ಹೈದರಾಬಾದ್: ಚೀನಾ ಸೇರಿ ಹಲವು ದೇಶಗಳಲ್ಲಿ ಕೊರೊನಾ ವೈರಸ್ ತನ್ನ ಯಮರೂಪವನ್ನು ತೋರಿದೆ. ನಾವು ತಿನ್ನುವ ಕೋಳಿ ಮಾಂಸದಿಂದಲೂ ಕೊರೊನಾ ವೈರಸ್ ಹರಡುತ್ತದೆ ಎನ್ನುವ ಸುದ್ದಿ ಹರಿದಾಡುತ್ತಿದೆ. ಈ ಸುದ್ದಿ ಸುಳ್ಳು, ಕೊರೊನಾಗೂ ಚಿಕನ್ಗೂ ಯಾವುದೇ ಸಂಬಂಧವಿಲ್ಲ ಎಂದು ಜನರಲ್ಲಿ ಧೈರ್ಯ ತುಂಬುವ ಸಲುವಾಗಿ ತೆಲಂಗಾಣದ ಸಚಿವರು ವೇದಿಕೆಯ ಮೇಲೆ ಚಿಕನ್ ತಿಂದಿದ್ದಾರೆ.
ಶುಕ್ರವಾರದಂದು ಹೈದರಾಬಾದ್ನಲ್ಲಿ ನಡೆದ ಕಾರ್ಯಕ್ರಮದಲ್ಲಿ ತೆಲಂಗಾಣದ ಸರ್ಕಾರದ ಸಚಿವರು ಸಾಲಾಗಿ ನಿಂತು ಚಿಕನ್ ಲೆಗ್ ಪೀಸ್ಗಳನ್ನು ತಿಂದಿದ್ದಾರೆ. ಕೆ.ಟಿ.ರಾಮ ರಾವ್, ಎಟೆಲಾ ರಾಜೇಂದರ್ ಮತ್ತು ತಲಸಾನಿ ಶ್ರೀನಿವಾಸ್ ಯಾದವ್ ಸೇರಿದಂತೆ ಅನೇಕರು ಚಿಕನ್ ತಿನ್ನುವ ಮೂಲಕ ಜನರಲ್ಲಿರುವ ಭಯವನ್ನು ಹೋಗಲಾಡಿಸುವ ಪ್ರಯತ್ನ ಮಾಡಿದ್ದಾರೆ.
ಕಳೆದ ಡಿಸೆಂಬರ್ ತಿಂಗಳಿನಲ್ಲಿ ಚೀನಾದ ಮಾಂಸದ ಮಾರುಕಟ್ಟೆಯಲ್ಲಿ ಮೊದಲ ಕೊರೊನ ವೈರಸ್ ಪತ್ತೆಯಾಗಿತ್ತು. ಅದಾದ ನಂತರ ಈ ವೈರಸ್ ದೇಶ ವಿದೇಶಗಳಿಗೂ ಹರಡಿತ್ತು. ಸಾಕು ಪ್ರಾಣಿಗಳು ಮತ್ತು ಕೋಳಿ ಮಾಂಸದಿಂದಲೂ ಕೊರೊನಾ ಹರಡುತ್ತದೆ ಎನ್ನುವ ಸುದ್ದಿಗಳು ಹರಿದಾಡಿತ್ತು. (ಏಜೆನ್ಸೀಸ್)