ಮುಂಬೈ: ಕಷ್ಟದಲ್ಲಿ ಇದ್ದವರಿಗೆ ಸಹಾಯ ಮಾಡಿ ಮಾಡಿಯೇ ಇತ್ತೀಚೆಗೆ ನಟ ಸೋನು ಸೂದ್ ಬಹಳಷ್ಟು ಸಲ ಗಮನ ಸೆಳೆದಿದ್ದಾರೆ. ಇದೀಗ ಆ ಸರದಿ ನಟ ಹೃತಿಕ್ ರೋಷನ್ ಅವರದ್ದು. ಬಾಲಿವುಡ್ ನಟ ಹೃತಿಕ್ ರೋಷನ್ ಆಟೋ ಚಾಲಕನೊಬ್ಬನ ಮಗನ ಕನಸನ್ನು ನನಸಾಗಿಸಿಕೊಳ್ಳಲು ಸಹಾಯ ಮಾಡಿದ್ದಾರೆ. ಮಾತ್ರವಲ್ಲ ತಮ್ಮ ಈ ನಡೆಯಿಂದ ಮೆಚ್ಚುಗೆಗೂ ಪಾತ್ರವಾಗಿದ್ದಾರೆ.
ದೆಹಲಿಯ ವಿಕಾಸಪುರಿ ನಿವಾಸಿ, 20 ವರ್ಷದ ಯುವಕ ಕಮಲ್ ಸಿಂಗ್ ಬ್ಯಾಲೆಟ್ ಡಾನ್ಸರ್ ಆಗಿದ್ದು, ಇಂಗ್ಲೆಂಡ್ನಲ್ಲಿನ ಪ್ರತಿಷ್ಠಿತ ಇಂಗ್ಲಿಷ್ ನ್ಯಾಷನಲ್ ಬ್ಯಾಲೆಟ್ ಸ್ಕೂಲ್ ಆಫ್ ಲಂಡನ್ಗೆ ಪ್ರವೇಶಾವಕಾಶ ಪಡೆದ ಮೊದಲ ಭಾರತೀಯ ಡಾನ್ಸರ್ ಎನಿಸಿಕೊಂಡಿದ್ದಾನೆ.
ಆದರೆ ಅಲ್ಲಿಗೆ ಪ್ರವೇಶ ಪಡೆಯಲು ಆರ್ಥಿಕ ಮುಗ್ಗಟ್ಟು ಎದುರಿಸುತ್ತಿದ್ದ ಕಮಲ್ ಸಿಂಗ್ ಫಂಡರೈಸರ್ ಮೂಲಕ ಮನವಿ ಮಾಡಿಕೊಂಡಿದ್ದು ಹೃತಿಕ್ ರೋಷನ್ ಗಮನಕ್ಕೆ ಬಂದಿದೆ. ಕಮಲ್ ಸಿಂಗ್ಗೆ ಅಲ್ಲಿಗೆ ಪ್ರವೇಶ ಪಡೆಯಲು 15 ಲಕ್ಷ ರೂ. ಅಗತ್ಯವಿದ್ದು, 3 ಲಕ್ಷ ರೂ. ಕೊರತೆ ಇದ್ದಾಗ ಹೃತಿಕ್ ರೋಷನ್ 3 ಲಕ್ಷ ರೂ. ನೀಡಿ ನೆರವಾಗಿದ್ದಾರೆ. ನಟನ ಈ ನೆರವಾಗಿ ಕಮಲ್ ಸಿಂಗ್ ತಂದೆ ಹಾಗೂ ಟೀಚರ್ ಇಬ್ಬರೂ ಧನ್ಯವಾದ ತಿಳಿಸಿ ಮೆಚ್ಚುಗೆ ಸೂಚಿಸಿದ್ದಾರೆ. (ಏಜೆನ್ಸೀಸ್)