ಬೆಂಗಳೂರು: ‘ಶ್ರೀಭರತ ಬಾಹುಬಲಿ’ ಸಿನಿಮಾ ನೋಡುವ ಪ್ರೇಕ್ಷಕರಿಗೆ 1 ಕೋಟಿ ರೂ. ಮೊತ್ತದ ಬಹುಮಾನ ಕೊಡುವುದಾಗಿ ಹೇಳಿದ್ದ ಚಿತ್ರತಂಡ, ಇದೀಗ ಆ ಮಾತನ್ನು ಪುನರುಚ್ಚರಿಸಿದೆ. ‘ನಮ್ಮ ಚಿತ್ರವನ್ನು ನೋಡುವ ಪ್ರೇಕ್ಷಕರ ಪೈಕಿ ಅದೃಷ್ಟಶಾಲಿ 20 ಮಂದಿಗೆ ಒಟ್ಟು 1 ಕೋಟಿ ರೂ. ಮೊತ್ತದ ಬಹುಮಾನ ನೀಡುತ್ತೇವೆ’ ಎಂಬುದಾಗಿ ಚಿತ್ರತಂಡ ಈ ಹಿಂದೆ ಹೇಳಿಕೊಂಡಿತ್ತು. ಆ ಬಳಿಕ ಮತ್ತೊಮ್ಮೆ ಸುದ್ದಿಗೋಷ್ಠಿ ಕರೆದಿರುವ ಚಿತ್ರತಂಡ, ಬಹುಮಾನದ ವಿಷಯದ ಬಗ್ಗೆ ಇದ್ದ ಗೊಂದಲ ಬಗೆಹರಿಸಿದೆ. ‘ಕೆಲವರು ಇಷ್ಟೊಂದು ಬಹುಮಾನ ಕೊಡುವುದು ನಿಜವಾ?’ ಎಂದು ಅನುಮಾನ ವ್ಯಕ್ತಪಡಿಸಿದ್ದನ್ನು ಕೇಳಿದ್ದೇವೆ. ಆ ಬಗ್ಗೆ ಅನುಮಾನವೇ ಬೇಡ, ಬಹುಮಾನ ಪಕ್ಕಾ..’ ಎಂಬುದಾಗಿ ನಿರ್ವಪಕ ಶಿವಪ್ರಕಾಶ್ ಹಾಗೂ ನಿರ್ದೇಶಕ ಮಂಜು ಮಾಂಡವ್ಯ ಭರವಸೆ ನೀಡಿದ್ದಾರೆ.
ಸಿನಿಮಾ ಬಿಡುಗಡೆ ಆದಾಗಿನಿಂದ 14 ದಿನಗಳವರೆಗೆ ಚಿತ್ರ ವೀಕ್ಷಿಸಲು ಬರುವ ಪ್ರೇಕ್ಷಕರಿಗೆ ಪ್ರತಿ ಟಾಕೀಸ್ನಲ್ಲಿ ಟಿಕೆಟ್ ಜತೆಗೆ ಒಂದು ಕೂಪನ್ ನೀಡಲಾಗುವುದು. ಅದಕ್ಕಾಗಿ 80 ಲಕ್ಷ ಕೂಪನ್ಗಳನ್ನು ಈಗಾಗಲೇ ಪ್ರಿಂಟ್ ಮಾಡಿಸಲಾಗಿದೆ. 14ನೇ ದಿನದ ನಂತರ ಆ ಕೂಪನ್ಗಳನ್ನು ಸಂಗ್ರಹಿಸಿ ಲಕ್ಕಿಡಿಪ್ ಮೂಲಕ ಸಾರ್ವಜನಿಕವಾಗಿ 20 ಮಂದಿಯನ್ನು ಆರಿಸಲಾಗುವುದು’ ಎಂದು ಮಂಜು ಮಾಂಡವ್ಯ ತಿಳಿಸಿದರು.
‘ವಿಜೇತ ಹತ್ತು ಮಂದಿಗೆ ತಲಾ 5 ಲಕ್ಷ ರೂ. ಮೌಲ್ಯದ ಕಾರು, ಇನ್ನು ಹತ್ತು ಮಂದಿಗೆ ತಲಾ 5 ಲಕ್ಷ ರೂ. ಮೌಲ್ಯದ ಚಿನ್ನದ ಆಭರಣ ನೀಡಲಾಗುವುದು ಎಂದು ನಿರ್ವಪಕ ಶಿವಪ್ರಕಾಶ್ ಹೇಳಿದರು. ಸಿನಿಮಾ ಬಿಡುಗಡೆ ಆಗಿ 14 ದಿನಗಳ ಒಳಗೆ ಚಿತ್ರ ವೀಕ್ಷಿಸುವ ಕರ್ನಾಟಕದಲ್ಲಿನ ಪ್ರೇಕ್ಷಕರಿಗಷ್ಟೇ ಈ ಬಹುಮಾನ ಅನ್ವಯಿಸುತ್ತದೆ ಎಂದು ಚಿತ್ರತಂಡ ತಿಳಿಸಿದೆ.