ನವದೆಹಲಿ: ವಾಹನ ಚಾಲನಾ ಪರವಾನಗಿ (ಡಿಎಲ್)ಯನ್ನು ಆನ್ಲೈನ್ ಮೂಲಕ ನವೀಕರಿಸಿಕೊಳ್ಳಲು ಆಧಾರ್ ಸಂಖ್ಯೆಯ ದೃಢೀಕರಣ ಅಗತ್ಯ. ವಾಹನ ಕಲಿಕಾ ಪರವಾನಗಿ (ಎಲ್ಎಲ್ಆರ್), ವಿಳಾಸ ಬದಲಾವಣೆ, ವಾಹನ ನೋಂದಣಿ ಪ್ರಮಾಣಪತ್ರ (ಆರ್ಸಿ) ಅಂತಾರಾಷ್ಟ್ರೀಯ ಡಿಎಲ್, ವಾಹನದ ಮಾಲೀಕತ್ವದ ವರ್ಗಾವಣೆ ಸೇರಿ 16 ಸೇವೆಗಳನ್ನು ಆನ್ಲೈನ್ ಮೂಲಕ ಸಾರಿಗೆ ಇಲಾಖೆಯಿಂದ ಪಡೆಯುವುದಕ್ಕೂ ಆಧಾರ್ ದೃಢೀಕರಣ ಬೇಕು ಎಂದು ಕೇಂದ್ರ ಸಾರಿಗೆ ಸಚಿವಾಲಯ ತಿಳಿಸಿದೆ.
ಯಾವುದೇ ವ್ಯಕ್ತಿ ಸಾರಿಗೆ ಇಲಾಖೆಯ ಆನ್ಲೈನ್ ಪೋರ್ಟಲ್ ಮೂಲಕ ಸೇವೆ ಪಡೆಯಲು ಆಧಾರ್ ದೃಢೀಕರಣ ಅಗತ್ಯವೆಂದು ಕರಡು ಆದೇಶದಲ್ಲಿ ಉಲ್ಲೇಖಿಸಲಾಗಿದೆ. ಆಧಾರ್ ಕಾರ್ಡ್ ಹೊಂದಿಲ್ಲದವರು ಆಧಾರ್ ನೋಂದಣಿಯ ಸಂಖ್ಯೆಯನ್ನು ನೀಡಿ ಈ ಸೌಲಭ್ಯವನ್ನು ಪಡೆಯಬಹುದಾಗಿದೆ. ಆಧಾರ್ ಸಂಖ್ಯೆ ನೀಡಲು ಇಚ್ಛಿಸದವರು ಖುದ್ದಾಗಿ ಸಾರಿಗೆ ಇಲಾಖೆಯ ಕಚೇರಿಗೆ (ಆರ್ಟಿಒ) ಭೇಟಿ ಸೇವೆ ಪಡೆಯಬಹುದು ಎಂದು ಸಚಿವಾಲಯದ ಅಧಿಕಾರಿಗಳು ಹೇಳಿದ್ದಾರೆ.
ಆಧಾರ್ ದೃಢೀಕರಣದಿಂದ ನಕಲಿ ದಾಖಲೆಗಳನ್ನು ತಡೆಯಲು ಸಾಧ್ಯ ಮತ್ತು ಒಬ್ಬ ವ್ಯಕ್ತಿಗೆ ಒಂದಕ್ಕಿಂತ ಹೆಚ್ಚು ಡಿಎಲ್ ಹೊಂದಿರುವುದು ರಸ್ತೆ ಸುರಕ್ಷತೆಗೆ ಅಪಾಯ ತರಬಹುದು. ಇತ್ತೀಚಿನ ದಿನಗಳಲ್ಲಿ ಆನ್ಲೈನ್ ಮೂಲಕವೇ ಸೇವೆ ಪಡೆಯಲು ಬಯಸುವವರ ಸಂಖ್ಯೆ ಹೆಚ್ಚುತ್ತಿದೆ. ಇಂಥದಕ್ಕೆ ರಾಜ್ಯ ಸರ್ಕಾರಗಳೂ ಉತ್ತೇಜನ ನೀಡಬೇಕಿದೆ. ಆನ್ಲೈನ್ ಮೂಲಕ ಸೇವೆ ಒದಗಿಸುವುದರಿಂದ ಆರ್ಟಿಒ ಕಚೇರಿಗಳಲ್ಲಿ ಜನಜಂಗುಳಿ ಗಣನೀಯವಾಗಿ ತಗ್ಗುತ್ತದೆ ಎಂದೂ ಅಧಿಕಾರಿಗಳು ತಿಳಿಸಿದ್ದಾರೆ. ಒಳ್ಳೆಯ ಆಡಳಿತದ ನಿಯಮದ ಅನ್ವಯ ರೂಪಿಸಿರುವ ಈ ಕರಡು ಆದೇಶದ ಬಗ್ಗೆ ಸಾರ್ವಜನಿಕರು ಮತ್ತು ಸಂಬಂಧಿಸಿದವರಿಂದ ಸಲಹೆ ಕೋರಲಾಗಿದೆ ಎಂದು ಹೇಳಿದ್ದಾರೆ.