇಬ್ಬರು ಗಂಡು ಮಕ್ಕಳು ಬಬಿಲ್ ಹಾಗೂ ಅಯನ್ ಅವರೊಂದಿಗೆ ಜೀವನ ಸಾಗಿಸುತ್ತಿದ್ದು, ಅಗಲಿರುವ ಪತಿ ಇರ್ಫಾನ್ ಅವರನ್ನು ಇಂದು ಪುತ್ರಿಯರ ದಿನದ ಸಂದರ್ಭದಲ್ಲಿ ಸ್ಮರಿಸಿಕೊಂಡು ಸೋಷಿಯಲ್ ಮೀಡಿಯಾದಲ್ಲಿ ಹಂಚಿಕೊಂಡಿದ್ದಾರೆ.
