ಚಂಡೀಗಢ: ಬಾಕ್ಸಿಂಗ್ ಹೇಳಿಕೊಡಬೇಕಾದ ಬಾಕ್ಸಿಂಗ್ ಕೋಚ್ ಒಬ್ಬ ತನ್ನ ವಿದ್ಯಾರ್ಥಿನಿ ಮೇಲೆ ಪದೇ ಪದೆ ಅತ್ಯಾಚಾರವೆಸಗಿರುವ ಕೃತ್ಯ ಚಂಡೀಗಢದ ಸೋನಿಪತ್ನಲ್ಲಿ ನಡೆದಿದೆ.
ಸಂದೀಪ್ ಮಲ್ಲಿಕ್(28) ಹೆಸರಿನ ವ್ಯಕ್ತಿಯೊಬ್ಬ ಸೋನಿಪತ್ನಲ್ಲಿ ಬಾಕ್ಸಿಂಗ್ ತರಬೇತಿಯನ್ನು ನೀಡುತ್ತಿದ್ದ. ಖಾಸಗಿ ಅಂತಾರಾಷ್ಟ್ರೀಯ ಟೂರ್ನಮೆಂಟ್ಗಳಲ್ಲಿ ಗೆದ್ದಿರುವ ಆತ ತನ್ನದೆ ಹೆಸರಿನ ಬಾಕ್ಸಿಂಗ್ ತರಬೇತಿ ಕೇಂದ್ರವನ್ನು ನಡೆಸುತ್ತಿದ್ದು ಅಲ್ಲಿ ಅನೇಕರಿಗೆ ತರಬೇತಿಯನ್ನು ನೀಡುತ್ತಿದ್ದಾನೆ. ಫೆಬ್ರವರಿ ತಿಂಗಳ 29ರಿಂದ ಮಾರ್ಚ್ 3ರವರೆಗೆ ಕೊಲ್ಕತ್ತಾದಲ್ಲಿ ನಡೆದ ‘3ಬೇ ಬಂಗಾಳ ಬಾಕ್ಸಿಂಗ್ ಕ್ಲಾಸಿಕ್ 2020’ರಲ್ಲಿ ಹರಿಯಾಣವನ್ನು ಪ್ರತಿನಿಧಿಸಿದ ಆತನ ಬಾಕ್ಸಿಂಗ್ ವಿದ್ಯಾರ್ಥಿಗಳನ್ನು ಆತ ರೈಲಿನಲ್ಲಿ ಕರೆದೊಯ್ದಿದ್ದ. ಫೆ.27ರಂದು ರೈಲಿನಲ್ಲಿ ದೆಹಲಿಯಿಂದ ಕೋಲ್ಕತಕ್ಕೆ ಕರೆದೊಯ್ಯುವಾಗ 19 ವರ್ಷದ ವಿದ್ಯಾರ್ಥಿನಿಯೊಬ್ಬಳ ಮೇಲೆ ಅತ್ಯಾಚಾರವೆಸಗಿದ್ದಾನೆ.
ಅಷ್ಟಕ್ಕೇ ಮುಗಿಸದ ಆತ ಕೊಲ್ಕತ್ತಾದಲ್ಲಿ ನಾಲ್ಕು ದಿನಗಳ ಕಾಲ ತನ್ನ ಕೋಣೆಯಲ್ಲಿ ಮತ್ತು ಅನೇಕ ಸಾರ್ವಜನಿಕ ಸ್ಥಳಗಳಲ್ಲಿ ಆ ವಿದ್ಯಾರ್ಥಿನಿಯ ಮೇಲೆ ಅತ್ಯಾಚಾರವನ್ನೆಸಗಿದ್ದಾನೆ. ಅತ್ಯಾಚಾರಕ್ಕೊಳಗಾದ ಯುವತಿಯು ದೆಹಲಿಯ ಆಸುಪಾಸಿನವಳಾಗಿದ್ದು, ಆಕೆ ದೆಹಲಿ ಪೊಲೀಸರ ಬಳಿ ತನ್ನ ಕೋಚ್ನ ಬಗ್ಗೆ ದೂರು ನೀಡಿದ್ದಾಳೆ.
ರೈಲಿನಲ್ಲಿ ಅತ್ಯಾಚಾರ ನಡೆದ ಕಾರಣ, ದೆಹಲಿ ಪೊಲೀಸರು ಪ್ರಕರಣವನ್ನು ರೈಲ್ವೇ ಪೊಲೀಸರಿಗೆ ಹಸ್ತಾಂತರಿಸಿದ್ದಾರೆ. ವಿದ್ಯಾರ್ಥಿನಿ ತನ್ನ ವಿರುದ್ಧ ದೂರು ನೀಡಿದ್ದಾಳೆ ಎನ್ನುವುದರ ಅರಿವಿರದೆ ಆರಾಮವಾಗಿದ್ದ ಸಂದೀಪ್ನನ್ನು ಸೋಮವಾರದಂದು ಪೊಲೀಸರು ಬಂಧಿಸಿದ್ದಾರೆ. ಆರೋಪಿಗೆ ಮದುವೆಯಾಗಿರುವುದಾಗಿ ಹೇಳಲಾಗಿದೆ.
ಸಂದೀಪ್ ಮಲ್ಲಿಕ್ ಬೇರೆ ವಿದ್ಯಾರ್ಥಿನಿಯರ ಜತೆಯೂ ಇಂಥ ಕೃತ್ಯವೆಸಗಿದ್ದಾನೆಯೇ ಎನ್ನುವುದರ ಕುರಿತಾಗಿ ಆತನ ವಿದ್ಯಾರ್ಥಿನಿಯರೊಂದಿಗೆ ವಿಚಾರಣೆ ನಡೆಸಬೇಕಿದೆ. ಸದ್ಯ ಆರೋಪಿ ತನ್ನ ತಪ್ಪನ್ನು ಒಪ್ಪಿಕೊಂಡು ಕ್ಷಮೆ ಕೇಳಿದ್ದಾನೆ. ಆರೋಪಿಯ ವಿರುದ್ಧ ಅತ್ಯಾಚಾರ ಮತ್ತು ಕಿರುಕುಳ ಪ್ರಕರಣವನ್ನು ದಾಖಲಿಸಿಕೊಳ್ಳಲಾಗಿದೆ ಎಂದು ದೆಹಲಿಯ ಡಿಸಿಪಿ ಹರೇಂದ್ರ ಸಿಂಗ್ ತಿಳಿಸಿದ್ದಾರೆ. (ಏಜೆನ್ಸೀಸ್)
ಕರೋನಾ ಎಫೆಕ್ಟ್: ಭಾರತೀಯನನ್ನು ನೋಡಿ ಚೀನೀಯ, ಕರೋನಾ, ಕರೋನಾ ಎಂದರಚುತ್ತ ಹಲ್ಲೆ ನಡೆಸಿದ ಇಸ್ರೇಲಿಯನ್ನರು!
ಕರೊನಾ ತಡೆಗೆ ಮೆಟ್ರೋ, ಲೋಕಲ್ ರೈಲು ಸಂಚಾರ ಸ್ಥಗಿತ?! ಮಹಾರಾಷ್ಟ್ರಕ್ಕೆ ಹೆಚ್ಚಿದ ಕರೊನಾ ಚಿಂತೆ